“Keçmiş DQMV anlayışı yersizdir və bu, 1991-ci ildən yoxdur"
19-08-2023, 11:17
"Azərbaycan çalışır ki, beynəlxalq dövriyyədə “Dağlıq Qarabağ” anlayışından istifadə olunmasın. Təəssüf ki, beynəlxalq ictimaiyyət sırf sovet-bolşevik qurumunun istifadəsindən imtina etməyə tələsmir, baxmayaraq ki, SSRİ üç onillikdən çox əvvəl siyasi və coğrafi xəritədən silinib".
DİA.AZ bildirir ki, bunu Reyting.az-a Milli Məclisin deputatı, politoloq Rasim Musabəyov deyib.
R. Musabəyov bildirib ki, BMT Təhlükəsizlik Şurasının iclasında müzakirə iştirakçılarının əksəriyyəti “Dağlıq Qarabağ” ifadəsindən istifadə edib:
"Mən şadam ki, onların bəziləri ilk dəfə “Stepanakert” əvəzinə “Xankədi şəhəri” dedilər və bu xətt hərtərəfli gücləndirilməlidir. Bununla belə, Qarabağın hələ də sülhməramlıların nəzarəti altında özünü separatçı elan edən rejimin idarə etdiyi hissəsinin adı əvvəlki kimi qalmaqdadır”.
Musabəyov xatırladıb ki, keçmiş “Dağlıq Qarabağ Muxtar Vilayəti” (DQMV) termini bu yaxınlarda Brüssel və Vaşinqton danışıqları platformalarında da istifadə edilib:
“Birincisi, bunun üçün reallığa deyil, tarixə istinad edirlər. 1989-cu ildə Azərbaycan SSR və SSRİ Konstitusiyasını pozaraq bu muxtariyyətin Ermənistan SSR-ə “birləşdirilməsini” elan edəndə DQMV ermənilərin özləri tərəfindən dağıdılıb. 1991-ci ilin payızında SSRİ-nin dağılması ərəfəsində ermənilər birtərəfli qaydada azərbaycanlıların fikrini nəzərə almadan qondarma “DQR”in müstəqilliyini elan etdilər. DQMV-nin 1923-cü ildə Azərbaycanın ali dövlət orqanları tərəfindən yaradıldığını nəzərə alaraq, 1991-ci ilin sonunda bu muxtariyyət onlar tərəfindən ləğv edilib. O vaxtdan bəri keçmiş "DQMV"-nin inzibati cəhətdən müəyyən edilmiş sərhədləri yoxdur. Əvvəlki 185 minlik əhali içərisindən azərbaycanlıların qovulmasından və Qarabağ səhra komandirlərinin repressiv rejimindən qaçan ermənilərin kütləvi şəkildə mühacirətindən sonra indi orada 50 mindən çox insan qalmayıb. Bu ərazidə real güc rus sülhməramlıların komandanlığıdır və separatçı rejimin qondarma “prezidenti”, “parlamenti”, “nazirləri” bəzək kimi çıxış edirlər”.
Musabəyov deyib ki, xarici diplomatların və medianın Qarabağ ermənilərinin muxtariyyət iddialarına keçmiş “DQMV” anlayışı ilə müəyyən qədər haqq qazandırmağa çalışması həyəcan doğurur: “Deməli, “DQMV” hətta “keçmiş” prefiksi ilə də beynəlxalq sənədlərdə yer tutmur. Daha dəqiq və neytral “Qarabağın ermənilər yaşayan hissəsi” anlayışıdır və bunu təbliğ etmək lazımdır".
Geri qayıt