Mikayıl Cabbarova daha bir "8-ci sinif şilləsi"...
29-09-2015, 08:07
DİA.AZ: - Son günlər hazırda istifadədə olan yeni 8-ci sinif Azərbaycan dili dərsliyinin 126-cı səhifəsində çap olunmuş küçə danışıq tərzi ilə bağlı çox söz-söhbətlər gedir. Bununla bağlı DİA.AZ-a daha bir müraciət daxil olub. Bir qrup yaşlı nəsil Azərbaycan dili və ədəbiyyat müəllimləri bu məsələ ilə bağlı Təhsil naziri Mikayıl Cabbarova açıq məktub ünvanlayıb. dia-az.life olaraq həmin məktubu olduğu kimi təqdim edirik:
"AZƏRBAYCAN RESPUBLİKASI TƏHSİL NAZİRİ CƏNAB MİKAYIL CABBAROVA
BİR QRUP AZƏRBAYCAN DİLİ VƏ ƏDƏBİYYAT MÜƏLLİMİ TƏRƏFİNDƏN
AÇIQ MƏKTUB
Hörmətli Mikayıl müəllim!
Biz, bir qrup Azərbaycan dili və ədəbiyyat müəllimi sizə müraciət etməyi özümüzə borc bildik. Bu il istifadəyə verilmiş 8-ci sinif Azərbaycan dili dərsliyinin 126-cı səhifəsində 12-ci çalışmada şagirdlərə iki mətni müqayisə etmək tapşırılır. Onlardan biri dilimizə və adət-ənənələrimizə zidd ifadə tərzi ilə yazılmış mətndir.
Biz müəllimlik fəaliyyətimizdə şagirdlərimizi kitabda məlum tapşırıqda yazılmış danışıq tərzindən (soldakı mətn) daim uzaqlaşdırmağa çalışmışıq. Çünki, bizim amalımız doğma dilimizin təmizliyini qorumaqdır. Fikrimizcə, dərslik çap olunana qədər ciddi yoxlanılmış və dərindən təhlil edilmiş yeganə tədris ədəbiyyatı olduğundan, orada yalnız və yalnız nümunəvi mətnlərdən istifadə edilməli idi.
Aramızda ömrünü-gününü doğma dilimizin tədrisinə, onun şəffaflığına və təmizliyinə həsr etmiş qocaman müəllimələr də vardır. Onların da adında sual veririk:
– Biz bu mətni necə oxuyaq, yaxud şagirdlərin oxuması zamanı necə qulaq asaq, necə reaksiya verək? Biz – ağbirçək müəllimələr bunu özümüzə necə sığışdıraq? Budurmu yenilik?
– Əgər biz şagirdlərə desək ki, “küçədə siz bu sözləri onsuz da eşidirsiniz”, onda dilimizin doğurdan da belə aşağı səviyyəyə düşdüyünü etiraf etmiş olmuruqmu?
– Axı biz hər dəfə bu cür bayağı danışıq tərzini eşidərkən məktəbdə, küçədə, evdə daim təbliğ etmişik ki, özünə hörmət edən heç bir Azərbaycanlı bu tərzdə danışmamalıdır. İndi biz onu dərsliyə daxil etməklə bu cür danışıq tərzini təsdiqləmiş olmuruqmu?
– Məktəbin əsas vəzifələrindən biri də onun tərbiyə ocağı olmasıdır. Biz Azərbaycan dili dərslərində bu cür küçə danışıq tərzi ilə şagirdlərimizə hansı tərbiyəni vermiş olacağıq?
Hörmətli Mikayıl müəllim!
Bizim heç bir qaranlıq məqsədlərimiz yoxdur. Adlarımızın açıq yazılmamasının səbəbini isə, fikrimizcə, özünüz gözəl başa düşürsünüz. Biz müəllimlərin əsas məqsədi Azərbaycanın gələcəyi olan övladlarımıza Ana dilimizi sevdirmək, ondan məharətlə istifadə etməkdən daim zövq almağı və şərəf duymağı tərbiyə etməkdir. Düşünürük ki, bu işdə Sizin və bizim məqsədlərimiz tamamilə üst-üstə düşür.
Cənab Təhsil Naziri!
Yuxarıda qeyd edilənləri nəzərə alaraq Sizdən artıq dərəcədə xahiş edirik ki, daxili əmrinizlə hazırda istifadədə olan 8-ci sinif Azərbaycan dili dərsliyinin 126-cı səhifəsinin kitabdan çıxarılmasına icazə verəsiniz. Bu səhifənin kitabdan kənarlaşdırılması hələ 4 il istifadə olunacaq bu dərsliyin balalarımızın tərbiyəsinə göstərə biləcək mənfi təsirinin qarşısını alardı.
Hörmətli Mikayıl müəllim!
Xahişimizə anlaşıqlı yanaşacağınıza ümid edirik və Sizi təhsilimizin keyfiyyəti uğrunda daim birgə fəaliyyət göstərəcəyimizə əmin edirik.
Hörmətlə,
bir qrup Azərbaycan dili və ədəbiyyat müəllimi"
dia-az.life olaraq bütün maraqlı tərəfləri dinləməyə hazırıq...
Geri qayıt