Yusif Yusifov 8 milyon manata haranı və nə vaxt təmir etdirdi?
26-01-2021, 10:04
Gəncə şəhərində bir neçə ali təhsil ocagı var ki,onlardan biri də Gəncə Dövlət Universitetidir.Bu təhsil müəssisəsi ətrafında baş verənlar haqqında son dövrlər elektron kütləvi informasiya vasitələrində kifayət qədər məlumatlar yayılıb. Universitetdə tədrisin keyfiyyətindən tutmuş,tələbə müəllim,müəllim rektor münasibətləri ilə bərabər,maliyyə təsərrüfat işləri barədə də yayılmış bu məlumatların çoxu rektor Yusif Yusifovun rəhbərliyi dönəminə düşür. Müsahibələrənin birində isə rektor Yusif Yusifov mətbuatı qərəzçilikdə,hətta sətiraltı ifadələrlə səriştəsizlikdə günahlandıraraq jurnalistlərin ümumi sözlərlə universitetin artan ictimai nüfuzuna zərbə vurmağa çalışdığını iddia edir.
Aktualinfo.org xatırladır ki, yanvarın 25-də Baş nazir Əli Əsədov Azərbaycan Respublikası Prezidentinin tapşırıqları əsasında növbəti il üçün müəyyənləşdirilmiş prioritetləri açıqlayarkən deyib ki, fiskal dayanıqlığın təmin edilməsi davamlı olaraq büdcə xərclərinin optimallaşdırılmasını, qənaət rejiminin tətbiq olunmasını, artıq və səmərəsiz xərclərin qarşısının alınmasını tələb edir.
Ə.Əsədov həmçinin bildirib ki, Prezidentin tapşırığına əsasən, dövlət satınalmalarının şəffaflığı və effektivliyi təmin edilməlidir: “Şişirdilmiş qiymətlərlə satınalmaların qarşısı qətiyyətlə alınmalıdır. Tenderlərin keçirilməsinə xüsusi önəm verilməlidir”.
Bəs görəsən Gəncə Dövlət Universitetinin rektoru Yusif Yusifov rəhbərliyə başladığı gündən təhsil müəssisəsinin keçirdiyi satınalmaları nə qədər şişirdib,şəffaflığa nə qədər riayət edib? Onun Gəncə Dövlət Universitetinə rəhbərliyə başladığı gündən təmir-tikintiyə ayırdığı vəsaitlərin bir qismini sadəcə yadına salmaq istərdik.
Xarici qaz və xarici elektrik təchizatının çəkilişi üzrə keçirilmiş kotirovka sorğusunda 122 567.78 manat dəyərində satınalma müqaviləsi “19 SAYLI TİKİNTİ TƏMİR İDARƏSİ” Məhdud Məsuliyyətli Cəmiyyəti ilə 25.11.2020-ci il tarixdə bağlanmışdır.
Cari təmir işlərinin görülməsi üzrə keçirilmiş kotirovka sorğusunda 49 270 manat dəyərində satınalma müqaviləsi “ARSENA” Məhdud Məsuliyyətli Cəmiyyəti ilə 20.06.2020-ci il tarixdə bağlanmışdır.
Abadlıq işlərin görülməsi üzrə keçirilmiş kotirovka sorğusunda 48 925.17 manat dəyərində satınalma müqaviləsi “ARSENA” Məhdud Məsuliyyətli Cəmiyyəti ilə 20.06.2020-ci il tarixdə bağlanmışdır.
Cari təmir üzrə keçirilmiş kotirovka sorğusunda 49 264.5 manat dəyərində satınalma müqaviləsi “DOINQES-KO” Məhdud Məsuliyyətli Cəmiyyəti ilə 24.12.2019-cu il tarixdə bağlanmışdır.
Abadlaşdırma xidmətləri üzrə keçirilmiş kotirovka sorğusunda 49 499.02 manat dəyərində satınalma müqaviləsi “DOINQES-KO” Məhdud Məsuliyyətli Cəmiyyəti ilə 24.12.2019-cu il tarixdə bağlanmışdır.
Elə həmin gün,yəni 24.12.2019-cu il tarixdə əsaslı təmir üzrə keçirilmiş açıq tenderdə 8 360 635.26 manat dəyərində satınalma müqaviləsi “19 SAYLI TİKİNTİ TƏMİR İDARƏSİ” Məhdud Məsuliyyətli Cəmiyyəti ilə bağlanmışdır.
20.07.2017-ci il tarixdə Universitetin Cavad bəy Rəfibəyli 57 ünvanında yerləşən 4 mərtəbəli tədris binasının təmir işləri üzrə 257 999.11 manat dəyərində satınalma müqaviləsi “YUMAKS” Məhdud Məsuliyyətli Cəmiyyəti ilə bağlanmışdır.
14.12.2017-ci il tarixdə Universitetin Cavad bəy Rəfibəyli ünvanında yerləşən 5 saylı tədris korpusunun əsaslı təmir işləri üzrə 395 093.71 manat dəyərində satınalma müqaviləsi “Holding-SSS” Məhdud Məsuliyyətli Cəmiyyəti ilə bağlanmışdır.
Araşdırmalardan da göründüyü kimi 2017-ci ildə Gəncə Dövlət Universiteti tərəfindən təkcə bir korpusun cari və əsaslı təmir işlərinin satınalmasına ümumi olaraq 653 092 manat xərclənmişdir.
Qeyd edək ki,Gəncə Dövlət Universiteti bu məqsədlərlə 2014-cü ildə 625 514 və 527.049 manat, 2015-ci ildə isə 1.421.294 manat vəsait ayırıb.
Əvvəlki illərdə təkrar-təkrar təmir işlərinin aparılmasına vəsaitlər ayrılmasına baxmayaraq 24.12.2019-cu il tarixdə əsaslı təmir üzrə keçirilmiş açıq tender yolu ilə “19 SAYLI TİKİNTİ TƏMİR İDARƏSİ” Məhdud Məsuliyyətli Cəmiyyəti ilə 8 360 635.26 manat dəyərində satınalma müqaviləsinin bağlanılması hansı zərurətdən yaranıb?
Müqayisə üçün bildirmək istərdik ki,sözügedən “19 SAYLI TİKİNTİ TƏMİR İDARƏSİ” Məhdud Məsuliyyətli Cəmiyyəti 26.12.2019-cu il tarixdə Məcburi Köçkünlərin Sosial İnkişaf Fondu tərəfindən Ramana qəsəbəsi ərazisində 1512 məcburi köçkün ailəsi üçün zəruri sosial-texniki infrastrukturu olan 9 mərtəbəli 45 mənzilli 12 №-li yeni yaşayış binasının tikintisi üzrə keçrdiyi tenderdə 3 098 747.24 manat məbləğində müqavilə bağlayıb.
Bu kiçik bir müqayisədən də göründüyü kimi Gəncə Dövlət Universitinin təmirə ayırdığı vəsaitə məcburi köçkünlər üçün bağçası, məktəbi,istirahət parkı ilə birgə 2 ədəd 9 mərtəbəli yaşayış binası tikmək olardı. Maraqlıdır bəs Gəncə Dövlət Universiteti bu təmir işlərini harada aparıb? Xatırladaq ki,müqavilə 24.12.2019-cu il tarixdə bağlanılıb.Ondan cəmi bir neçə ay sonra koronavirus pandemiyası ilə əlaqədər ölkə ərazisindəki bütün tədris müəssisələri Nazirlər Kabinetini qərarı ilə müvəqqəti olaraq qapadılıb.Gəncə şəhərində yaşayan və universitetlə əlaqələri olan mənbədən əldə etdiyimiz məlumatlara görə 2019-cu ilin dekabr ayında bağlanmış bu müqavilə üzrə 2020-ci ildə Gəncə Dövlət Universitetində heç bir əsaslı təmir işləri aparılmamışdır. Universitetin balansında olan tədris korpuslarında da həmçinin. Mənbənin verdiyi məlumatlara görə universitetin tədris korpusları əvvəlki illərdə təmir olunub. Korpusların daxilində isə xırda,kosmetik işlərın aparılmasına göstərilən məvləğin ayrılması mümkün deyil.Bəs tender yolu ilə ayrılmış bu vəsaiti hansı məqsədlər üçün xərclənib?
Qeyd edək ki,Gəncə Dövlət Universiti “19 SAYLI TİKİNTİ TƏMİR İDARƏSİ” Məhdud Məsuliyyətli Cəmiyyəti ilə iki satınalma müqaviləsi bağlayıb.Xarici qaz və xarici elektrik təchizatının çəkilişi üzrə keçirilmiş kotirovka sorğusunda MMC bu VÖEN-lə (4700367351) müqavilə bağlayıb. Amma 24.12.2019-cu il tarixdə əsaslı təmir üzrə keçirilmiş açıq tenderdə müqavilə bağlanılmış podratçı “19 SAYLI TİKİNTİ TƏMİR İDARƏSİ” Məhdud Məsuliyyətli Cəmiyyəti göstərilsə də, VÖEN (1400122681) “MUĞANBANK” Açıq Səhmdar Cəmiyyətinə məxsusdur.
Burada maraqlı situasiya yaranır. Universitet təbii ki, əsaslı təmirə 8 360 635.26 manat vəsaiti Təhsil və Maliyyə nazirliklıkləri ilə razılaşdırılmadan ayıra bilməzdi.Həmin dövrdə isə sözügedən nazirliyə hazırki Xarici İşlər naziri Ceyhun Bayramov rəhbərlik edirdi.Yusif Yusifovun qardaşı Cavanşır Yusifovun Maliyyə Nazirliyində Aparat rəhbəri olduğu da heç kimə sirr deyil.Buradan belə çıxmırmı ki, universitet vəsaiti təmir adı ilə “19 SAYLI TİKİNTİ TƏMİR İDARƏSİ” MMC-nın hesabından “MUĞANBANK”a köçürüb?
Təbii ki, bu bizim təxminimizdi.Bu belə olmaya da bilər.Çünki, 21 yanvarda Universitetin Tender Komissiyasına göndərdiyimiz sorğu məktubuna hələ də cavab gəlmədiyindən.ancaq təxmin edə bilirik.Amma mövzu ilə bağlı Gəncə Dövlət Universitinin rəhbərliyindən cavab gözləyirik.Çox bilmək istəyirik ki,Yusif Yusifov 8 milyon manata haranı və nə vaxt təmir etdirib.
Aktualinfo.org
Geri qayıt