Rusiya Çində gizli PUA hazırlayır
26-09-2024, 11:19
"Rusiyada "Sarmat" ballistik raketinin uğursuz sınaqlarının aparıldığı bir vaxtda, Moskva Çində də hərbi imkanlar axtarışına çıxıb. Kreml uzun mənzilli hücum pilotsuz təyyarələrinin istehsalını genişləndirmək üçün Çində tədbirlər görür. Xüsusən də söhbət "Harpiy"lərdən gedir".
Bu fikirlər Defense Express-də dərc olunan məqalədəndir. Məqalədə Rusiyanın İjevsk Elektromexaniki Zavodu, "Kupol” səhmdar cəmiyyətinin yerli mütəxəssislərin iştirakı ilə Çində “Harpiy-3” PUA-sını hazırlayıb sınaqdan keçirdiyi bildirilir.
"Harpiy-3"ün döyüş başlığının çəkisi 50 kq, uçuş məsafəsi isə 2000 km-dir.
İki kəşfiyyat mənbəsindən məlumat alan "Reuters" isə yazıb ki, "Kupol" 2024-cü ilin əvvəlində Rusiya Müdafiə Nazirliyinə hesabat verərkən Çindəki obyektlərdə “Harpiy” da daxil olmaqla pilotsuz təyyarələrin kütləvi istehsalının yaradılması imkanlarını açıqlayıb.
Çin Xarici İşlər Nazirliyi belə bir layihə haqqında məlumatlı olmadıqlarını bəyan edib. Bildirilib ki, ölkədə hər hansı PUA-nın ixracı ilə bağlı məsələlərə ciddi nəzarət var. Bu, “Çinin tipik mövqeyi”dir. Lakin eyni zamanda, Çinin ZFB-05 zirehli maşınlarının Ukraynadakı döyüşlərdə peyda olması bir sıra suallar yaradıb.
AzVision.az
Geri qayıt