Xalqın arvadı olan müğənnilər, səmimi Röya, Elzaya üç "maddə"
11-03-2015, 09:02
Milli.Az jurnalist İntiqam Valehoğlunun müəllif layihəsi olan “Həftəbecər”i təqdim edir.
Yadınızdadırsa, ötən həftə sizə söz vermişdim ki, növbəti - 21-ci “Həftəbecər” daha maraqlı olacaq. Amma gedişat sizə söz verdiyimdən də fərqli oldu.
Ötən həftə Nazənin-Təranə “döyüşünün” növbəti raundu baş tutdu. Rəqiblərdən biri digərinin sekundantını nokdauna göndərsə də, nokaut baş vermədi. İndi keçək şou-biznes “dilində” izaha. Nazəninin prodüseri Pərviz Abbasov məclislərin birində Musa Musayevə yumruq atmışdı. Elə hər şey də o yumruqdan sonra qızışdı və polis prodüseri çəkiliş meydançasından birbaşa bölməyə apardı. Musa Musayev də jurnalistlərə bildirdi ki, nə olur-olsun, onu bağışlamayacağam. Elə xəbər təzəcə saytlarda “oç eləmişdi” ki, Pərviz çıxıb açıqlama verdi ki, polisdən qaçmayıb, sadəcə, işi olduğu üçün gedə bilmirmiş. Axırda da əlavə edib ki, hər şey qaydasındadır, mənim adımdan yalan xəbər yayıb, şou yaratmasınlar. Növbəti seriyanı səbirsizliklə gözləyirəm...
Müğənni Afaq Aslanla bağlı xəbər isə daha maraqlıdır. Xanım sənətçi ana olmaq istəyir, amma... Sitatı oxuyun, sonra deyəcəklərim olacaq:
“Mən də əksər qadınlar kimi ana omaq istəyirəm. Amma istəmirəm ki, uşağımın atası olsun. Bəlkə də, bu açıqlamam bir çoxlarına qəribə gələcək. Amma bu, mənim seçimimdir. Kimsə mənim həyatıma, seçimlərimə qarışa bilməz. Bu günə qədər kişilərdən o qədər etibarsızlıq görmüşəm ki, ona görə də istəyirəm ki, uşağımın atası olmasın. Yəni süni mayalanma ilə uşaq dünyaya gətirəcəm. Həyatımı hər hansı kişiyə bağlayıb, əsəblərimi korlamaq istəmirəm. Mən uşağıma həm ata, həm də ana olacam. Ona atasızlıq nə olduğunu yaşatmayacam. Cəmiyyətdə o qədər ailələr var ki, ailə qururlar, daha sonra kişi tamamilə dəyişir. Nəticədə də boşanırlar, uşaq da atası ilə qalır. Düşünürəm ki, bu addımımla pis nəsə etmirəm. Bir çox dünya ulduzları da süni mayalanma ilə övlad dünyaya gətiriblər.
2009-ci ildə ailə qursam da, 2011-ci ildə boşandım. Normal ailə qurub, gəlin köçmüşdüm. Evdar xanım idim. Lakin mən yoldaşımdan hamilə olan zaman o mənə xəyanət etdi. Beləcə də mən uşağı tələf etdirdim, boşandıq. İndi heç kimsədən asılı deyiləm. Həyatımı yaşayıram”.
Başa düşürəm, bir az qəliz söhbət oldu. Elə mən də bu sitatı oxuya-oxuya nə yazacağımı düşünürdüm. Sitatdan əvvəl verdiyim sözə görə də üzrlü sayın, çünki matım-qutum quruyub…
Əməkdar artist Elza Seyidcahan isə “Bu şəhərdə” komandasını məhkəməyə verəcək. Dediyinə inansaq, buna səbəb aktyorların onu parodiya etməsidir. Seyidcahan ardınca əlavə edib ki, Azərbaycanın ən varlı aktyorları məhz Rəfael İsgəndərov və Coşqun Rəhimovdur. Elə buna görə də onlardan yüz min istəyəcək. Komandanın prodüseri Müşviq Abbasov isə əməkdar artistə dəyərli məsləhət verib. Deyib ki, sənətçi məhkəmədə təzminatı avroyla tələb etsin. İndiyə kimi “Bu şəhərdə” komandasının heç bir üzvüylə nəinki müsahibəm, heç ünsiyyətim də olmayıb. Amma Seyidcahanla bir dəfə eyni verilişdə qonaq olmuşuq. Bunu ona görə qeyd edirəm ki, növbəti fikirlərim sizdə qərəz təəssüratı yaratmasın. Məncə, Yazıçılar Birliyi, xalq şairləri, eləcə də digər qələm adamları tezliklə Elza Seyidcahanı məhkəməyə verməlidirlər. Birincisi, o, həftədə ən azı iki dəfə şairləri parodiya edir, guya şeirlər yazır. İkincisi, yazdığı azmış kimi həmin şeirləri bəzi jurnalistlərə göndərir ki, dərc etsinlər… Üçüncüsü olmasa da olar. Çünki bu iki “maddə” təzminat üçün yetərlidir.
Əməkdar artist Lalə Məmmədovanın keçmiş həyat yoldaşı İlham Qafarovun bu açıqlamasını oxuyandan sonra doğrudan da çox pis oldum. İki uşağının anası, on ilə yaxın müddətdə bir yastığa baş qoyduğun qadın barədə “mən onu öz evimdən qovmuşam” ifadəsini işlətmək… söz tapmadım. Ayıbdır! Amma bu arada şou-biznesdə daha bir yenilik kəşf etmişəm. Sən demə, prodüserlər həm də çalışdıqları müğənnilərin şəxsi həyatlarına bilavasitə cavahdeh imişlər. İnanmırsınızsa, Lalə Məmmədovanın prodüseri Vəfa Nuriyevanın İlham Qafarov haqda verdiyi açıqlamanı oxuyun:
“Bütün şəhər bilir ki, o, alfonsdur. Lalə xanım son vaxtlar keçmiş həyat yoldaşının adını heç yerdə çəkmir. O niyə ad çəkir? Özünü reklam etmək istəyir? Deyir ki, alfons deyiləm. Neçənci ildə harada işləyib? Mən hər şeyi gözəl bilirəm. Üç-dörd aydır, aliment vermir, gətirib alimenti versin. İlham pul qazanırdı ki, 43 min manata ev alsın? Hamısı Lalənin pulları idi. İndi də pul qazansın, gedib nə gündə yaşadığına baxın. Lalə çox qeyrətli, namuslu, şərəfli xanımdır. Bu günə kimi əri çox şey etsə də, Lalə heç nə etməyib. Heç kim deyə bilməz ki, Lalənin üzərində hansısa damğa var. İndiki dövrdə şou-biznesdə təmiz adı saxlamaq hər qadının işi deyil. İlhamın isə necə arvadbaz, içki düşkünü olduğunu mən yaxşı bilirəm”.
Məncə, digər prodüserlər də bu açıqlamadan örnək götürməlidirlər. Yoxsa Pərviz Abbasov kimi? Hörmətli Abbasov, elə bilirsiniz, özünüzdən 20 yaş böyük olan Musa Musayevə yumruq atmaqla qəhrəmanlıq etmisiniz? Görün necə prodüserlər var e. Müğənninin keçmiş ərinin arvadbaz olduğunu da bilir. Zəhmət olmasa, gözünüzə su verin. Su olmasa, meyvə şirəsi də məsləhətdir.
Müğənni Röya Ayxan. Dinləyicisiyəm, lakin pərəstişkarı deyiləm. İndiyə kimi dəfələrlə tənqid etmişəm. Amma bu dəfə verdiyi açıqlama bu xanımın səmimiyyətin zirvəsində olduğunu göstərdi. Sitatı şərhsiz təqdim edirəm:
“İncəsənət adamları artıq öyrəşiblər yalandan efirdə namus-qeyrətdən danışmağa... Gedib yeniyetmə qızları, nəvələri ilə məşğul olsunlar. Mənim hay-hayım getdi. Məni alan aldı, satan satdı. Məni bundan sonra almayacaqsınız ki?! Məni neyləyəcəksiniz ki? Dinləyin, kef edin. Mən bundan sonra necə varam, elə də yaşayacağam. Bundan sonra haqqımda danışanların hamısını qoyacağam ortalığa. Məgər hansısa kişinin sevgilisi olmur? Yoxsa ki, sevgilisinin rəfiqələri olmur? Ona görə də barmaq uzatmayın, yandırar”.
Elə buna bənzər daha bir açıqlamanı Nadir Qafarzadə verib. Deyib ki, ömrü boyu müğənni xanımla evlənmərən, nə də oğlumu qoymaram müğənni xanımla evlənsin:
“Heç kim məndən küsməsin, inciməsin! Yenə də deyirəm, birmənalı olaraq müğənni xanımla evlənmərəm. Sənət aləmində belə bir əhvalat danışılır. Hüseyn Arif xanım sənətçilərdən birinə zəng vurur ki, filan rayonda toy var, gəl gedək. Həmin müğənni “ərim rayona toya qoymur” deyəndə şair ona belə cavab verir: “Sənin ərin xalqdır”. Düz də deyib. Müğənni arvad tək mənə məxsus olmayacaq. Arvad gedib gecə yarıya qədər toylarda oxuyub pul qazanacaq, mən də evdə oturub onu gözləyəcəm. Sonra da 100 minlik maşın sürüb genələcəm”?
Bahoo, mən elə bilirdim “xalqın arvadı” termini təkcə bizim sahədədir. Sənət aləmində də varmış ki. Qulaq gündə bir söz eşitməsə kar olar, ay toba...
Müğənni Günay İbrahimli sevgilisindən ayrılıb. Bu münasibətlə gənc sənətçimizə səbr diləyir, möhkəm olmasını arzu edirik. Necə deyərlər, kişinin başına iş gələr.
Gündəmin əvəzolunmaz isimlərindən Rəqsanə İsmayılovanın açıqlaması isə Röya və Nadirin dediklərinə dəstək xarakteri daşıyır. Elə onun söhbətində Röyanın da adı keçib. Sənətçi geyiminin Röyanın libasına bənzədilməyi ilə razılaşmayıb və bildirib ki, iki il öncə həmin paltarda fotosessiya etdirib. Məsələnin ən ləzzətli yeri isə burasıdır. Oxuyaq:
“Açıq-saçıq geyinirəm, əcəb edirəm. Hələ bir həftə sonra daha qısa libasla efirə çıxacam. Mənə belə xoşdur”.
Bax hirsləndirəcəksiniz, sabah efirə ondan da betər geyimdə çıxacaq. Sizə lazım idi? Hələ iş bununla bitmir, gəlirik kulminasiyaya:
“Bəzi müğənnilər var ki, başqa adlarla ürəklərindəki kinli sözləri boşaldırlar. Mən onlar kimi kiminsə ərini əlindən almıram. Televiziyada başqa cildə girmirəm. Kiminləsə sevgilidirlər, başqasının əri ilə gəzirlər. Amma efirə çıxanda özlərini mələk kimi göstərirlər. Şou-biznesdəkilərin davası həmişə kişi üstündə olub. Biri onun sponsorunu əlindən alır, digəri başqasının. Mən nə sevgilim, nə də ərim olanda bunu gizlətmişəm”.
Xarici ölkələrdə sənətçilər, məşhur simalar adətən sosial aksiyalarda iştirak edirlər, bildiklərini, necə deyərlər, qara camaatla paylaşırlar. Hərçənd ki, xarici ölkələrin qara camaat dediyimiz toplumu bizim məşhurlardan daha geniş düşüncəlidir. Aparıcı Lalə Əlimuxtarovanın sürücülüklə bağlı açıqlamasını diqqətlə oxuyun. Adam özü etdiyi qanun pozuntusunun təbliğatıyla məşğuldur:
“Kişilərin 70 faizindən yaxşı sürücüyəm. Bunu məni tanıyanlar da təsdiqləyərlər. 2008-ci ildən maşın idarə edirəm. Qaydaları çox pozuram... Amma yüngül olur, vəsiqəmə bal düşmür. Kəmər taxmıram, ürəyim sıxılır. Şəhərin içində onsuz da sürət 50-dən yuxarı olmur. Rayonlara gedəndə məcbur taxıram”.
Geri qayıt