Əli Həsənov necə izolə vəziyyətinə salındı? - PA daxilində cərəyan edən olayların mübhəm məqamları
13-03-2014, 11:42
DİA.AZ: - Bir neçə gün əvvəl mətbuat qarşısına çıxan Prezident Administrasyiasının ictimai-siyasi şöbəsinin müdiri Əli Həsənov ilk dəfə olaraq PA daxilində çəkişmələrin olduğunu az qala açıq ifadələrlə etiraf etdi. Doğrudur, bu intriqalarda tərəf olmadığını da iddia kimi fikirlərində qabartmağa çalışsa da, hər kəs məsələnin nə yerdə olduğunu bildiyindən PA rəsmisinin çabaları yetərsiz oldu. Yəni Əli Həsənovun «PA-da şöbələrarası gərginlik var» ifadəsinin ardından «dövlət olaraq hər şeyi nəzarətdə saxlayırıq» deməsi onun hansı mahiyyətə toxunmaq istədiyini ortaya qoydu. Amma tərəf olduğunu gizlədə bilmədi.
Bəli, bu gün Əli Həsənov konkret bir qruplaşmanın nümayəndəsi, daha dəqiqi favorit fiqurlarından biri kimi bir savaş meydanına atılıb. Bu barədə DİA.AZ-ı bilgiləndirən hökumət içindəki mötəbər mənbə iddia edir ki, Əli Həsənov əslində məlum savaşa heç də könüllü şəkildə atılmayıb - cəlb olunub. Mənbənin söylədikləri:
«Hələ iki il əvvəl Əli Həsənov vəzifəsindən alınmalı idi. Yəni belə bir qərar verilmişdi. Sadəcə olaraq situasiya dəyişkənliyi Əli Həsənovun işinə yaradı. Həm də yaratdığı saxta mənzərə onun karyera ömrünün uzanması ilə müşaiyət olundu. Amma yalan üzərində dayanıqlı siyasətin qurulması imkansızdır. Və artıq Əli Həsənov da hiss edir ki, «yuxarıların» ona etimadı qalmayıb, «aşağılar» isə onun batan gəmisi ilə səfər etmək fikrində deyillər».
Mənbəmiz bildirir ki, belə bir şəraitdə Əli Həsənov müdafiə zərurətini hiss etdiyindən məcburi qaydada ehtiyat tədbirlərinə əl atmalı oldu: «Bu gün onun qəzet və saytlarında əks cinah - konkret olaraq Prezident Administrasiyasının digər şöbə müdiri Elnur Aslanov «vurulur». Əli Həsənovun Elnur Aslanova olan qərəzinin səbəbləri aydındır. 2007-ci ildə Elnur Aslanov Ramiz Mehdiyevin köməkçisi vəzifəsindən alınaraq birbaşa olaraq prezidentin təşəbbüsü ilə PA-ya şöbə müdiri gətiriləndə artıq Əli Həsənov ilk zərbəsini almışdı. Onun səlahiyyətlərinin böyük bir hissəsini itirməsinə hələ o zamanlar etiraz edəcəyi gözlənilirdi.
Amma Əli Həsənov həmin ərəfədə mövqelərinin laxlamasını əlindəki mətbuatın gücü ilə kompensə edə bildi. Yəni elə bir təəssürat yaratdı ki, o, yenə də əvvəlki səlahiyyətləri ilə baş-başadır. Halbuki Elnur Aslanovuni rəhbərlik etdiyi PA-nın siyasi təhlil və informasiya təminatı şöbəsinin yaradılması qərarı ilə ictimai-siyasi şöbənin səlahiyyətlərinin tən yarısı alınmışdı».
Mənbəmiz Elnur Aslanova qarşı Əli Həsənovun bu şəkildə qərəzli olmasını son günlər baş verən olaylardan da aşar surətdə duyulduğunu bildirir: «Təsəvvür edin, Əli Həsənov - dünənə qədər nurçuların bir nömrəli himayədarı kimi tanınan Əli Həsənov bu gün rəqiblərini məhz «nurçu» elan edərək hədəfə alır. Onun rəqib kimi hədəfə aldığı şəxsin Elnur Aslanov olduğu bu gün birbaşa olaraq nəzarətində olan qəzetdə təşkil etdiyi silsilə kampaniyadan da açıq şəkildə duyulur.
Hətta Əli Həsənovun əzələ nümayişi cəhdi kimi təqdim olunan “Dini etiqad azadlığı, missionerlik fəaliyyəti və media” mövzusundakı tədbirin də əslində hansı anlama xidmət etdiyi gün kimi aydın idi. Amma Əli Həsənov uğursuzluğa düçar oldu. Bu da gözlənilən idi. Çünki artıq Əli Həsənovun hansı siyasətə xidmət etdiyi çılpaqlığı ilə ortadadır.
Elə buna görə idi ki, onun üçün xüsusi əhəmiyyət daşıyan məlum tədbirə nə Milli Elmlər Akademiyasının, nə hakim Yeni Azərbaycan Partiyasının, nə Milli Məclisin və nə də digər nüfuzlu dövlət qurumlarının rəhbərliyindən kimsə qatılmadı. Əli Həsənov yalnız nəzarətində olan baş redaktorların və QHT rəhbərlərinin iştirakı ilə yetinməli oldu. Halbuki ona keçirdiyi tədbirin samballı olması çox vacib idi».
Mənbəmizin iddialarına görə, bu məsələyə olduqca vacib məqam kimi yanaşmaq lazımdır: «Yəni burada aysberqin görünməyən tərəfləri barədə təəssürat yaratmaq olar. Deməli, artıq hər kəs - habelə adları sadalanan qurumlar da Əli Həsənovun tənəzzül dövrünü yaşadığının fərqindədir. Digər tərəfdən, hər bir dairəyə proseslərin mahiyyəti də gün kimi aydındır. Necə olur ki, Əli Həsənov dünənə qədər təbliğatçısı kimi çıxış etdiyi nurçuların əleyhinə tədbir keçirir… Bu sual dəvətlilər üçün də maraqlı olmamış deyildi. Çünki eyni adamları Əli Həsənov dünənə qədər nurçuların tədbirlərinə dəvət edirdi, izdihamın yaradılmasına maraq göstərirdi.
Artıq bütün dairələrə yaxşı aydındır ki, Əli Həsənov bu dəfə öz əlinə oynayır və burada başlıca maraq əzələ nümayişidir. Kimsə isə mövqeləri təhlükə altında olan birisinin qol əzələsinə çevrilməyi göz önünə almaz. Almadı da. Hətta Əli Həsənovun “Dini etiqad azadlığı, missionerlik fəaliyyəti və media” mövzusundakı tədbirinə Qafqaz Müsəlmanları İdarəsi də dəstək vermədi. Tədbirdə heç bir nüfuzlu din xadiminin iştirak etməməsi faktı da nəzərdən yayınmamalıdır».
Mənbəmiz artıq Əli Həsənovun tam olaraq təcrid vəziyyətinə salındığını və bu prosesin onunla bağlı qərarın veriləcəyi anna qədər davam edəcəyini di bildirdi: «Artıq start düyməsi basılıb. Çabalarsa yalnız müqavimət və müdafiə xarakterlidir. Hücum üçün nə taqət var, nə də niyyət»…
Geri qayıt