Məhkəmə Gədəbəyin icra başçısına qarşı qərar çıxardı
17-07-2015, 10:00
Məlum olduğu kimi bu gün Gədəbəy rayonunda indiyədək görünməmiş həddə çatdırılmış məmur özbaşınalıqları mövzusu artıq uzun müddətdir ki, mütəmadi olaraq ictimai müzakirəyə çıxardığımız mövzulardan biridir. Çoxsaylı materiallarımızda biz dəfələrlə qeyd etmişik ki, Ramiz Yediyarovun bu rayona icra başçısı təyin olunduğu 2012-ci ildən bəri yığılıb qalan ən müxtəlif problemlərin bu gün sayı-hesabı yoxdur. İcra başçısının yol verdiyi özbaşınalıqlar ucbatından rayonun təhsil, səhiyyə, mədəniyyət kimi sahələri tənəzzülə uğramış, iqtisadiyyat çökdürülmüş, yerli əhali isə sözün əsil mənasında səfalət içərisində yaşamağa məhkum edilmişdir.Həmçinin dəfələrlə qeyd olunduğu kimi, Ramiz Yediyarovun yol verdiyi ən böyük özbaşınalıqlardan biri də yerli sahibkarları incitməsi, habelə rayonda sahibkarlığın inkişafına maneçilik törətməsi və vətəndaşların məhz bu zəmində xüsusilə haqsızlıqlara və təqiblərə məruz qoyması ilə bağlıdır. Xatırlatmaq yerinə düşər ki, ölkə prezidenti cənab İlham Əliyev hər zaman bu məsələyə münasibət bildirərək vurğulayıb ki, ölkəmizdə biznes mühitinin daha da yaxşılaşması üçün dövlət dəstəyinin artması, təkmil hüquqi bazanın formalaşması, dövlət proqramlarına uyğun bölgələrdə istifadəyə verilən fabrik və zavodlarda, emal müəssisələrində ən müasir texnologiyaların tətbiqi, istehsal olunan məhsullara xarici bazarlarda tələbatın artması göstərir ki, dünya iqtisadiyyatının ayrılmaz parçası olan Azərbaycan iqtisadiyyatı dinamik inkişaf yolunda inamla irəliləyir, sənayeləşmə proqramının həyata keçirilməsi istiqamətində önəmli addımlar atılır. Dövlət başçısının qeyd etdiyi kimi, konkret fəaliyyət proqramları əsasında həyata keçirilən layihə və islahatlar düşünülmüş siyasətə və konkret proqramlara əsaslanır: “...Ölkədə dövlət siyasətinin əsasında Azərbaycan vətəndaşı durur. Çünki dövlətimiz nə qədər güclü olsa insanlar özlərini bir o qədər təhlükəsiz, rahat hiss edəcəklər. Yerli icra başçısı yerlərdə dövlət siyasətini aparan şəxsdir və o, dövlət siyasətindən kənarda heç bir iş görə bilməz”.Lakin Gədəbəy Rayon İcra Hakimiyyətinin başçısı Ramiz Yediyarov bu istiqamətdə aparılan dövlət siyasətindən nəinki kənara çıxır, hətta prezidentin bu xüsusda birbaşa göstərişlərinin tam ziddinə olan addımlar belə atır. Bu iddianın arxasında onlarca gədəbəyli iş adamının, yerli sahibkarların sənədli-sübutlu ərizələri, müraciətləri durub. Obyekti uçurulanlar, torpağı əlindən alınanlar, rüşvət vermədiyinə görə təqib edilənlər... Gədəbəydə xalqın məruz qoyulmadığı hansı haqsızlıq qaldı ki? Amma gədəbəylilər bütün bu haqsızlıqlarla yenə də barışmırlar. Elə qəzetimizin səhifələrində mütəmadi dərc olunan materiallarda da Gədəbəy rayon, şəhər və kənd sakinlərinin müxtəlif vaxtlarda icra başçısına qarşı irəli sürdükləri ağır ittihamlar onların haqsızlığa qarşı bu mübarizələrinin əsas göstəricisidir. Eyni zamanda da qeyd etməliyik ki, Ramiz Yediyarovun törətdiyi qanunsuzluqlardan daha çox ziyan çəkmiş gədəbəyli iş adamlarından biri də məhz Plankənd kənd sakini Əliyev Oktay İbrahim oğlu olmuşdur. İlk dəfə 2014-cü ilin yayında redaksiyamıza müraciət edən Oktay Əliyev bildirmişdi ki, o, təxminən iki il əvvəl rayonda turizmin inkişaf etdirilməsi və yeni iş yerlərinin açılması zəminində, Ekologiya və Təbii Sərvətlər Nazirliyi tərəfindən verilmiş razılıq və icazə sənədləri əsasında Gədəbəy rayonu Qalakənd meşə zolağında (meşə fonduna aid olan) xüsusi ayrılmış ərazidə turizm-istirahət mərkəzinin tikintisinə başlamışdı: “Ölkə rəhbərliyinin sahibkarların rahat fəaliyyəti üçün yaratdığı şəraitdən istifadə edərək Gədəbəy rayonunun Qalakənd kəndi ərazisində turizm obyekti tikmək qərarına gəldim. Baba yurdum olan torpaq sahəsində vətəndaşların rahat istirahətindən ötrü obyekt qurub yaratmaq üçün Gədəbəy Rayon İcra Hakimiyyətinin başçısı Ramiz Yediyarovun müavini Qüdrət Paşayevdən xeyir-dua da aldım. Min bir əzab-əziyyət hesabına bu il tikintini başa çatdırdım. Obyekt elə bir yerdə tikilirdi ki, tikinti materiallarını usta və fəhlələr ora bir kilometr məsafədən əllərində daşıyırdılar. Obyekt tikilib başa çatmaq üzrəykən, daha dəqiq desəm, kosmetik işləri görən zaman icra hakimiyyətinin nümayəndələri gəlib işi dayandırdılar. İcra başçısının müavini Rüstəm Nağıyev heç bir qanuni əsas və məhkəmə qərarı olmadan obyektin bir hissəsini sökdürdü. Halbuki, aidiyyəti qurumlardan, o cümlədən Ekologiya və Təbii Sərvətlər Nazirliyindən lazım olan bütün sənədləri almışdım. Sadəcə, bu işdə icra hakimiyyətinin rəhbər şəxslərinin başqa maraqları olduğundan tikintini yarımçıq saxladılar...”Qeyd edək ki, həmin torpaq sahəsi ETSN-nin balansındadır və RİH-nə heç bir aidiyyatı yoxdur. Lakin qeyd edildiyi kimi, ötən ilin iyul ayının 11-də RİH başçısının müavini Rüstəm Nağıyev, aparatın bir neçə əməkdaşı və RPŞ-nin rəis müavini Bəhmən Məmmədov çoxsaylı polis əməkdaşları ilə əraziyə gələrək, heç bir yazılı sənəd təqdim etmədən, ağır texnikanı cəlb etməklə artıq çox hissəsi hazır olan binanın bir hissəsini uçurdurlar. Bundan sonra Oktay Əliyevə qarşı pul tələbi irəli sürülür və yenə gələcəklərini deyən məmurlar çıxıb gedirlər. Həmin şəxslər təkrarən ayın 23-də geri qayıdırlar və bu dəfə də binanın qalan hissəsini uçurdurlar. Nəticədə Oktay Əliyevə külli-miqdarda maddi və mənəvi ziyan dəyir...Elə o vaxtdan da Oktay Əliyev öz hüquqları uğrunda mübarizəyə başlayır. Təbii ki, bu mübarizə yalnız hüquqi müstəvidə, ölkə qanunları çərçivəsində aparıla bilərdi. Buna görə də Oktay Əliyev ilkin olaraq Gəncə İnzibati-İqtisadi Məhkəməsində Gədəbəy Rayon İcra Hakimiyyətinə qarşı iddia qaldırmışdı. Məhkəmə irəli sürülən iddianı nəzərdən keçirərək ədalətli qərar vermidi. Belə ki, Gəncə İnzibati-İqtisadi Məhkəməsinin 16 fevral 2015-ci il tarixli qərarı ilə Gədəbəy Rayon İcra Hakimiyyətinin sahibkar Oktay Əliyevin xeyrinə 66.626 (altımış altı min altı yüz iyirmi altı) manat məbləğində cərimə olunması nəzərdə tutulmuşdur. Lakin bundan sonra Ramiz Yediyarovun da komandası müəyyən addımlar atmış və Gəncə İnzibati-İqtisadi Məhkəməsinin qərarından Gəncə Apellyasiya Məhkəməsi İnzibati-İqtisadi Kollegiyasına şikayət ərizəsi ilə müraciət etmişdir. Təəssüfflər olsun ki, Gəncə Apellyasiya Məhkəməsi İnzibati-İqtisadi Kollegiyasında işin araşdırılmasında müəyyən kobud nöqsanlara yol verilmiş və nəticədə qeyri-obyektiv qərar qəbul edilmişdir. Kollegiyanın 14 aprel 2015-ci il tarixli qərardadı ilə Gəncə İnzibati-İqtisadi Məhkəməsinin 16 fevral 2015-ci il tarixli qərarı ləğv edilmişdir. Lakin əlbəttə ki, Azərbaycan vətəndaşının dövlətçiliyimizə, ölkə qanunlarının aliliyinə inamı bir səhv məhkəmə qərarı ilə sarsıla bilməz. Elə Gəncə Apellyasiya Məhkəməsi İnzibati-İqtisadi Kollegiyasının verdiyi qərardaddan kassasiya şikayəti verməyə hazırlaşarkən də, Oktay Əliyev ölkəmizin məhkəmə-hüquq sisteminin obyektivliyinə və ədalətinə qətiyyən şübhə etmirdi: “Ölkəmiz öz müstəqilliyini əldə etdikdən sonra, ümummilli lider Heydər Əliyevin rəhbərliyi ilə aparılan məhkəmə-hüquq islahatları nəticəsində Azərbaycanda hüquq sistemi demokratik prinsiplər əsasında tamamilə yenidən quruldu. Yeni mütərəqqi qanunlar, o cümlədən “Konstitusiya məhkəməsi haqqında”, “Məhkəmələr və hakimlər haqqında” və digər qanunlar qəbul edildi. Bütün bu qanunlar demokratik prinsiplər və beynəlxalq hüquq normalarının tələblərinə uyğun hazırlanıb. Hüquq sistemi islahatları nəticəsində ölkəmizdə birinci instansiya, apellyasiya və kassasiya instansiyalarından ibarət yeni üçpilləli müstəqil məhkəmə sistemi formalaşdırılıb. Ölkəmizdə məhkəmə sisteminin təkmilləşdirilməsi istiqamətində tədbirlərin görülməsi daim gündəmdə saxlanılır. Azərbaycan Respublikasının Prezidenti İlham Əliyev cənabları məhkəmə sisteminin müasirləşdirilməsi barədə 19 yanvar 2006-cı il tarixli fərmanı imzaladıqdan sonra isə, ölkəmizdə məhkəmə islahatları keyfiyyətcə yeni mərhələyə keçdi. Bütün bunları nəzərə alaraq, mən son nəticədə ədalətin qalib gələcəyinə və hüquqlarımın bərpa olunacağına zərrə qədər də olsa şübhə etmirdim”.Belə də oldu. Bəlkə də bütün gədəbəylilərin səbirsizliklə gözlədikləri gün nəhayət ki, gəlib çıxdı. Həmin gün bütün rayon sakinləri üçün əsil “həqiqət anı” oldu. Azərbaycan Respublikası Ali Məhkəməsinin İnzibati-İqtisadi Kollegiyası Oktay Əliyevin kassasiya şikayəti əsasında işə baxmışdır. Kollegiyanın 18 iyun 2015-ci il tarixli, 2-1 (102)-755/2015 saylı qərarına əsasən Gəncə Apellyasiya Məhkəməsi İnzibati-İqtisadi Kollegiyasının 14 aprel 2015-ci il tarixli qərardadı ləğv edilmişdir.Ədalətin bu zəfəri Azərbaycanda mövcud məhkəmə sisteminin həqiqətən də müstəqil və obyektiv olduğunu növbəti dəfə isbatlamış oldu. Bəzi harınlamış məmurlar isə vətəndaşlarımızın hüquqlarının onların ambisiyalarından qat-qat üstün durduğuna dair daha bir açıq mesaj almış oldular.\\bizimdovr.az\\
Geri qayıt