Kosmosda nüvə silahı: Rusiya orbitdə kimi təhdid edəcək?
17-02-2024, 08:40
Kəşfiyyat məlumatları göstərir ki, Rusiya kosmosa nüvə silahı yerləşdirmək istəyir. Amerika nəşrlərindən biri qeyd edib ki, bu, Yer kürəsinə nüvə silahı atmaq üçün deyil, daha çox peyklərə qarşı istifadə etməkdir. İctimai məkanda təfərrüatlı məlumat yoxdur, lakin Amerika mənbələri bunun yeni həyəcanverici məlumat olduğunu bildirir.
Kosmosa nüvə partlayıcı qurğusunun buraxılması texniki cəhətdən mümkündür. Ən azından bunun işlədiyini nümayiş etdirmək üçün. Hətta kosmosa nüvə silahı yerləşdirmək və orada partlayış yaratmaq mümkündür, lakin bu partlayışın effektivliyi az olacaq. Çünki kosmosda partlayış dalğası yoxdur, radiasiya var. Günəş isə radiasiyanı nüvə silahlarından daha çox yayır...
Təkrar edirəm, texniki cəhətdən bunu etmək olar, amma niyə? Axı bunun psixoloji təsirdən başqa heç bir təsiri olmayacaq.
Mənə elə gəlir ki, Rusiya sadəcə olaraq hardasa nüvə silahından istifadə etməyə can atdığını göstərmək istəyir. Bu, beynəlxalq hüququn pozulmasıdır. Ona görə də nüvə partlayışı sınaqları indi yalnız yeraltında mümkündür. Yəni kosmosda istifadə qanun pozuntusu olar.
Kreml başa düşür ki, bunun nəticələri Rusiya üçün ağır olacaq, etmək olmaz. Amma onu da həqiqətən istəyir ki, dünyada Rusiyadan qorxsunlar - nüvə silahına malik olduğunu xatırlatsınlar. Ümumiyyətlə, Rusiya xaos yaratmaqla “mənfəət” almağa çalışır.
Xüsusən, altı ay əvvəl Lavrov BMT-də rəsmən bəyan etmişdi ki, ruslar günəş panelləri əvəzinə kiçik nüvə reaktoru və ya buna bənzər cihazdan istifadə etmək üçün orbitə Atom Elektrik Stansiyasına malik peyk çıxarmağa hazırlaşır. İstisna etmirəm ki, indi biz eyni şeydən danışırıq: onlar yeni peyk buraxmaq istəyirlər. Axı Rusiyanın texnologiya ilə bağlı problemləri var, onların peykləri qısa müddət “yaşayır”, buna görə də ruslar müxtəlif vasitələrlə daha davamlı peyklər yaratmağa çalışırlar.
Bunu 6 ay əvvəl elan edəndə müəyyən xaos yaratdılar, lakin peyk orbitə ona çatmadı və harasa düşdü. Sonra başqa bir şey deməyə başladılar - nüvə sınaqlarını bərpa edəcəklərinə eyham vurdular. Sonra dedilər ki, Belarusda nüvə silahı yerləşdiriblər... İndi yenə deyirlər ki, nüvə silahını orbitə çıxarmaq istəyirlər.
Bunun mənası yoxdur, amma belə niyyətin özü təhlükəlidir. Çünki ruslar daim nüvə müharibəsinə bənzəyən, lakin buna görə cəzalandırılmayan bir şey etməyə çalışırlar. Beləliklə, danışıqlar davam edəcək. Lakin heç kim onların həqiqətən kosmosa nüvə silahı buraxıb-buraxmadığını yoxlaya bilməz. Belarusda nüvə silahının yerləşdirilməsi ilə bağlı oxşar məlumatlar var. Düşünürəm ki, Belarusda nüvə silahı yoxdur, sadəcə orada nüvə daşıyıcısı var...
Ona görə də çox güman ki, kosmosa nüvə silahı buraxmayacaqlar, amma bu haqda danışacaqlar. Eyni zamanda, hər hansı başqa cəfəngiyat da danışa bilərlər. Sadəcə biz həmişə yadda saxlamalıyıq ki, Rusiya var, nüvə silahı var və bu həmişə təhlükəlidir.
Nə qədər ki, Rusiya var, nə qədər ki, Rusiyanın nüvə silahı var, bununla “əylənəcək” və bu, təhlükəli olacaq.
Niyə indi? Çünki ABŞ-ın indiki administrasiyasının bütün səyləri Nümayəndələr Palatasını xarici yardım paketinə səs verməyə inandırmağa yönəlib. Baxmayaraq ki, bəlkə də ruslar əslində nəsə edəcəklər (çünki onlar həmişə dəhşətli və dağıdıcı bir şey etmək həvəsindədirlər).
Rusiya Federasiyası Ukraynada istədiyinə nail ola bilməyəcəyini nəzərə alsaq, başqa hansı “asimmetrik” hərəkətlərdən istifadə edə bilər? Rusiyanın hazırda həyata keçirməyə çalışdığı əsas asimmetrik hərəkət Donald Trampın ABŞ-da hakimiyyətə gəlməsidir. Bu, Rusiyanın nöqteyi-nəzərindən məsələlərin həll edilməsi üçün böyük ümididir. Onlar Trampa kömək etmək üçün hər şeyi edirlər. Bu o demək deyil ki, Tramp Putinin agentidir. Mən deyərdim ki, əksinə, Putin Trampın agentidir. Amma hər halda aydındır ki, Rusiya Federasiyası elə hadisələr yaradır ki, Tramp hansısa anti-Avropa, anti-Ukrayna, antidemokratik platforma üzərində qurduğu seçki kampaniyası zamanı deməyə söz tapsın. Bu, Rusiyanın əsas asimmetrik hərəkətidir.
Müəllif: Aleksey İjak – Ukrayna Milli Strateji Araşdırmalar İnstitutunun şöbə müdiri
Mənbə: UNİAN
Tərcümə AYNA-ya məxsusdur
Geri qayıt