Mikayıl Cabbarovun qulağının dibində MİLYONLUQ TENDER ŞÜBHƏSİ...
20-11-2021, 09:59
İqtisadiyyat Nazirliyi yanında Dövlət Vergi Xidmətinin Aksizli və Markalanmalı Malların Dövriyyəsinə Nəzarət Baş İdarəsi 78.664.393.2 manatlıq tenderə yekun vurub.
Qlobal.az xəbər verir ki, Dövlət Vergi Xidmətinin Aksizli və Markalanmalı Malların Dövriyyəsinə Nəzarət Baş İdarəsi "Vahid Avtomatlaşdırılmış Məlumat "Track and Trace” ("Təqib və İzləmə”) Sisteminin qurulması ilə əlaqədar xidmətlərin satın alınması" lotu üzrə sifarişçi olduğu satınalmanın qalibi "TT Technologies” Məhdud Məsuliyyətli Cəmiyyəti (MMC) olub.
"TT Technologies” MMC 2020-ci ilin dekabr ayının 29-da təsis edilib.
Şirkətin hüquqi ünvanı Bakı şəhəri, Əlibəy Hüseynzadə ev 86, qanuni təmsilçisi isə Behbudova Ülkər Ənvər qızıdır.
Şirkətin nizamnamə kapitalı təsis edilərkən 300.000 manat olsa da, sonradan 500.100 manatadək qaldırılıb.
Qlobal.az xəbər verir ki, tender müqaviləsinin detalları barədə açıq məlumat verilməsə də, müqavilənin 2029-cu ilin dekabr ayında yekunlaşacağı planlaşdırılıb.
Maraqlıdır ki, 78 milyon manatlıq tenderin qalibi edilən şirkətin web səhifəsi yoxdur. Belə ki, "TT Technologies” Məhdud Məsuliyyətli Cəmiyyəti sözü google-də axtarışa verilərkən yalnız şirkətin təsis edildiyi zaman yerli mediada dərc edilən xəbərlərə rast gəlinir.
Təsis edildiyi gündən 10 ay sonra 78 milyon manatlıq dövlət satınalmasında qalib elan edilən "TT Technologies” Məhdud Məsuliyyətli Cəmiyyəti yəqin ki, bu cür "sürətli inkişafına görə" iqtisadi tarixdə yer alacaq.
Geri qayıt