Daha bir oliqarx hədəfdə: İcraçı Kredit Agentliyin rəhbəri Arif Əliyevlə bağlı ilginc iddialar
22-05-2015, 08:24
DİA.AZ: - “İcraçı Kredit Agentliyin rəhbəri Arif Əliyev kredit təşkilatlarının rəhbərləri ilə əlbir olaraq Dünya Bankından ayrılan milyonlarla dollar vəsaitləri mənimsəməklə məşğul olub və bu failiyyətini bu gün də davam etdirir”. Bu ittiham DİA.AZ-a göndərilən bir məqalədə yer alıb.
Xəbər müəllifinin dia-az.life-ın elektron ünvanına yolladığı məqalədə daha sonra deyilir: “O, yaxın ətrafına məxsus ayrı-ayrı şəxslərin adına kənd təsərrüfatı və sahibkarlığın inkşafı adı altında bir neçə milyon dollar kredit götürərək bu vəsaiti özünün başqa biznesinə istifadə edib. Bu əməliyyatların bir çoxunun Salyan rayonunda həyata keçirir.
“İcraçı Kredit Agentliyi”nin rayonlarda fəaliyyət göstərən kredit təşkilatlarına ayrılan vəsaitlərdə Arif Əliyevin və Kənd Təsərrüfatı Nazirliyinin nəzdində fəaliyyət göstərən “Kənd Təsərrüfatı Kreditlər Üzrə Dövlət Agentliyi”nin sabiq baş direktoru Razim Vəliyevin də “faizi” var.
Adı çəkilən Bank Olmayan Kredit Təşkilatı - İKA məhz Kənd Kreditləşməsi Layihəsi üçün yaradılmış təşkilatdır və uzun illər onun təsisçisi “Azərbaycan Kredit İttifaqları Assosiasiyası” İctimai Birliyi (AKİA) olmuşdur. Lakin Arif Əliyev Assosiasiyanın İdarə Heyətinin Sədri Ayaz Quliyevlə əlbir olaraq qeyri-qanuni yollarla Bank Olmayan Kredit Təşkilatı - İKA-nı öz adına və ona yaxın olan adamların adına özəlləşdirməyə nail olmuşdur. İKA-nın qeyri-adi özəlləşdirmə strategiyası ondan ibarətdir ki, İKA-nın nizamnamə kapitalındakı payını azaldaraq Arif Əliyev başda olmaqla kənardan naməlum fiziki şəxslər və kredit ittifaqları bu təşkilatın yeni təsisçiləri kimi AR-nın Vergilər Nazirliyində rəsmi olaraq qeydiyyatdan keçirtməyə nail olmuşdur. Hal-hazırda dövlət zamanəti ilə Dünya Bankından alınan 18,8 milyon ABŞ Dollarını “özünün özəl təşkilatı”-nın vəsaiti kimi istifadə edir və Dövlətin büdcəsinə qaytarmağa tələsmir.
Onu da qeyd etmək istərdim ki, bu vəsaitin ölkəmizə gətirilməsi və İKA vasitəsilə Kİ-lərə paylanılması müvafiq Hökumət qurumu və Dünya Bankı tərəfindən İKA-nın təsisçisinin tam olaraq İctimai Birlik, yəni AKİA-nın olması təqdirində razılaşdırılmışdır. Yəni İKA-da 18,8 milyon ABŞ dolları vəsaitinin dövriyyəsindən əldə olunan mənfəət heç bir fiziki şəxsin marağı olmadan ilin sonu nizamnamə kapitalına əlavə olunmalı və Layihə bitdikdən sonra Dövlət Büdcəsinə ötürülməli idi.
Arif Əliyev, mütəmadi olaraq Kredit İttifaqlarının sədrlərini öz otağında toplayaraq onları bu strategiyanı həyata keçirməyə məcbur edir və əks halda onları kreditdən məhrum etməklə hədələyirdi. Absurd odur ki, kredit ittifaqları Assosiyanın üzvü olmalarına baxmayaraq, Kİ Sədrlərindən pul yığmaqla onları ikitərəfli təsisçi etmələri heç bir məntiqə sığmır. Həmçinin Dövlət Layihəsini icra edən və kapitalı dövlət vəsaitindən ibarət olan təşkilatın naməlum fiziki şəxslər tərəfindən özəlləşdirilməsi də bir daha Dünya Bankının vəsaitinin mənimsənilməsi analoqu olmayan rüşvət mexanizmidir. Paradoks ondan ibarətdir ki, Layihə çərçivəsində kəndlli fermerlər və kiçik sahibkarlar Kredit İttifaqları (Kİ) vasitəsilə aldıqları kredit vəsaitlərindən istifadə edərək öz güzəranlarını yaxşılaşdırmalı idilər. Dövlətə çatası olan mənfəət müxtəlif təsisçilərin adıyla özəlləşdirilərək Arif Əliyev və ona himayədar olan şəxsə çatdırılırdı. Bunun həyata keçirilməsində Kənd Təsərrüfatı Kreditləri üzrə Dövlət Agentliyinin keçmiş Baş Direktoru və hal-hazırda Maliyyə Nazirliyində Dövlət Borcunun İdarə Edilməsi Agentliyinin direktoru vəzifəsində çalışan Razim Vəliyevdir”.
Daha sonra mənbə dia-az.life-a yazır: “Beləliklə Arif Əliyev İKA-nı məhz özünə qulluq etmək üçün İKA-nı özəlləşdirərək Kredit İttifaqları və İKA-nı talamaqda davam edir. Hələ 1999-cu ildə Kredit İttifaqları ulu öndər mərhum Prezidentimiz Heydər Əliyevin qərarı və dəstəyi ilə yaradılmışdırlar və onların əsas məqsədi dünyanın bütün ölkələrindəki kimi beynəlxalq prinsiplərə əsaslanaraq yoxsul təbəqənin həyat tərzini yaxşılaşdırmaqdan ibarətdir. Lakin Arif Əliyev bu kimi açıq-aydın cinayətlə Dünya Bankı tərəfindən ayrılan vəsaitin “özəlləşdirməsi”ni sabotaj -yəni xalqın hökumətə qarşı çıxması kimi adlandırmaq olar. Bu da ölkəmizin imicini beynəlxalq səviyyədə gözdən salır, kredit ittifaqlarını müflis edir. Nəticədə ötən il Dünya Bankı ilə imzalanan sazişə əsasən yeni kredit xətti ayırılanda Dünya Bankının nümayənədələri Kredit ittifaqlarının vasitəsilə işləməyi qəti şəkildə imtina etmişdirlər.
İKA utanmadan öz strategiyasında 2015-ci ildə beynəlxalq donor təşkilatları ilə əməkdaşlıqdan bəhs edir. Bunlar hansı əməkdaşlıqdan bəhs edirlər? Halbuki, dünyanın ən böyük donor təşkilatı olan Dünya Bankı üç ildən çoxdur ki, bunlardan üz döndərmiş, layihənin saxlanmasını tələb etmiş və hətta onların çirkin əməllərindən Azərbaycanın rəsmi dairələrinə şikayət edərək tədbir görməyi tövsiyyə etmişdir. Belə ki, İKA Dünya Bankından alınan kreditləri tam büdcəyə geri qaytarmadan özlərinin gəlir əldə etməsi üçün istifadə edir, gələcəkdə isə bu borc hökumətin üzərində qalaraq Azərbaycan xalqı tərəfindən ödənilməlidir.
Ümumiyyətlə dövlətin büdcəsini talayan, beynəlxalq təşkilatlar qarşısında ölkəmizin nüfuzunu aşağı salan, kasıb fermerləri ölkədən didərgin salan, Ulu Öndərimiz Heydər Əliyevin təşəbbüsü ilə yaradılan Kredit İttifaqlarını və bu gün onlara Prezident İlham Əliyevin dəstəyi ilə ölkənin müxtəlif layihələrinə cəlb olunan həmin Kredit İttifaqlarını müflis edən Arif Əliyev və onunla əlbir olan saxta yolla Azərbaycan Kredit İttifaqları Assosiasiyasının İdarə Heyətinin Sədri vəzifəsinə seçilən Ayaz Quliyev bu əməlləri ilə kimə nə demək istəyir? Xalqamı, yoxsa dövlət rəsmilərinəmi meydan oxuyurlar? Arif Əliyev “Aşıxlı”, “Tərəkəmə”, “Yüzbaşlı-2”, , “Aran”, “Ləman”, “Masallı”, “Hindarx” kredit ittifaqlarının və digərlərinin adı ilə təşkilatdan külli miqdarda pullar çıxarıb və onlara az miqdarda kredit göndərir.
Salyan rayonunun Alçalı, Bəydili, Arbatan, Ərəbqardaşbəyli, Qızılağac və Salyan şəhərinin 19 nəfər sakinin əmlakı satışa çıxarılıb. Göstərilən vətəndaşların böyük əksəriyyəti əslən salyanlı olan İçraçı Kredit Agentliyinin rəhbəri Arif Əliyevin qohumları və ona yaxın olan şəxslərdir. Məhkəmə qərarları faktiki olaraq formal xarakter daşıyır. Çünki mülkləri satışa çıxarılan sakinlərin hamısı həmin evlərdə bu gündə yaşayır və biznes sahələrindən istifadə edirlər. İKA-nın regional nümayəndəsi, Arif Əliyevin yaxın qohumu Vaqif Islamov «ümidsiz kreditlər» sayəsində milyonerə çevrilib və onun bütün maliyyə maxinasiyalarında yaxın dostu «Dollar» Rüstəm olaraq tanınan məşhur sələmçi iştirak edir. Faktiki olaraq İKA-nın yüz minlərlə manat vəsaiti sələmçilər tərəfindən dövriyyəyə buraxılır və Vaqif Islamov bu biznesdən böyük gəlirlər əldə edirlər və bu kreditlərin isə, Arif Əliyevin şəxsi pulu olduğu deyilir.
Bildirək ki, “İcraçı Kredit Agentliyi” Azərbaycan höküməti ilə Dünya Bankı arasında imzalanmış Kredit sazişinə müvafiq olaraq həyata keçirilmiş “Kənd Təsərrüfatının İnkişafı və Kreditləşdirilməsi” Layihəsinin Kənd Yerlərnin Maliyyələşdirilməsi komponentinin icra edilməsi çərçivəsində 2002-ci ildə yaradılıb. Layihəninin əsas məqsədi Kənd təsərrüfatı sahəsində çalışan fiziki və hüquqi şəxslərə xidmət göstərmək, Kredit İttifaqlarının və borcalanlar qrupunun yaradılmasına, inkişaf etməsinə köməklik etmək və onlara kreditlərin verilməsini təmin etmək olub”.
Bütün bu iddialarla bağlı dia-az.life olaraq qarşı tərəfin də mövqeyini işıqlandırmağa hazırıq... Mövzu diqqətimizdədir...
Geri qayıt