Pusqudakı “xoxan” və ya: biz getsək, sizi öldürəcəklər
2-08-2024, 10:51
Gürcüstanda yenə “ikinci cəbhə” haqqında danışmağa başlayıblar. Baş nazir İrakli Kobaxidze “Rustavi 2” telekanalına müsahibəsində deyib ki, müxalifət oktyabrda ölkədə keçiriləcək parlament seçkilərində qalib gələrsə, Gürcüstan bir neçə gün ərzində Rusiya ilə hərbi qarşıdurmanın “ikinci cəbhəsinə” çevriləcək.
Baş nazirin sözlərinə görə, Rusiya Ukraynaya qarşı müharibə başladıqdan sonra ölkə daxilindəki “kollektiv milli hərəkat” və Kiyev rəhbərliyi Tbilisini hərbçiləri müharibəyə göndərməyə çağırıb. O, iddia edib ki, bu hərəkətlərdən imtina etdiyi üçün hakim “Gürcü Arzusu” partiyası “rusiyayönlü” adlandırılıb.
“Ukraynaya hərbçilərin göndərilməsi Gürcüstanın Rusiya ilə qarşıdurmaya tam qoşulması deməkdir. Təsəvvür edin ki, kollektiv milli hərəkat, məsələn, seçkilərdən sonra hakimiyyətə gələcək, onda iki, üç və ya dörd aydan sonra Gürcüstan ikinci cəbhəyə çevriləcək. Məndə olan məlumata əsasən buna zəmanət verirəm”, - deyə Kobaxidze bildirib.
Bundan əvvəl Gürcüstan hakimiyyəti bəzi qüvvələrin ölkədə Rusiya Federasiyası ilə qarşıdurmanın “ikinci cəbhəsini” açmaq istəyini dəfələrlə bəyan edib. Niyə indiki Gürcüstan hökumətinin nümayəndələri müxalifətin Rusiya ilə müharibəyə başlamaq istəyindən belə israrla danışırlar? Axı Gürcüstan və Rusiya Federasiyasının hərbi və insan potensialının nisbətini sadəcə təsəvvür etsəniz, hər hansı siyasi qüvvələr üçün belə bir istək məntiqsiz olardı. Baş nazir Kobaxidze onun bu qəribə bəyanatlarının kütləvi seçicinin şüuruna təsir etdiyinə inanırmı?
AYNA-nın suallarını Gürcüstanın tanınmış ekspertləri cavablandırıblar.
Qara Dəniz Beynəlxalq Universitetinin (Tbilisi) professoru, Beynəlxalq Araşdırmalar Mərkəzinin direktoru Nika Çitadze:
“Bunlar Kobaxidzenin növbəti demaqoq bəyanatlarıdır. Lakin o, istisna deyil, çünki bütün hökumət rəsmiləri və ilk növbədə Bidzina İvanişvili “ikinci cəbhə”nin açılmaq təhlükəsi barədə elan edirlər. Nə üçün nəzərdə tutulub?
Təbii ki, Gürcüstanda çoxları iqtisadi vəziyyətdən narazıdır. Müxtəlif sosioloji sorğuların nəticələrinə görə, ölkə əhalisinin birinci problemi iqtisadiyyat, işsizlik, aşağı əmək haqqı və sairdir. Və buna uyğun olaraq, “Gürcü Arzusu”nun bu vəziyyəti düzəltmək üçün verdiyi vədləri yerinə yetirməməsinə baxmayaraq (2012-ci ildən), “sülhü təmin edə bildiyi” ilə bağlı əsas arqumentini irəli sürür. Sanki bütün əvvəlki hakimiyyətlərdən fərqli olaraq, onlar bunu bacarıblar və indi Gürcüstanda hamı buna görə onlara minnətdar olmalıdır.
Başa düşürlər ki, əgər 12 il əvvəl olduğu kimi yenə də yaxşı həyat vəd etməyə başlasalar, 100 yeni zavod və fabrik açacaqlarına, benzinin qiymətini aşağı salacaqlarına əmin olsalar belə, insanlar daha onlara inanmayacaqlar. İndi isə yeni yanaşma yaranıb – deyirlər, “biz Gürcüstanda sülhün təminatçısıyıq və biz hakimiyyətdən uzaqlaşdırılsaq, Gürcüstan müharibə vəziyyətində qalacaq”. Yəni, “ay camaat, sülh ilə müharibə arasında seçim edin”.
Bu qəribə bəyanatlar məhz buna hesablanıb, hansısa “qlobal müharibə partiyası” Gürcüstana qarşı vuruşur. Açıq demaqogiyadır. Ümid odur ki, bunu sonsuzca təkrar etsələr, kimsə bu cəfəngiyyata inanacaq.
Gürcüstanda belə bir məsəl var ki, əgər siz daim ağaca “quruyur” desəniz, o, əslində quruyacaq. Bu təbliğata nasist yanaşmasıdır, Gebbels deyirdi ki, “yalan nə qədər çox olsa, insanlar onlara daha tez inanırlar”.
Yaxşı, görək. Hər halda, mübarizə davam edir. Müxalifət də öz növbəsində izahat işləri aparmalıdır ki, “qlobal müharibə partiyası” yoxdur, əksinə, hazırda “Gürcü Arzusu”nun rəhbərliyi altında ölkədə qeyri-sabitlik hökm sürür, dövlət Qərbdə öz müttəfiqlərini itirir və aqressiv Rusiyaya qarşı təkbaşına qalmaq riski var”.
Gürcüstan Strateji Təhlil Mərkəzinin (GSAC) aparıcı eksperti Gela Vasadze:
“Əslində hər şey sadədir, seçkilərə az qalıb və hakimiyyətdə olan partiya real nailiyyətlərlə öyünə bilməz. Daha doğrusu, sıravi seçicinin sualı var: əgər Gürcüstanda hər şey bu qədər yaxşıdırsa, niyə qiymətlər durmadan qalxır, həyat getdikcə çətinləşir? Bir vaxtlar bura köçənlər çoxlu pul gətirirdilər, amma indi gedirlər, qiymətlər qalxmaqda davam edir.
“Gürcü Arzusu” eyni seçiciyə nə təklif edə bilər? Onlar ən qiymətli şeyi - sülhü təklif etmək qərarına gəldilər. Necə ki, müxalifət gəlsə, mütləq Rusiya ilə müharibəyə başlayar və hamımızı öldürərlər və s.
Sovet şüarını xatırlayın: təki müharibə olmasın. Deməli, bu, eyni seriyadandır. Bəli, çətindir, bəli, qiymətlər qalxır və qurumların işinin keyfiyyəti pisləşib, amma bunlar hamısı cəfəngiyatdır, əsas odur ki, müharibə yoxdur, bizi öldürmürlər.
Bu rəvayət orta statistic seçiciyə tətbiq edilir və kifayət qədər uğurla tətbiq olunur. Məntiqsiz qorxu seçki qutusunda ciddi mübahisədir. Bu, “Gürcü Arzusu”nun seçkiqabağı riyaziyyatıdır”.
Geri qayıt