Gədəbəydə narın-narın korrupsiya...
18-09-2015, 09:21
Gədəbəy ölkəmizin ucqar rayonlarından biri olduğu üçün, bu rayonda baş alıb gedən həngamələrin, tüğyan edən sosial problemlərin nə həddi, nə də ki, hüdudu var. Ümumilikdə götürdükdə isə onu qeyd edə bilərik ki, baş verən olayların “flaqmanı” rolunda əksər vəzifə sahibləri, o cümlədən rayonun Maliyyə İdarəsinin müdiri Namiq Məmmədov, Z.Əliyeva adına Mərkəzi Rayon Xəstəxanasının “əbədi və əzəli” baş həkimi Ramiz Pirverdiyev, ən əsası isə icra hakimiyyətinin başçısı Ramiz Yediyarovla bərabər, digər vəzifə sahibləri də mühüm rol oynayırlar.
Maliyyə “şefi”nin söz sahibi olmasına səbəb nədir?
Məsələn, məlumatlı mənbə bildirir ki, Namiq Məmmədov olduqca strateji bir sahəyə rəhbərlik etdiyindən, bu gün o, rayonda əsas fiqurlardan birinə çevrilib. Yəni, istər kadr təyinatında, istər maliyyə mənimsəmələrində, istərsə də bəzi vəzifə sahiblərindən fərqli olaraq, müxalifət təmsilçilərinə “canyananlıq” etməsinə görə də, o, rayonda xüsusi ad da çıxarıb. (GundemXeber.az) Mənbə bildirir ki, Namiq müəllim hələlik adını çəkmək istəmədiyimiz müxalifət təmsilçisinə, şəhərin Heydər Əliyev prospektində, hansı ki, bir və iki saylı binaların yaxınlığındakı zibilxananı təmizlətdirməklə 4 sot torpaq sahəsini “pay-püş” edib. Verilən məlumatda o da bildirilir ki, qeyd olunan ərazidə 1 sot torpaq sahəsi 3-4 min manat həddində qiymətləndirilir. Maliyyə “şefi”nin belə bir addımı sakinlər arasında kütləvi narazılığa səbəb olsa da, Məmmədov Yediyarov ittifaqının qüdrəti hər cür narazılığın qarşısını ala bilir.
Namiq Məmmədov Səkinə xanıma vəzifəsini daşımaq üçün niyə dəstək verir?
Rayonun mərkəzi xəstəxanasında baş verənlərdən bəzilərinin də, Namiq Məmmədovun dəstəyi ilə “yoluna” qoyulması, bu gün Gədəbəydə daha çox müzakirə olunan mövzulardan birinə çevrilib. Belə ki, xəstəxanada maliyyə mənimsəmələri barəsində hansı mətbu orqanda açıqlama işıq üzü görürsə, dərhal maliyyə “şefi” lazım olan “rıçaqlarını” işə salıb, qeyd olunan açıqlamaların qarşısını ala bilir. (GundemXeber.az) Çünki, verilən məlumatda o da bildirilir ki, xəstəxananın baş mühasibi vəzifəsini daşıyan Səkinə xanım ali təhsilli kadr olmadığından, ona daşıdığı vəzifəsində qalmaq üçün Namiq müəllimin dəstəyi kifayət edir.
Ümumiyyətlə, xəstəxanada baş alıb gedən maliyyə mənimsəmələri Namiq müəllimlə Səkinə xanımın işbirliyi sayəsində baş tutduğundan, ikinci tərəf də kifayət qədər var-dövlətə malik olan şəxslərdən biri hesab olunur. Məlumatı verən mənbə bildirir ki, baxmayaraq ki, Səkinə xanım xəstəxananın baş mühasibdir, bu gün onun Bakıda, Tərtərdə, elə Gədəbəyin özündə dəyəri yüzminlərlə qiymətləndirilən əmlakı, həyətində isə 3-4 ədəd bahalı maşını var. (GundemXeber.az) O halda sual oluna bilər ki, yazılanlar həqiqət deyilsə, bəs bu qədər var-dövlət hardandır? Xəstəxanaya üz tutub “UZİ”-dən keçmək istəyənlərin də istəkləri, Səkinə xanım tərəfindən həyata keçirilir. Belə ki, o, hər dəfə “UZİ”-dən keçmək istəyənlərdən 20 manat almaqla, büdcəsini gündəlik formalaşdıra bilir.
Əldə etdiyimiz başqa bir məlumatda o da bildirilir ki, mərkəzi xəstəxana rəhbərliyinin yerli sakinlərə qənim kəsilmələri də, bu gün çoxsaylı sakinləri çıxılmaz duruma salıb. Belə ki, onlar adicə rentgendən keçmək üçün Şəmkirə, Gəncəyə, Bakıya və digər ünvanlara üz tutmağa vadar olurlar. Buna səbəb isə, mərkəzi xəstəxananın rentgen aparatındakı linzanın, Bakı şəhərində fəaliyyət göstərən özəl klinikalardan birinə satılmasıdır.
Gədəbəyin MRX-sı müalicə müəssisəsidir, yoxsa alverxanadır?
Gədəbəydə Ramiz Pirverdiyevin rəhbərlik etdiyi xəstəxananın müalicə mərkəzinə deyil, daha çox bazarxanaya bənzəməsinin kökündə, tətbiq olunan idarəçiliklə bərabər digər amillərin də varlığı əsas səbəblərdəndir. Məsələn, baş verənlər haqda məlumatları redaksiyamıza təqdim edən mənbə bildirir ki, ölkə rəhbərinin tapşırığı əsasında bir müddət bundan əvvəl, sakinlərlə bölgədə görüş keçirməyə gedən səhiyyə naziri cənab Oqtay Şirəliyev, Z.Əliyeva adına Gədəbəy rayon Mərkəzi Xəstəxanasıda 11 dəqiqə olduqdan sonra, teztələsik xəstəxananı tərk edib rayonun Slavyanka kəndindəki istirahət mərkəzinə üz tutur. (GundemXeber.az) Həmin gecə istirahət mərkəzində istirahətini edən Oqtay Şirəliyevin sakinlərlə görüşü baş tutmadığından, bu gün də atılan addım sakinlər arasında müzakirə olunmaqdadır. Təəssüf doğuran hal o olur ki, əvvəla sakinlərlə nazirin görüşü baş tutmur. Belə bir görüş baş tutsaydı, o halda Gədəbəyin mərkəzi xəstəxanasını bazarxanaya çevirən, xəstələrə verilməli olan dərmanları, ərzağı və.s-ni “xırıd”
edən Ramiz həkimlə bağlı giley-güzarlarını, bəlkə də nazirə çatdıran tapılacaqdı. Nazirin bölgəyə səfəri zamanı sakinlər uduzsa da, udan isə Slavyanka kənd xəstəxanasının rəhbəri Səyyar həkim olur. Çünki onun müalicəyə göndərilməsi üçün, nazir tərəfindən müvafiq tapşırıq verilir.
Ehtiyatda olan zabitin qanı niyə batırılır?
Son aylar Gədəbəydə baş verənlər olaylar içərisində, silahlı qüvvələrimizin ehtiyatda olan zabiti, DQ müharibəsi veteranı, kapitan Qasmov Musa Heydər oğlunun dünyasını dəyişməsi, bu gün də hər kəsi sarsıdır. Çünki, onun ölümü ilə bağlı məlumatları əldə edərkən o da məlum oldu ki, 23 may 2015-ci il tarixdə Gədəbəydə kanalizasiya işlərini yenidən quran şirkətin əməkdaşları, rayonun şəhid Vahid Rüstəmov adına küçəsində qazıntı işləri apararkən, Əliyev Yusif Duman oğlunun evinə gizli yolla çəkilmiş mavi qaz boru xəttini təsadüf nəticəsində partladırlar. (GundemXeber.az) Baş verən hadisədən sonra Musa Qasımov, Gədəbəy rayon Qaz İstismarı Sahəsinin rəisi Məzahir Hüseynova baş verən hadisə ilə bağlı məlumat versə də, o, problemin həll olunacağına söz verir. Amma vaxt keçir, o, verdiyi vədinə əməl etmir. Musa Qasımova məxsus ev partladılmış mavi qaz xəttinə yaxın olduğundan, evdə mavi qazın yandırılması çox keçmir ki, əsl faciəyə çevrilir. Belə ki, partlayışdan ev tamamilə darmadağın olur və ağır yanıq xəsarəti ilə Bakıya çatdırılan Musa Qasımovun vəziyyəti isə, günü-gündən ağırlaşır. Və çox keçmir ki, o, dünyasını dəyişir.
Mərhumun ölümündə birbaşa günahkar olan qaz istismarı idarəsinin rəhbərliyi ilə bərabər, kanalizasiya xətlərinin yenidən qurulmasını həyata keçirən şirkət rəhbəri Elxan adlı şəxs də, bu gün istintaqdan yayına bilirlər. Bu haqda məlumatı verən Qasımova Həqiqət Qədir qızı (mərhumun həyat yoldaşıdır) bildirir ki, qeyd olunan şirkətə “İslam İnkişaf” bankından 59 milyon manat vəsait ayrılıb ki, həmin vəsaitin müəyyən hissəsi ilə şirkət rəhbərliyi hüquq-mühafizə orqanlarını “susdura” bilıir. Gədəbəy rayon Qaz İstismarı Sahəsinin rəisi Məzahir Hüseynovun da, xeyli miqdarda xərcə düşdüyü bildirilir.
Baş verən hadisədən sonra məsuliyyətdən yayınmağa çalışanlar ilk öncə cəhd edirlər ki, gizli yolla çəkilmiş və partladılmış 82 metr uzunluğunda olan mavi qaz boru xəttini qaranlıqda kəsib götürsünlər. Məqsədləri izi itirmək və qeyd etmək ki, ev qaz sızması, yaxud da digər səbəblər üzündən partlayıb. (GundemXeber.az) Amma, onların cəhdi uğursuzluğa düçar olur. Çünki, boru xəttini kəsmək istəyənləri mərhum Musa Qasımovun oğlu görür və qarşı tərəfə məqsədlərini gerçəkləşdirməyə imkan vermir. Mərhumun həyat yoldaşına isə prokurorluqdan bildirilir ki, “bir az gözləyin, hələ ki, işin istintaqı davam etdirilir”. Aylar uzunu belə bir cavabın verilməsi isə, baş aldatmaqdan başqa bir şey deyil.
Dünyasını dəyişən Musa Qasımovun evi darmadağın olduğundan, bu gün yağış suları altında qalan ev və içərisindəki əşyalar olduqca bərbad haldadır. Buna səbəb, əmələ gələn olayla bağlı məsuliyyət daşıyan qurum rəhbərlərinin evin təmiri ilə bağlı cəhd göstərməməsi və baş verənlərə biganə yanaşmalarıdır.
Bəli, bütün bunlardan sonra kim deyə bilər ki, Gədəbəydə haqq-ədalət var? Yəqin ki, belə bir sualın özü, hal-hazırda rayonda yaşanan mənzərənin varlığını, birdə ki, haqq-ədalətin “qeybə” çəkilməsinə bir işarədir.
Geri qayıt