Kiyevdən Tbilisiyə qarşı ağır ittiham: gürcü tərəfi isə isbat tələb edir
8-04-2022, 14:58
Ukrayna Müdafiə Nazirliyinin Baş Kəşfiyyat İdarəsi (BKİ) bəyanat yayıb ki, Rusiya sanksiya tətbiq edilən malları Gürcüstan ərazisindən idxal etməyi planlaşdırır və ölkə rəhbərliyi xüsusi xidmət orqanlarının nümayəndələrinə “qaçaqmalçıların fəaliyyətinə müdaxilə etməməyi” tapşırıb.
“Beynəlxalq sanksiyaların tətbiqi ilə əlaqədar Rusiya Federasiyası geniş çeşiddə hərbi, ikili təyinatlı və mülki malların tədarükü imkanlarını itirib. Rusiya agentləri sanksiyalardan yayınmaq üçün qaçaqmalçılıq kanalları yaradırlar ki, bu da xüsusilə Gürcüstan ərazisindən keçir. Eyni zamanda, siyasi rəhbərlik Gürcüstan xüsusi xidmət orqanlarının nümayəndələrinə qaçaqmalçıların fəaliyyətinə qarışmamağı tapşırıb”, - deyə bəyanatda bildirilir.
Ukrayna Baş nazirinin müavini İrina Vereşçuk da açıqlama verib ki, BKİ-nin məlumatına inanmamaq üçün heç bir əsas yoxdur: “Söhbət makaron və qarabaşaqdan getmir. Söhbət hərbi texnikadan gedir. Bütün bunlar doğrudursa və bizim xüsusi xidmət orqanlarına inanmamaq üçün heç bir əsasım yoxdursa, o zaman bu, niyə baş verir? Niyə Gürcüstan hökumətinə xüsusi xidmət orqanlarına əmr vermək hüququ verirsiniz ki, bütün bunlara göz yumsun? B,u necə mümkündür?”.
Vereşçukun sözlərinə görə, Ukrayna gürcü xalqına göstərdiyi dəstəyə görə minnətdardır: “Lakin Baş nazir İrakli Qaribaşvili, Rusiyanın bu gün dayandırılmasa, gələcəkdə nə baş verəcəyini anlamır. Bitərəf olduğunuzu söyləmək mümkün olmayacaq, sanksiyalara qoşula bilməyəcəyinizi söyləmək mümkün olmayacaq, çünki heç nə işə yaramayacaq. “Hava yollarını açaq” da deyə bilməyəcəksiniz. Bunu deyə bilməzsiniz”.
“Belə mövqe sizi 2008-ci il müharibəsindən xilas etmədi və bu gün də xilas etməyəcək. Mən həqiqətən ümid edirəm ki, gürcü xalqı, mənim gördüyüm, müharibəyə qarşı küçələrə çıxan insanlar öz seçdikləri hökumətin Ukraynaya qarşı belə davranmasını istəmirlər. Mən hər gün rus hərbçilərinin törətdiyi vəhşilikləri izləyirəm və inana bilmirəm ki, siz gürcülər - bizim bacılarımız və qardaşlarımız qadınlarımızı və uşaqlarımızı öldürmək üçün qaçaqmal silahların gətirilməsinə icazə verəcəksiniz”, - deyə Baş nazirin müavini söyləyib.
O, Rusiyanın Gürcüstana hücumunu xatırladıb: “2008-ci ildə sizi Rusiyaya hücumda ittiham etdilər, bu, mümkündürmü? Bu qədər illər keçdi, indi də Ukrayna onlara hücum etdi. Eyni şeyi eşidirik. Siz buna inanırsınız? Siz qürurlu gürcü xalqısınız, hökumətinizin belə davranmasına icazə verə bilməzsiniz, “yox!” deməlisiniz. Xahiş edirəm, camaat, hökumətinizi dayandırın və onlara başa salın ki, bundan yaxşı heç nə gəlməyəcək, bu, yol deyil. Biz mübarizəmizi davam etdirəcəyik. Dünyanın necə olmasını istədiyimizi görürsən. Ancaq kömək etməsən, nə olacağını bilirsən. Gəlin birləşək. Mən sizə demirəm ki, bizim üçün döyüşün, bizə silah verin, amma heç olmasa əmin olun ki, ərazinizdə qaçaqmalçılıq silahı olmasın. Müharibənin dayandırılması üçün bu kiçik addımı atın”.
Vereşçuk Gürcüstandan keçən qaçaqmalçılıq yolunun təfərrüatını bilmədiyini deyib, lakin qeyd edib ki, jurnalistlər müvafiq orqanlara müraciət etsələr, müvafiq məlumat tapa bilərlər: “Təəssüf ki, kəşfiyyatımızın dedikləri səhv deyil. Biz onların səhv etmələrini istəyirik, amma deyillər”.
Və sual yaranır: Gürcüstan hökuməti indiki vəziyyətdə ən yaxın tərəfdaşlarının - Qərb dövlətlərinin və Ukraynanın maraqlarından imtina etməyə hazırdırmı ki, Gürcüstan ərazisinin 20%-ni işğal edən təcavüzkara yardım etsin? Öz araşdırmasını aparıb bu cür faktları təsdiq edə bilən azad mediaya malik bir ölkədə bu, nə dərəcədə mümkündür? Axı Gürcüstanın indiki hakimiyyət orqanları nə qədər rusiyapərəst olsa da, bu təhlükəni tam dərk edirlər. DİA.AZ xəbər verir ki, AYNA-nın suallarını tanınmış gürcüstanlı ekspertlər cavablandırıblar.
Konfliktoloq, beynəlxalq münasibətlər üzrə elmlər doktoru, Gürcüstan Texniki Universitetinin professor Amiran Xevtsuriani:
“Ukrayna kəşfiyyatının və yüksək rütbəli məmurun yuxarıda qeyd etdiyimiz rəsmi açıqlamaları ölkəmizin reputasiyasına ən böyük zərbədir. Üstəlik, bu, Gürcüstanın Avroatlantik gələcəyinə düzəlməz ziyan vura bilər. Belə bir vəziyyətdə iki ölkə arasında rəsmi səviyyədə artıq münasibətləri korlayan bu insident sadəcə olaraq nəticə verməyəcək.
Düzdür, demək lazımdır ki, məsələnin daha çox şəffaflığa ehtiyacı var. Üstəlik, rəsmi Tiflis də bunda israrlıdır. Odur ki, Ukrayna xarici işlər nazirinin gürcü tərəfinin onlardan sübut təqdim etmələrini deməsi tamamilə anlaşılmazdır. Axı, Ukrayna hakimiyyəti gürcü tərəfinə qarşı belə irimiqyaslı ittiham irəli sürürsə, o zaman sübut yükü də elə Ukrayna tərəfinin üzərinə düşür. Mən birmənalı şəkildə bildirirəm ki, burada söhbət Gürcüstanın milli maraqlarından, onun bu günü və gələcəyindən gedir”.
Politoloq, Azad Rusiya Fondunun Cənubi Qafqazdakı nümayəndəliyinin direktoru Yeqor Kuroptev:
“İndi Putinin başlatdığı Ukraynaya qarşı müharibə gedir. Ukraynanın bütün qonşularından və dostlarından maksimum dəstək tələb etmək hüququ var, çünki Ukrayna təkcə öz torpaqlarını deyil, həm də bütün Avropanı müdafiə etmək üçün mübarizə aparır - Gürcüstan da daxil olmaqla. Gürcüstan rəhbərliyinin ictimai mövqeləri, yumşaq desək, tez-tez çaşqınlıq yaradır.
Sanksiyalardan yayınmağa gəlincə, mən əminəm ki, Kreml indi həqiqətən işləyir və sanksiyalardan yan keçməyin yollarını axtarır. Amma məndə Gürcüstanın bu işdə əli olduğuna dair heç bir fakt və sübut yoxdur. Belə sübutlar ictimaiyyətə təqdim edilməyib.
Hər gün övladlarını itirən Ukrayna üçün hətta Gürcüstanın hansısa səbəbdən Rusiyaya kömək etməsi fikri belə, xəyanətdir. Amma heç bir fakt yoxdur. Xüsusilə də silah qaçaqmalçılığı ilə bağlı.
Əgər Ukrayna kəşfiyyatında belə məlumatlar varsa, hamı bunu görmək istərdi. Təbii ki, Gürcüstanda çoxlu müxalif jurnalistlər, fəallar var və onlar həqiqəti öyrənməyə çalışa bilərlər”.
Geri qayıt