UNEC şefinin ilginc KADR SİYASƏTİ...
22-12-2021, 09:16
Sovetlər dönəmində partiyanın tapşırığı ilə yüksək vəzifələrə kadr axtaranda ilk növbədə onun komsomol, sonra isə partiya komitələrindəki fəaliyyəti, “partşkola”nın məzunu olub-olmaması araşdırılırdı. Yəni, komsomol və ya partiya komitələri Mərkəzi Komitənin zəruri kadr laboratoriyası rolunu oynayırdı. Bu, siyasi hakimiyyətin o
vaxtkı kadr siyasətinin əsas tərkib hissəsi idi. Qayda isə ciddi, həm də sərt idi: partiya vəzifəsinə getmək üçün mütləq komsomolun şinelindən çıxmalı idi...
Azərbaycan Dövlət İqtisad Universitetinin “Azərsu” şinelindən çıxmış kadrları...
Gələk mətləbə: Azərbaycan Dövlət İqtisad Universitetinin rəhbər kadr seçimində nədən elə universitetin özünün, yaxud oxşar təyinatlı dövlət qurumlarının elmi kadrlarına deyil, “Azərsu” ASC-nin kabinet kadrlarına seçim edilir?
Sualın cavabı elə də çətin deyil. Belə bir sualla ADİU-da çalışan müəllimlərdən biri elektron poçtumuza məktub yazaraq müraciət edib ki, bu suala biz cavab axtaraq. “Axtaran tapar” deyiblər deyə, biz də axtardıq.Həqiqətən də maraqlıdır. Və hamı da bilir ki, hazırda Baş Prokurorluq “Azərsu”da olduqca ciddi yoxlamalar aparır. Bu barədə ötən sayımızda yazmışdıq. Amma yazılmayan mətləblər var ki, bu dəfə qeyd edəcəyik, bəziləri isə istintaq sirri sayılan səviyyədədir. Beləliklə, kiçik bir araşdırma apardıq və məlum oldu ki, məsələn, bu ilin dekabrın 14-də ADİU rektoru Ədalət Muradovun əmri ilə 1980-ci il təvəllüdlü Nəsimi İsmayılov İqtisadi məsələlər üzrə proektor təyin edilib... Təbrik edirik! Amma diqqəti çəkən budur ki, N.İsmayılovun tərcümeyi- halında da yazılır ki, o, 2011-ci ilin aprel ayından 2014-cü ilin aprelinədək “Azərsu” ASC-də Maliyyə və Vergilər şöbəsinin rəisi olub. 2014-cü ilin aprel ayından 13 dekabr 2021-ci ilədək isə ADİU-da Maliyyə və Təminat Departamentinin direktoru işləyir, indi də prorektor təyin olunub...
“Azərsu”yun daha bir şöbə rəisi İqtisad Universitetində-yüksək vəzifədə...
Bundan başqa, İlqar Seyfullayev 2016-2018-ci illərdə “Azərsu” ASC-də Plan-iqtisad şöbəsinin rəisi işləyib. 2018-dən isə rektor Ə.Muralovun əmri ilə ADİU-nun Beynəlxalq Magistratura və Doktorantura Mərkəzinin “İqtisadiyyat və İdarəetmə” kafedrasının dosenti, sonra isə həmin kafedranın maliyyə və mühasibat ixtisasları üzrə proqram rəhbəri təyin edilib. 15 sentyabr 2020-ci ildən isə ADİU-nun isə Beynəlxalq Magistratura və Doktorantura Mərkəzinin Doktorantura şöbəsinin əvəzçiliklə müdiri (0,5 ştatla) vəzifəsinə təyinat alıb... Əslində, biz nə İlqar Seyfullayevin, nə də Nəsimi İsmayılovun təyinatlarına etirazlı deyilik, olsun! Söhbət ADİU-da vacib sahələrə təyinat alanların məhz “Azərsu”dan gətirilməsindən gedir.
Yuxarıda qeyd etdik, hazırda Baş Prokurorluq “Azərsu”da yoxlamalar aparır.Əsas problem də büdcə pullarının talanmasıdır. Həbs edilən, istintaqa çağırılanlar var. Azərbaycan Dövlət İqtisad Universitetinin “İqtisadiyyat və idarəetmə” kafedrasının müdiri Yaşar Kəlbiyev ən çox dindirilənlərdəndir. Çünki o, həm də “Azərsu”da İqtisadiyyat və Uçot İdarəsinin rəisi, eləcə də “Azərsu”yun “Sukanal” Elmi-Tədqiqat Layihə İnstitutunun direktorudur...
“Azərsu” Azərbaycan Dövlət İqtisad Universiteti üçün kadr laboratoriyasıdırmı?
Göründüyü kimi, təkcə “Azərsu”dan ADİU-ya 3 məsul şəxs transfer edilib. Maraqlısı isə budur ki, məsələn, hazırda Baş Prokurorluğun yoxlamalarında əsas cavabdehlərdən olan Yaşar Kəlbiyev universitetin Magistratura Mərkəzinin nəzdində yaradılmış məxsusi kafedranın yarımştatlı müdiri olsa da, “Azərsu”da tam ştatda idarə rəisidir...
Yaşar Kəlbiyevin ADİU-nun rəsmi saytındakı tərcümeyi-halı niyə alayarımçıq edilib?
Yaşar Kəlbiyevin əvvəlki tərcümeyi halına baxanda onun “Azərsu”da İqtisadiyyat və Uçot İdarəsinin rəisi, eləcə də “Azərsu”yun “Sukanal” Elmi-Tədqiqat Layihə İnstitutunun direktoru olduğu yazılırdı. Hətta rəsmi xəbərlərdə, o cümlədən AzərTAC-ın məlumatlarında belə belə yazılıb, indi də həmin məlumatlar bazada vardır. Lakin “Təzadlar”ın ötən yazısından sonra ADİU-nun rəsmi saytında onun bu iki tam ştatlı vəzifəsi sistemdən silinib. Doğru ediblər, çünki ən azından kənardan baxan adi məktəbli belə rektor Ədalət Muradova sual edə bilər ki, “Azərsu”da tam ştatlı idarə rəisi, institut direktoru olan adam universitetdə necə kafedra müdirliyi edə bilər??? Həmçinin magistrlərlə necə ünsiyyət saxlaya bilər, özü də Baş Prokurorluğun indiki yoxlamaları şəraitində...
Bəs Yaşar Kəlbiyev həqiqətənmi professordur?
Diqqətimizi bir məsələ də çəkir: Yaşar Kəlbiyevin ADİU-nun rəsmi saytındakı tərcümeyi-halına baxanda onun professor olduğu yazılır. Prezidentin Ali Attestasiya Komissiyası ilə bağlı məlum sərəncamında aydın şəkildə yazılıb ki, professor diplomu yalnız AAK tərəfindən verilə bilər. O qabaqlar idi ki, özəl universitetlər özləri özlərinə professor diplomu, akademik adı verirdilər. Beləliklə, AAK-ın bazasında professorların adı keçən bölməsində Yaşar Kəlbiyevin adını tapa bilmədik... Uzun sözün qısası, belə bir qənaətə gəldik ki, Azərbaycan Dövlət İqtisad Universitetində məsul vəzifəyə təyinat almaq üçün mütləq əvvəlcə “Azərsu”da işləmək lazımdır...
ADİU-da daha bir maraqlı təyinat...
Azərbaycan Dövlət İqtisad Universitetinin rəsmi məlumat bazasında daha bir maraqlı məlumata rast gəldik: iqtisadiyyat üzrə fəlsəfə doktoru, dosent Quliyev Oqtay Qulu oğlu “İqtisadiyyat və işlətmə” kafedrasının müdiri təyin edilib. Özü də yarım ştatla. Ən maraqlısı, Oqtay müəllimin tərcümeyi-halındakı əsas iş yeri isə gizlədilib. Məsələn, onun müdir təyin edildiyi kafedranın bütün müəllimlərindən 34-nün heç bir elmi dərəcəsi belə yoxdur. Yəni, adi və sıravi müəllim... Qalanların isə demək olar hamısı yarımştatlı müəllimlərdir. Bir hissəsi də iqtisadiyyat üzrə fəlsəfə doktorudur... Oqtay Quliyevin tərcümeyi-halına gəlincə, iki cümləlikdir: “-03.06.2019-cu ildən Türk dünyası iqtisadi araşdırmalar mərkəzinə ictimai əsaslarla rəhbər təyin edilib; -07.01.2020-ci il tarixdən “İqtisadiyyat və işlətmə” kafedrasının müdiri vəzifəsinə təyin edilib”.
Vəssalam!
***
Bəli, rektor Ədalət Muradov universiteti islahatlar mərkəzinə çevirib nümunəvi etmək istəyir. Lakin görünən budur ki, belə təyinatlar başadüşülən deyildir. Məsələn, necə başa düşüləndir ki, adi dosenti kafedra müdiri təyin edirlər, amma keçmişi nazir olan, tanınmış maliyyəçi, professor Əvəz Ələkbərovun kafedrası isə ləğv edilir, faktiki olaraq o, oyundan kənar vəziyyətə salınır, havadadır və s.
***
Mövzuya mütləq qayıdılacaq. Çünki ADİU müəlliminin məktubunda cavab verilməli suallar var. Onlardan ən birincisi budur ki, məsələn, təkcə ADİU-nun ötən hər illərdə xalis gəliri əlli milyon manata yaxın olub, amma bu vəsaitin xərclənmə ünvanları düşündürücüdür, bizi də çaşdırıb... Professorlar, elmlər doktorları dərs yükündən şikayətçi olduğu halda, elmi dərəcəsi belə olmayan adi adamları müəllim kimi işə qəbul edib yüksək maaş vermək nə dərəcədə ədalətlidir?
“Təzadlar”ın Araşdırma Qrupu
Geri qayıt