Təhsil sistemində TEXNİKİ NASAZLIQ...
14-07-2023, 08:56
DİA.AZ: - "Azərbaycan Texniki Universitetinin (AzTU) təcrübəli müəllimlərindən bir qrupu yenə də yalnız universitetimizdə deyil, həm də ölkəmizin aşağıdan yuxarıyadək bütün təhsil sistemində yaranmış vəziyyətlə və bu vəziyyətin nəticələri olan faktlarla Respublika ictimaiyyətinə, əlaqədar rəsmi dövlət təşkilatlarına və vəzifəli şəxslərə müraciət etmək məcburiyyətindədir". Bu barədə DİA.AZ-a göndərilən məqalədə deyilir.
Məqalənin ƏVVƏLİ BURADA: Cənab Əmrullayevin buralara NƏZƏR SALMASI LAZIMDIR... - Ali təhsilin AzTU BATAQLIĞI...
Məqalənin davamında deyilir: "Məlum olduğu kimi, Respublikamızın ali təhsil sistemində 2005-ci ildən Bolonya sistemi (bəzən buna kredit sistemi də deyilir) adlanan Avropa ali təhsil sistemi tətbiq edilməyə başlanmışdır. Tətbiq edildiyi vaxtdan da hər 4-5 ildən bir tədris planları mərhələli olaraq yenilənir. Bunu da nazirlik onunla əsaslandırır ki, guya, bizim ilk başladığımız Bolonya sistemi onun əsli deyilmiş və beləliklə biz tez-tez “islahatlar” apararaq, əsl Bolonya sisteminə yaxınlaşırıq. Yalandır, tamamilə bunun əksinədir. İlk tətbiq edilən variant elə də pis deyildi. Amma hər dəfə “yeni təkmilləşdirilmiş variant” tətbiq edildikcə, biz əslində Bolonya sistemindən uzaqlaşır və təhsil sistemimizi daha da aşağı səviyyəyə endiririk. Nazirlikdən isə biz deyirlər ki, “sizin xəbəriniz yoxdur, Bolonya sistemi belə tələb edir”. İndiki informasiya əsrində əsl Bolonya sisteminin xarici universitetlərdə müxtəlif ixtisaslar üçün tətbiq edilən tədris planlarını tapmaq heç də çətin deyil. Bundan əvvəl 2012-ci ilin bakalavr səviyyəsi üçün İXTİSASLAR NOMENKLATURASI və TƏDRİS PLANLARI əsasında işləyirdik. 2019-2020-ci illərdə isə Təhsil Nazirliyi komissiya yaratdı ki, guya bunları yeniləşdirib, daha da “müasirləşdirəcək”, Bolonya sisteminə yaxınlaşdıracaqlar. Texniki ixtisaslar üzrə nazirliyin komissiyasına ADNSU-nin rektoru Mustafa Babanlı sədr təyin edildi. Nazirlik tərəfindən isə bu məsələni Elm və Təhsil Nazirliyinin Aparat rəhbərinin müavini Yaqub Piriyev kurasiya edirdi və faktiki olaraq, Azərbaycanda texniki təhsilin gələcəyini bu iki adam müəyyənləşdirirdi. Qeyd edək ki, Yaqub Piriyev ixtisasca yol tikintisi mühəndisi, Mustafa Babanlı isə metallurqdur. Onlar bütün texniki ixtisaslar haqqında necə qərar qəbul edə bilərlər axı? Komissiyanın tərkibində müxtəlif texniki yönümlü universitetlərin nümayəndələri iştirak etsələr də, heç kimə məhəl qoymadan elə özlərinin ilkin hazırladıqları variantı təsdiq etdirdilər. Məsələn, əvvəlki texniki ixtisaslar nomenklaturasında ayrılıqda “İstilik energetikası mühəndisliyi” və “Elektroenergetika mühəndisliyi” ixtisasları var idi. İndi isə bu ixtisaslar bir “Energetika mühəndisliyi” ixtisasında birləşdirilib. Digər ixtisaslar da bunun kimi. Y.Piriyev və M.Babanlı başa düşmürlər ki, istilik energetikası və elektrik energetikası tamamilə müxtəlif sahələrdir və 3 il yarım, həftədə 22 saat (bunun da yarısı humanitar fənlər və qeyri-ixtisas fənləridir) tədris alan tələbə necə həm istilik energetikası, həm də elektrik energetikası mühəndisi ola bilər? Onlar bunu başa düşmürlər, yoxsa başa düşərək qəsdən edirlər? Və kim respublikanın bütün texniki təmayüllü universitetlərinin əvəzinə bu iki nəfərə belə strateji əhəmiyyətli məsələdə özbaşına qərar qəbul etmək səlahiyyəti verib? Deyə bilərsiniz ki, bəs komissiya yaradılıb. Bizdə təəccüblü deyil ki, komissiya-zad formallıq üçündür, qərarı sədr və ondan da yuxarılar qəbul edir. Digər texniki ixtisaslar da bunun kimi təhrif edilib və eybəcərləşdirilib. Yenə təkrar edirik ki, texniki mütəxəssislərin hazırlanması, xüsusən müasir mürəkkəb siyasi dövrdə ölkəmiz üçün strateji, həyati əhəmiyyətli məsələdir.
Bu məsələlər təsadüflərin, məsuliyyətsizliyin, qeyri-professionallığın nəticəsidir, yoxsa düşmən qüvvələrin, keçmiş imperiyanın 5-ci kolonunun qəsdən törədilən təxribatıdır? Bu suala müəyyən qədər cavab tapmaq üçün 5-ci kolonun Elm və Təhsil Nazirliyində bizə məlum olan bir izini göstərək. Ramiz Mehdiyevin komandasının fəal üzvlərindən biri olan, Milli Məclisin yaxın keçmişdə çox populyar deputatı Rəbiyyət Aslanovanın o vaxtlar Prezident Administrasiyasında Siyasi təhlil və informasiya təminatı şöbəsinin müdiri vəzifəsini tutan oğlu Elnur Aslanov Elm və Təhsil Nazirliyinin Aparat rəhbərinin müavini Yaqub Piriyevin qohumu – bacanağıdır və Y.Piriyev o vaxtlar həmin vəzifəyə Elnur Aslanovun proteksiyası ilə təyin olunub. Ondan əvvəl Y.Piriyev Azərbaycan Memarlıq və İnşaat Universitetində dekan işləyirdi.
Qayıdaq yenə Bolonya sisteminə. Ölkəmizin ali təhsil sistemi 2005-ci ildə Bolonya sisteminə keçəndə Təhsil Nazirliyindən ali məktəblərə deyirdilər ki, bu hələ əsl Bolonya sistemi deyil, onun müəyyən keçid formasıdır. Deyirdilər ki, mövcud təhsil sistemindən Bolonya sisteminə – kredit sisteminə birdəfəlik keçmək mümkün deyil, çünki, bizim mövcud sistem çox fərqlidir, bizdə humanitar fənlər var və s. Deyirdilər ki, hər 4-5 ildən bir sistem yeniləşdirilərək, reforma edilərək, tədricən Bolonya sisteminə çatacağıq. Keçən dövrdəki reallıq isə bunun tam əksini göstərdi. Hər dəfə “islahatlardan” sonra görürük ki, biz Bolonya sistemindən daha da uzaqlaşırıq və bizə də deyirlər ki, “siz bilmirsiniz, Bolonya sistemi belədir”. Biz niyə bilmirik ki, indiki informasiya texnologiyaları dövründə istənilən məsələ haqqında dərhal informasiya əldə etmək mümkündür və biz də bunu edirik. Görürük ki, real Bolonya sistemində bizim əvvəlki nomenklaturada olan texniki ixtisaslar da qalır, həftəlik dərs saatı da 22 saat deyil, hətta 28-30 saat da var, kurs işləri, kurs layihələri də var, yekun buraxılış işi layihəsi isə texniki ixtisaslar üçün var və ümumu qəbul edilmiş bir şeydir. Amma xaricdəki Bolonya sistemində humanitar fənlər yoxdur! Deməli, 2005-ci ildən bizim ali texniki təhsilimizin başında dayananlar ölkəmizin texniki təhsilini tamamilə əks istiqamətdə aparırlar və aparmaqda da davam edirlər".
DAVAMI VAR...
İddia olunanlarla bağlı dia-az.life olaraq bütün maraqlı tərəfləri dinləməyə hazırıq...
Geri qayıt