Beyləqanda icra başçısı sahibkarları üsyana körükləyir...
24-08-2015, 10:33
“Gündəm Xəbər” qəzetinin ötən saylarında, Beyləqanın ictimai həyatında baş alıb gedən sosial problemlərin varlığından bəhs etmişdik. İşıq üzü görən silsilə məqalələrin dərcindən sonra elə düşünürdük ki, bəlkə rayona rəhbərlik edən cənab Vaqif Abdullayev, problemlərin həlli istiqamətində hansısa addımlarını atacaq. Amma, vaxt keçdikcə hər şey gözlədiklərimizin əksinə oldu. Çünki, günü-gündən redaksiyamıza daxil olan şikayət məktublarının sayı artdıqca, o zaman bilib başa düşdük ki, Vaqif Abdullayevin həyata keçirdiyi idarəçilik, bu gün Beyləqanı sağalmaz dərdə salıb.
Bir neçə gün bundan əvvəl, rayonun Dostluq kəndi B.Sərdarov küç ev-37 ünvanında yaşayan Zalov Musa Fərman oğlu redaksiyamıza ünvanladığı şikayət məktubunda yazır ki, “bu gün Beyləqanda hər cür qanunsuzluqlar, ədalətsizliklər baş alıb gedir, baş verənlərlə bağlı səlahiyyətli orqanlara silsilə müraciətlər ünvanlasaq da, nədənsə Vaqif Abdullayevə bir “dur” deyən tapılmır. Yaşadığımız Dostluq kəndi ərazisində vəziyyət olduqca acınacaqlıdır. Çünki, vaxtilə soxozun ərazisi olan sahələr, hansı ki, islahat komissiyasının qərarı ilə sadə vətəndaşlara verilən pay torpaqları, icra hakimiyyətinin saxta sərəncamları əsasında imkanlı şəxslərə verilib. Hətta, həmin şəxslərə torpaq mülkiyyətinə dair saxta Dövlət aktları da verilmişdir. Məsələn, Zöhrab həkimə, Vəli Mahmudova, Şirəli Mahmudova, Qasım Cavadova, Oruc Ağayevə, Nadir adlı şəxsə və digərlərinə verilmişdir. Hal-hazırda burada sotu 1000 manat olmaqla, cəmi 48 həyətyanı torpaq sahəsi satılmışdır. Torpaqların alqı-satqısını rayon rəhbərliyi ilə bərabər, sovxozun direktoru olmuş Natiq Mirzəyev, bələdiyyənin sədri B.Balakişiyev və məhkəmənin sədri Maşallah Şirvanov da həyata keçirmişdir.
Elə ki, ölkə rəhbəri cənab İlham Əliyevin tapşırığı əsasında nazirlər, komitə sədrləri və digər vəzifə sahibləri bölgələrə gedib əhali ilə görüşürlər, onların problemləri ilə maraqlanırlar, bu zaman bizim istəyimiz gözümüzdə qalır. Çünki, 30 may 2015-ci il tarixdə Bərdə şəhərində DİN-i cənab Ramil Usubovun, 24 iyul 2015-ci il tarixdə İmişlidə Baş Prokuror cənab Zakir Qaralovun qəbuluna getsək də, Beyləqan rayon prokuroru Azər Qasımovun, rayon polis şöbəsində müavin vəzifəsini daşıyan İlham Məmmədovun və polis şöbəsində vəzifə daşıyan digər şəxslərin, Vaqif Abdullayevdən aldıqları tapşırıqlar əsasında, beyləqanlıları görüşə buraxmadılar. Keçirilən görüşlər də belə bir yolla saxtalaşdırılır və bizim haqq səsimizi bu yolla boğurlar”.
Şikayətçi onu da qeyd edir ki, “Dosluq” sovxozunun mədəni otlaq adlanan ərazisindən 264 hektarını, Haramı qışlağı vaxtilə soxozun mərkəzi olub, oradan isə 280 hektar ərazi bilərəkdən xəritədən çıxarılıb. Belə bir qeyri-qanuni addımlar, vaxtilə DTXÇK, Beyləqan rayon şöbəsinin sədri olmuş Rəfayel Pəsiyevin və onun işçisi, eyni zamanda “sağ əli” hesab olunan Tofiq Quliyevin “xidmətləri” sayəsində baş tutmuşdur. Adicə sovxozun mədəni otlaq sahəsində 110 hektardan çox sahə, sovxozda işləməyən, yaşamayan, sovxozla heç bir əlaqəsi olmayan pullu şəxslərə sənədsiz verilmişdir. Baxmayaraq ki, ölkə rəhbəri cənab İlham Əliyev tərəfindən, hələ 01 oktyabr 2007-ci il tarixdə fərman verilmişdir ki, dövlət torpaqları vəzifə sahibləri tərəfindən heç cürə zəbt oluna bilməz. Amma bütün bunlara baxmayaraq, bu gün Beyləqanda ölkə rəhbərinin verdiyi fərmanı bir kimsə saya salmır. Nəticədə torpaq növbəsində olanlar yox, pulu çox olan adamlar hektarlarla sahələrə sahib olurlar. Həmin şəxslər də, çox zaman ələ keçirdikləri
torpaq sahələrində tikinti işləri aparıb, sonradan baha qiymətə satırlar. Bu da ki, kütləvi narazılıqların əmələ gəlməsinə səbəb olur” deyir.
Vaqif Abdullayevin qol qoyduğu növbəti qanunsuzluqların biri haqda da danışan şikayətçi bildirir ki, “bu şəkillərdə gördüyünüz mənzərə, Beyləqan rayon İcra Hakimiyyətinə məxsus qonaq evinin arxasındandır. Rayon prokurorluğunun təqribən 20 metrliyində olan ərazidə, vətəndaşa ilk əvvəl bina tikmək üçün icazə verilsə də, çox keçmir ki, tikilmiş divarların altı üstünə çevirilir. Buna səbəb, icra başçısının tikintini aparan vətəndaşdan lazım olan haqq-hesabı ala bilməməsi olur.
Başqa bir şikayətçi, rayonun Şitilçilik qəsəbəsi Nuru Paşa küçəsi ev-20-də yaşayan Səfərov Şükür Nazar oğlu bildirir ki, “bizim ailəyə 24 oktyabr 1997-ci il tarixdə Beyləqan rayon Aqrar İslahat Komissiyasının 31 saylı qərarına əsasən, 2,69 ha torpaq sahəsi verilmişdir. Bu haqda hələ 1004 saylı Torpağa mülkiyyət hüququna dair Dövlət aktı da verilmişdir. Ailəmizə verilən torpaq sahəsini Bəndəliyev Famil Məhyəddin oğlu və Bəndəliyev İbadət Famil oğlu qeyri-qanuni yolla zəbt ədərək, taxıl əkib səpməyə başladılar ki, onlar da bu günə kimi bizim ailəyə üstüstə 451,32 manat maddi ziyan da vurublar. Daha faciəli hal odur ki, ailəmizə qanunla verilmiş torpaq sahəsindən istifadə etməyimizə, bu gün də onlar imkan vermirlər. Üz-üzə qaldığımız problemlə bağlı 09 dekabr 2013-cü il tarixdə, iş üzrə Beyləqan rayon Məhkəməsinin hakimi Əliyev Nəsrullah İbadullah oğlunun sədrliyi ilə keçirilən məhkəmə prosesində, həmin şəxslərin ailəmizə məxsus pay torpaqlarından çıxarılmasına dair qərar çıxarılsa da, nədənsə çıxarılmış məhkəmə qərarı bu günədək də kağız üzərində qalmaqdadır. Belə bir halın varlığı da onu söyləməyə əsas verir ki, Vaqif Abdullayevin rəhbərlik etdiyi Beyləqanda qanunlar işləmir, anarxiya hökm sürür, vətəndaşların süründürməçiliklərlə üz-üzə qalmaları, sanki həyat tərzinə də çevrilib. Daha faciəli hal odur ki, üz-üzə qaldığım problemlə bağlı bir neçə dəfə rayon rəhbərliyinin qəbulunda olsam da, təəssüflər olsun ki, o, müavini Telman Məstanova problemin həlli ilə məşğul olmaq tapşırığını verməklə kifayətlənməli oldu. Sağ olsun Telman müəllimi də, o da məni qəbul edib bildirdi ki, “birdə səni bu ərazilərdə görməyim. Get kimə, hara istəyirsən şikayətini ver, onsuz da tədbir görülməsi üçün lazımi sənədləri mənə göndərəcəklər. Mən də baxan deyiləm” dedikdə, o zaman bilib başa düşdüm ki, Beyləqanın bugünkü rəhbərliyi sakinlərinə problemlər yaradan, sadə vətəndaşlarını saya salmayan, qanunların işləməsinə imkan verməyən və digər qanunsuzluq əməllərinə qol qoyan rəhbərlikdir”. Belə bir səbəblər üzündəndir ki, bu gün əksər KİV Beyləqanın problemləri daim qabardılır, süründürməçilik amillərinin tüğyan etməsindən geninə-boluna danışılır. Bəli, bunlar əsl həqiqətlərdir ki, bir mətbu orqan olaraq bu haqda biz də danışırıq, silsilə tənqidi məqalələrlə ictimaiyyəti məlumatlandırmağa çalışırıq. Çünki, hal-hazırda respublikamızın şəhər və rayonları içərisində daha çox sosial problemlərin tüğyan etdiyi bir rayon varsa, yəqin ki, o da Beyləqan rayonudur.
Geri qayıt