Fazil Məmmədovun dövründəki maxinasiyalar aşkarlanıb
8-06-2018, 09:40
DİA.AZ: - 17 il Vergilər Nazirliyinə rəhbərlik etmiş Fazil Məmmədovun “Qolfstrim” markalı təyyarəsi “AtaBank”dan götürdüyü milyonlarla manat kreditlə əvəzləşdirilib. Bu haqda yayılan son məlumatlar yeni deyil.
İlin əvvəlində sabiq nazirə məxsus təyyarənin əlindən alınacağı haqda xəbərlər vardı. Bu təyyarə bir vaxtlar Fazil Məmmədovun nəzarət etdiyi “AtaBank”dan ona verilən milyonlarla manat dəyərindəki kredit qarşılığında girov qoyulmuşdu. Nazir olduğu vaxt krediti vaxtında ödəyən Fazil Məmmədov işdən çıxarıldıqdan sonra ödənişləri etməyib. Bu səbəbdən də şəxsi təyyarəsi əlindən alınıb. Bildirək ki, hazırda “AtaBank”ın İdarə Heyətinin sədri Fazil Məmmədovun bacısı oğlu Dəyanət Quliyevdir. Sabiq nazirin təyyarəsinin 20-30 milyon manat dəyərində olduğu bildirilir.
F.Məmmədov ötən il dekabrın 5-də prezident İlham Əliyevin sərəncamı ilə vergilər naziri vəzifəsindən azad edilib. O, vəzifəsindən çıxarılmazdan əvvəl belə xəbərlər yayılmışdı ki, F.Məmmədov özünü diplomatiya sahəsində sınamaq istəyir. Bildirilirdi ki, o, keçmiş sovet respublikalarından birinə səfir göndərilməsinə nail olmaq üçün hərəkətə keçib. Və bununla bağlı hətta “yuxarılara” xahiş də edib. Vəzifədən çıxarılandan dərhal sonra bu mövzu aktuallaşdı.
Həmin ərəfədə ölkəmizin Tacikistandakı səfirinin geri çağırılması F.Məmmədovun arzusunun gerçəkləşə biləcəyi yönündə iddiaları artırmışdı. O da qeyd olunurdu ki, əgər Fazil Məmmədovun işdən çıxarılması hansısa qəzəbin təzahürü deyilsə, sadəcə, 17 illik naziri yenisi ilə əvəzləmək istəyindən irəli gəlibsə, o zaman sabiq nazirin səfir istəyi reallaşa bilər. Amma iqtidar bu yöndə Fazil Məmmədovun ətrafının apardığı spekulyasiyanın qarşını alan addım atdı. Tacikistan Respublikasına fövqəladə və səlahiyyətli səfir təyin olundu. Hazırda Fazil Məmmədovun taleyi ilə bağlı müəmma davam etsə də, böyük ehtimalla o da sabiq nəzliyyat naziri Ziya Məmmədov kimi komandadan birdəfəlik uzaqlaşdırılanlar sırasında yer alıb. Onun işdən qovulmasında böyük pul oğurluğunun əsas rol aldığı iddia olunur.
Bu iddia hələ də təkzib olunmayıb. Söhbət ölkədən çıxarılan 4 milyard 500 milyon manat “qara pul”dan gedir. İddialara görə, Fazil Məmmədov yaxın ətrafı üzərindən büdcəyə daxil edilməli pulları xaricdəki hesablara ötürüb. Gələn məlumatlara görə, Fazil Məmmədovun vergi şəklində yığılaraq müxtəlif gizli hesablara yönləndirilən pullar geri qaytarılmasa, onun və yaxın ətrafının həbsi gerçəkləşə bilər. Bu xüsusda Hafiz Hacıyevin Fazil Məmmədovun 4-5 milyard dollar sərvəti olması haqda fikirlərini sıradan sözlər hesab etmək olmaz. Onun sözlərinə görə, araşdırma aparmaq lazımdır ki, bu qədər pulu necə toplayıb.
Sitat: “Bu adamları elə-belə buraxmaq olmaz. Pullarını əllərindən almaq lazımdır. Yoxsa ölkəni qarışdırmaq üçün müxtəlif qüvvələrə pul paylayacaqlar”.
F.Məmmədov müalicə adı ilə ölkədən getmək niyyətində də bulunub. Lakin onun ölkədən çıxması münasib bilinməyib...
***
DİA.AZ-a daxil olan son informasiyalarda isə bildirilir ki, keçmiş Vergilər Naziri Fazil Məmmədovun dövrü ilə bağlı, daha doğrusu, keçmiş nazirin fəaliyyətilə əlaqədar hüquqi araşdırma aparıla bilər. Bu barədə məlumatı verən VN-dəki mənbə iddia edir ki, nazirliyin yeni rəhbərliyi Fazil Məmmədovun dpvrünə aid böyük maxinasiyaları aşkarlayıb.
"Əgər vəziyyət belədirsə, mütləq hüquqi araşdırma aparılacaq" deyən mənbə dia-az.life-a açıqlamasında əlavə edib ki, bu, Fazil Məmmədovun həbsi ilə də nəticələnə bilər. Yəni görünəni odur ki, Fazil Məmmədovun səfirlik məsələsi yox, həbsi belə gündəmə gətirilir.
dia-az.life olaraq bütün maraqlı tərəfləri dinləməyə hazırıq.
Geri qayıt