Keçmiş icra başçılarının revanşı
10-12-2019, 09:00
Bitməkdə olan 2019-cu ildə bir çox icra başçıları vəzifədən azad edildi. Aparılan struktur və kadr dəyişikliyi fonunda icra başçılarının bir qisminin yerləri dəyişdirilsə də, bəziləri vəzifələrindən tamamilə uzaqlaşdırıldı. Vəzifələrini itirən icra başçılarının rəhbər olduqları bölgələrin sakinləri onlardan narazılıq edirdi. İnsanlar bildirirdilər ki, icra başçısı onları qəbul etmir, problemlərini dinləmək istəmir.
Ölkə prezidentinin kadr islahatları fonunda korrupsiya və rüşvətdə adı hallanmayan gənclərin icra başçısı vəzifəsinə gətirilməsi halını da müşahidə edirik. Ekspertlər hesab edirlər ki, idarəçilikdə bu cür gənc və müasir inkişafla ayaqlaşa bilən gənclərin önə çəkilməsi həm vətəndaşlar, həm də dövlət üçün faydalıdır.
“Yeni Müsavat”a daxil olan məlumata görə, vəzifələrini itirən icra başçılarının bəziləri deputatlığa namizədlik vermək istəyirlər. Onlardan bəzilərinin hətta bunun üçün artıq hazırlıq işlərinə başladığı da bildirilir.
Öncə işsiz qalan sabiq icra başçılarını xatırladaq.
2007-ci ildən Ağsunun icra başçısı olan Ənvər Seyidəliyev də vəzifəsini itirdi. Ənvər Seyidəliyev sabiq əmək və əhalinin sosial müdafiəsi naziri Səlim Müslümovun dayısıdır.
2018-ci ilin dekabrında vəzifəsindən azad edilən Xəzər rayonunun icra hakimiyyəti başçısı Gülağa İslamov da işsizdir. O, 23 il idi ki, bu vəzifəni icra edirdi.
Ötən həftə prezidentin sərəncamı ilə Hacıqabulun icra başçısı Əhməd Muxtarov vəzifəsindən azad edilib. Rüstəm Gülabba oğlu Xəlilov Hacıqabul Rayon İcra Hakimiyyətinin başçısı təyin edilib. Qeyd edək ki, R. Xəlilov Milli Məclisin Regional məsələlər komitəsinin üzvü olub.
Həmçinin bu il oktyabrın 31-də prezident İlham Əliyev 2004-cü ildən Xaçmaza rəhbərlik edən Şəmsəddin Xanbabayevi tutduğu vəzifəsindən azad etdi. Noyabrın 12-də prezident İlham Əliyevin imzaladığı sərəncamlarla Lütvəli Babəli oğlu Babayev Zərdab Rayon İcra Hakimiyyətinin başçısı vəzifəsindən azad edildi. Bu şəxslərdən hansının deputatlığa namizəd olacağı isə hələ ki rəsmi olaraq məlum deyil.
“Yeni Müsavat”a danışan deputat Tahir Kərimli bildirib ki, hər yerindən duranın namizədlik irəli sürməsi yaxşı hal deyil: “ Konstitusiyada kimlərin deputat ola bilmələri və ya ola bilməmələri haqqında məqamlar aydın şəkildə qeyd edilib. Göstərilib ki, din xadimi olmayan, ağır cinayət törətməyən, 18 yaşı tamam olmuş şəxslər deputat ola bilərlər. Keçmiş məmurlar da əgər ağır cinayət törətməyiblərsə, deputat seçilmələri qanunla mümkündür. Bu adamlar təbii ki, namizədlik verə bilərlər. Ancaq işin mənəvi tərəfi də var. Əgər səni cənab prezident işdən kənarlaşdırıbsa, səndə nöqsan bilibsə və özünü də doğrultmamısansa, deputatlığa namizəd olmağın qəribə çıxır. Bu, eyni zamanda deputat statusuna da xələl gətirən haldır. Belə ki, əslində deputat ali qanunvericiliyin nümayəndəsidir. Yəni o, ali nümayəndədir. Təəssüf ki, hansısa bir yerli məmuru deputatdan üstün tutan hallar mövcuddur. Mətbuatda buna rast gəlirik. Paralellər aparan zaman biz baxırıq ki, hər zaman deputatlar aşağılanır. Məlum deyil ki, bu, deputatların özlərinin günahıdır, yoxsa cəmiyyət belədir. Yaxud da bəlkə də ayrı-ayrı insanlar hər kəsi gözdən salır. Ancaq bütün hallarda nəzərə almaq lazımdır ki, deputatlıq sadə bir şey deyil. Deputatlar dövlətin taleyini də yeri gələndə həll edirlər. Parlament son qərar yeridir. Dövlətin taleyi ilə bağlı ən mühüm məsələlər parlamentdə həll olunur. Ehtimal edirəm ki, cənab prezidentin vəzifədən azad etdiyi bəzi şəxslər deputat seçilə bilərlər. Yəqin ki, belə hallar da olacaq. Ancaq hər bir halda əgər bu şəxslər mənfi mənada uzaqlaşdırılıbsa, o zaman bir qədər düşünmək lazımdır. Hesab edirəm ki, bu insanlar özləri namizədlik irəli sürməli deyillər. Çünki bu, cəmiyyət tərəfindən müsbət qarşılanmayacaq”.
T.Kərimli son zamanlar sosial şəbəkələrdə əksər insanların deputatlığa namizəd olacaqlarını açıqlaması məqamına da toxunub: “Deputatlığı gözdən salmaq lazım deyil. Hər kəs deputat olmağı bu qədər asanmı bilir? Dövlət, millət üçün fayda vermək lazımdır. Parlament bir eksperiment yeri deyil ki, hər kəs özünün işləyə bilib-bilmədiyini yoxlasın. Arzu edərdim ki, heç kim deputatlıq yarışını ucuzlaşdırmasın. Yaşından asılı olmayaraq hər kəs bunu düşünməlidir. Onlar öz ictimai çəkilərinə diqqət edib, məsələyə ciddi yanaşmalıdırlar. Layiq olub-olmadıqlarını araşdırsınlar. Hər kəs nədənsə hesab edir ki, deputatlıq funksiyasını yerinə yetirə bilər. Bu, olduqca məsuliyyətli işdir. Burada təcrübə ilə gənc novatorluğun hansısa sintezini yaratmaq lazımdır. Hər kəs düşünməlidir ki, bu işin öhdəsindən necə gələ bilər. Çox tarixi qərarlar verilə bilər. Məsələn, ölkə ərazisində hərbi əməliyyatlarla bağlı qərar ola bilər. Həvəslə ”deputat olacam" deməklə deyil. Azərbaycana necə xeyir verməyi düşünmək lazımdır. Bu cür diletant yanaşmanı qəbul etmirəm".
“Yeni Müsavat”
Geri qayıt