“Milli Məclis qərara gəlsə müharibə şəraitidir, o zaman Xaçaturyan barəsində ölüm hökmü çıxarıla bilər”
31-07-2023, 09:26
Milli Məclisin İnsan hüquqları komitəsinin sədr müavini Tahir Kərimli Meşəli soyqırımı hadisələri ilə bağlı saxlanılaraq məsuliyyətə cəlb edilən Xaçaturyan Vaqif Çerkezoviç barəsində ölüm hökmünün çıxarılması təklifinə münasibət bildirib.
DİA.AZ-ın məlumatına görə, T.Kərimli Pravda.az-a açıqlamasında deyib ki, onun saxlanılması Azərbaycan cəmiyyətində məmnunluq hissi yaradıb.
“Təsəvvür edin, bu şəxs sürücü olmasına baxmayaraq, qətllər törədib, mülki və dövlət əmlaklarına ziyan vurub, ona görə ciddi cəzalanmalıdır. Şübhəsiz, bu şəxs edam cəzasına layiqdir. Azərbaycanın Konstitusiyasında ölüm hökmü nəzərdə tutulur, sadəcə, 1998-ci ildə moratorium qoyulub. Bu o demək deyil ki, kiminsə barəsində ölüm hökmü çıxarıla bilməz, Konstitusiyanı məhdudlaşdırmaq olmaz. Burada bir məsələ var, ölüm hökmləri müharibə şəraitində icra olunur. Azərbaycanda müharibə şəraiti varmı? Ermənistan və Azərbaycan arasında sülh müqaviləsi hələ imzalanmayıb. Milli Məclisdə təsdiq olunmayan üçtərəfli bəyanat var. Sülh sazişi imzalanmayıbsa, deməli, Ermənistan və Azərbaycan arasında münaqişə hələ bitməyib. Xaçaturyan cinayəti də müharibə şəraitində törədib. Bilirik ki, beynəlxalq təzyiqlər çox olacaq. Ölüm hökmünü ömürlük həbs cəzası ilə də əvəz etmək olar. Milli Məclis qərara gəlsə ki, hazırda müharibə şəraitidir, o zaman ölüm hökmü icra oluna bilər”, - T.Kərimli qeyd edib.
Qeyd: Azərbaycanın Baş Prokurorluğunun iyulun 29-da yaydığı məlumatda qeyd olunub ki, qanunsuz erməni silahlı birləşmələrinin üzvləri tərəfindən 22 dekabr 1991-ci il tarixdə Xocalı rayonunun Meşəli kəndində Azərbaycan milliyətindən olan şəxslərin soyqırımı, deportasiyası, kənd sakinləri və dövlətə məxsus çoxsaylı əmlakı məhv etmə və zədələməklə külli miqdarda maddi ziyanın vurulması faktları üzrə Azərbaycan Respublikası Cinayət Məcəlləsinin müvafiq maddələri ilə Azərbaycan Respublikasının Prokurorluq orqanları tərəfindən başlanmış cinayət işinin istintaqı davam etdirilir. İstintaqla müəyyən edilib ki, qeyd olunan tarixdə 1955-ci il təvəllüdlü, Azərbaycan Respublikasının vətəndaşı, Əsgəran rayonunun Badara kəndində doğulmaqla həmin kənddə yaşamış, Xankəndi şəhər avtomobil nəqliyyat müəssisəsində sürücü işləmiş Xaçaturyan Vaqif Çerkezoviç erməni milliyyətindən olan digər şəxslərlə birgə Meşəli kəndində yaşamış azərbaycanlıları bir milli qrup kimi bütövlükdə məhv etmək məqsədilə müxtəlif silahlardan, o cümlədən, odlu silah və piyadaların döyüş maşınından istifadə etməklə həmin kəndə silahlı basqın edib azərbaycanlı milliyyətindən olan 25 nəfəri öldürüb, 14 nəfər şəxsə müxtəlif dərəcəli bədən xəsarətləri yetirib, 358 nəfər azərbaycanlını isə beynəlxalq hüquq normaları və Azərbaycan Respublikasının qanunları ilə müəyyən edilmiş əsaslar olmadan qanuni yaşadıqları yerlərdən didərgin salıb. Bundan başqa, Xaçaturyan Vaqif Çerkəzoviç qabaqcadan əlbir olduğu şəxslərlə birgə cinayətkar hərəkətlərini davam etdirərək dövlətə və kənd sakinlərinə məxsus əmlakları məhv etmək və zədələməklə ümumilikdə 5 milyon 496 min 900 manat məbləğində maddi ziyan vurub. Aparılan cinayət işi üzrə kifayət qədər əsaslı şübhələr yarandığından Xaçaturyan Vaqif Çerkezoviçin Azərbaycan Respublikası Cinayət Məcəlləsinin 103 (soyqırımı) və 107-ci (əhalini deportasiya etmə və ya məcburi köçürmə) maddələrilə təqsirləndirilən şəxs qismində cəlb olunması barədə qərar qəbul edilmiş, lakin olduğu yer istintaqa məlum olmadığına görə barəsində 12 noyabr 2013-cü il tarixdə beynəlxalq axtarış elan edilməklə məhkəmənin qərarı ilə həbs qətimkan tədbiri seçilib. Keçirilmiş axtarış tədbirləri nəticəsində 29 iyul 2023-cü il tarixdə Vaqif Xaçaturyan Beynəlxalq Qırmızı Xaç Komitəsinin vasitəçiliyi ilə müalicə almaq adı altında Ermənistan Respublikasına getmək istəyərkən Dövlət Sərhəd Xidmətinin hərbi qulluqçuları tərəfindən Azərbaycan-Ermənistan dövlət sərhədinin Laçın sərhəd-keçid məntəqəsində saxlanılıb. Vaqif Xaçaturyanın Bakı şəhərində tibb müəssisəsinə yerləşdirilməsi, zəruri tibbi yardımın göstərilməsi, həmçinin BQXK-nın nümayəndələrinin ona baş çəkməsinə şəraitin yaradılması təmin ediləcək. Hazırda cinayət işi üzrə digər təqsirləndirilən şəxslərin məsuliyyətə cəlb edilməsi üçün zəruri əməliyyat-istintaq tədbirləri davam etdirilir.
Geri qayıt