Mahir Quliyevin Biləsuvardakı əməllərinə daha kimlər şəriklik edib?
5-05-2020, 09:55
Dövlət Təhlükəsizlik Xidməti əməkdaşlarının Biləsuvar rayon İcra Hakimiyyətinin keçmiş başçısı Mahir Quliyevin həbsinin detalları barədə yaydığı məlumatlara görə, başçı birinci müavini Xanlar Məmmədov vasitəsilə xüsusi karantin rejiminin tətbiqi ilə əlaqədar maddi yardıma ehtiyacı olan şəxslərə sosial yardım üçün ayrılan vəsaitin bir qismini hissə-hissə mənimsəməsi və qurumun sərəncamında olan digər vəsaitlərdən sosial yardım adı altında ayıraraq bir hissəsinin ona verilməsini, o cümlədən köməkçisi Pöhran Şahbazov və tabeliyində olan başqa vəzifəli şəxslər vasitəsi ilə yerli icra hakimiyyəti və digər dövlət orqanlarının vəzifəli şəxslərindən, eləcə də rayon ərazisində fərdi sahibkarlıq fəaliyyəti ilə məşğul olan vətəndaşlardan müxtəlif adlar altında pul vəsaitləri tələb edərək almasına tapşırmasına, həmçinin işsiz və aztəminatlı vətəndaşların ictimai işlərə cəlb edilərək aylıq qazanc əldə edə bilmələri üçün əməkhaqqı kartlarına köçürülən məbləğlərin Mahir Quliyev tərəfindən ələ keçirilməsinə dair əsaslı şübhələr müəyyənləşdirildikdən sonra əməliyyata başlanılıb.
DTX eyni zamanda,Mahir Quliyev tərəfindən “təmir-tikinti, abadlıq işlərinə ayrılan dövlət vəsaitlərinin müəyyən hissəsinin nağdlaşdırılaraq mənimsənilməsi” və “vətəndaşlardan müxtəlif təyinatlı tikintilərin aparılması üçün zəruri olan sənədləşmə işləri və digər əsaslarla ümumilikdə təkrarən rüşvət tələb edilərək alınmasına əsaslı şübhələr müəyyən edildiyini” bildirmişdi.
Aktualinfo.org 2011-2020-ci illərdə Mahir Quliyevin sözügedən rayona rəhbərliyi dövründə Biləsuvarda nə kimi işlərin görüldüyünü araşdırıb. Məlum olub ki, bu dövrdə ölkə başçısı İlham Əliyev üç dəfə Biləsuvar rayonuna səfər edərək aparılan abadlıq-quruculuq işləri ilə tanışlıqdan sonra bir sıra obyektlərin açılışında iştirak edib.
Dövlət başçısın açılışında iştirak etdiyi və DTX-nın müəyyən etdiyi təmir-tikinti, abadlıq işləri hansılar olub və buraya nə qədər dövlət vəsaiti xərclənib? Zənnimizcə bu mövzuya toxunmağa artıq ehtiyac qalmayıb. Amma rayonda təmir tikinti işlərinin aparılması üçün elan olunmuş tenderlərdən Mahir Quliyevin bu yollarla əldə etdiyi qazancı təxmin etmək olar.
Qeyd edək ki,Biləsuvar rayon İcra Hakimiyyətinin dövlət satınalmaları üzrə elan etdiyi tenderlərdə bir çox şirkətlər iştirak edib. Aktualinfo.org bu şirkətlərdən bir neçəsi barədə müəyyən məlumatlar əldə edib.Mahir Quliyevlə işbirliyində olub,dövlət vəsitlərini mənimsəyən bu şirkətlər hansılardır?
“ Cənub Təmir Tikinti -1 ” MMC 13.12.2018-ci ildə Biləsuvar şəhəri Heydər Əliyev prospektində 48 mənzilli, 3 bloklu, 4 mərtəbəli yaşayış binasının tikintisi işləri üzrə 2930114 manat və 02.12.2019-cu il tarixdə Biləsuvar şəhərində Milli Qəhrəman Mübariz İbrahimov küçəsinin abadlaşdırılması və müasir şəhərsalma prinsiplərinə uyğun yenidən qurulması işləri üzrə ayrılmış 2855009.53 manat dövlət vəsaitinin nə qədəri Mahir Quliyevə çatıb,yəqin istintaq orqanları tərəfindən araşdırılacaq.Qeyd edək ki,İcra Hakimiyyətinin sözügedən şirkətlə 15.04.2020-ci ildə Biləsuvar şəhərində küçə yolların əsaslı təmiri işləri üzrə 568294 manat və Biləsuvar şəhərində abadlaşdırma işlərinin aparılması üzrə 183932 manat dəyərində bağlanmış müqavilələlərin karantin rejimi ilə əlaqədar icrasına başlanılmadığından güman ki,Mahir Quliyev buradan vəsait əldə edə bilməyib.
“Perlit” Məhdud Məsuliyyətli Cəmiyyət də Mahir Quliyevin dövlət vəsaitlərinin mənimsənilməsində törətdiyi cinayət əməllərinin iştirakçısı olub.Belə ki,şirkət 01.04.2019-cu ildə abadlıq və tədbirlərin təşkili işləri üzrə 182829.16 manat, yollarının əsaslı təmiri işləri üzrə isə İcra Hakimiyyəti ilə 571711.37 manat dəyərində müqavilə bağlayıb.Bundan əvvəl də ,yəni 27.03.2018-ci ildə də “Perlit”MMC Biləsuvar rayonunda abadlıq işləri üzrə 166726.92 manat və rayonda yolların əsaslı təmiri işləri üzrə 589221.2 manat dəyərində dövlət sifarişlərini həyata keçirib. Hansı formada həyata keçirib, mütəxəsislər araşdırsa üzə çıxar.
Respublikanın əksər rayonlarında tenderlərin qalibi olmuş,ünvanı belə bəlli olmayan “İnpeks.N” MMC-də Biləsuvar rayon İcra Hakimiyəti ilə 16.05.2017-ci ildə yolların əsaslı təmir işləri üzrə 554949.99 manat dəyərində müqavilə bağlayıb.
“Ramil 1981″Məhdud Məsuliyyətli Cəmiyyət də 19.03.2019-cu ildə Biləsuvar rayon İcra Hakimiyəti ilə tədbirlərin təşkili işləri üzrə 66750 manat dəyərində müqavilə bağlayıb. Ancaq burada hansı tədbirlərin təşkilindən söhbət gedir, məlum deyil. Güman ki istintaq orqanları bunu da araşdıracaq.
” Göyəzən-20 ” Məhdud Məsuliyyətli Cəmiyyət də Mahir Quliyevin əməllərinin qurbanı ola bilər. Belə ki, Biləsuvar rayon İcra Hakimiyətin 14.04.2020-ci ildə tədbirlərin təşkili işləri üzrə 67750 manat dəyərində dövlət sifarişini həyata keçirməli olub.Amma burada da hansı tədbirlərin təşkilindən söhbət gedir,məlum deyil.Bunlardan əlavə “Göyəzən” MMC ilə Biləsuvar rayon İcra Hakimiyət arasında 08 noyabr 2019-cu il tarixdə Biləsuvar şəhər 1-saylı körpələr evi 2-3-saylı uşaq bağçalarında avadanlğın alınması ,sosial -mədəni və məişət təyinatlı obyektlərı əsaslı təmirı işlərinin satınalınması üzrə 27628.80 manat,22 oktyabr 2019 -cu tarixdə isə Biləsuvar şəhər H.Əliyev kücəsində ağ laylarin üz səthinin dəmir sücgəclə təmizlənərək ağardilması işlərinin abadlığa aid satın alınması üzrə keçirilmiş kotirovka sorğusu müsabiqəsində 23000.04 manat dəyərində satınalma müqaviləsi bağlanılmişdı.
08 noyabr 2019-cu il tarixdə Biləsuvar şəhər 1-saylı körpələr evi 2-3 -saylı uşaq bağçalarında inventarların alınması, yumşaq inventar, yataq ləvazimatları,xüsusi deyimlərin alınması və digər maşın və avadanlıqlarn satınalınması üzrə keçirilmiş kotirovka sorğusu müsabiqəsinin digər qalibi isə “HƏKƏRİ-16″MMC olub və həmən müəssə ilə 43700.00 manat məbləgində satınalınma müqaviləsi bağlanmışdır.Tender elanlarından da göründüyü kimi,ötən il cəmi iki ay ərzində Biləsuvar rayonunda 1-saylı körpələr evi 2-3-saylı uşaq bağçalarında avadanlğın alınması 100 min manat civarında dövlət vəsaiti ayrılıb.Lakin pu vəsaitlərin nə qədəri təyinatı üzrə xərclənib,sual altındadır.
Məlum olduğu kimi,ödənişli ictimai işlərdə çalışan işçilərin əmək haqqlarının mənimsənilməsi son illər bütün rayon İcra başçılarının əsas gəlir yerinə çevrilmişdi.Bu baxımdan fiziki şəxs İSAYEV AZƏR MİRƏZİM oglu ilə Biləsuvar rayon İcra Hakimiyət arasında 04 aprel 2019-cu il tarixdə ödənişli ictimai işlərdə çalışan işçilərə xüsusi geyimlərin, ləvazimatların və mal-materialların işləri üzrə kecirmiş oldugu təkliflər sorgusunun yekun protokoluna əsasən 126200.00 manat məbləgində bağlanmış satınalma müqaviləsi də maraq doğurur.Burada nə qədər dövlət vəsaitı mənimsənilib,güman ki. istintaq orqanları müəyyən edəcək. Qeyd edək ki,bu Biləsuvar rayonunda tender yolu ilə ödənişli ictimai işlərdə çalışan işçilərə ayrılmış dövlət vəsaitlərinin çox az bir hissəsidir.Bu istiqamətdə keçirilmiş digər tenderlərə ayrılmış vəsaitlər və qalib olmuş şirkətlər barədə məlumat əldə edə bilmədik.Amma istintaq orqanlarının yoxlamaları çox şeylərin üstünü açacaq.
Geri qayıt