İlqar Məmmədovun ANATOMİYASI...
26-08-2023, 08:47
İlqar Məmmədov haqqında cəmiyyətin siyasi kəsimində əvvəldən bir fikir formalaşmaqda idi ki, o, siyasətdə diletantdır və heç bir zaman uğur qazana bilməz.
Bəlkə də bəzi adamlar buna inanmırdı. Hesab edirdilər ki, siyasi partiya məktəbi keçmiş, təhsili, əlaqələri yüksək səviyyədə hesab olunan Məmmədovdan yaxşı və cəmiyyətə yararlı bir siyasətçi olacaq. Amma adam özü addımbaşı birinci fikirdə olanlara haqq qazandırmaqda davam edir. Sübut edir ki, siyasətdə ən diletantlardan biridir. O qədər diletant ki, yazdıqlarının, etdiklərinin, əməllərinin gülüş doğurduğunu belə bilmir.
Özünə hörmət edən siyasətçi fəaliyyətinin fərqində olmalıdır. Bəlkə də onun etdiyi hansısa cəmiyyətdə keçərli sayıla bilər. Dedikləri, danışdıqları, lap ədası haradasa, okeanın o, yaxud bu tayının hansısa meridianında, bəlkə də Afrika cəngəlliklərində, yaxud elə Mesapatomiya çöllərində kiminsə xoşuna gələ bilərdi və ya gələr.
Azərbaycanın özünəməxsus, spesifik siyasi mühiti var. Cəmiyyətimiz siyasətçilərini ciddi obrazda görür, qəbul edir, dəstəkləyir, yaxud da qəbul etmir, onu dəstəkləmir. Siyasətçinin Kefli İsgəndər obrazı cəmiyyətimiz üçün keçərsizdir. Bədii ədəbiyyatda qəbul olunsa da, siyasətdə qəbul olunmur. İlqar Məmmədovun “Telegram” kanalında keçirdiyi son sorğuya baxanda görürsən ki, adam siyasətdə Kefli İsgəndər obrazının birinci fazasındadır, heç ikinci fazaya da daxil ola bilməyib.
Mərhələnin dərəcəsini müəyyənləşdirəndən sonra məlum olur ki, niyə partiyasını qeydiyyatdan keçirmək üçün bu qədər zülm çəkir. Kefli İsgəndər obrazının birinci fazasında olduğundan ətrafına 5000 nəfər toplaya bilmir. Yanında olan 2-3 nəfər normal insanın isə gələcəyini, karyerasını, cəmiyyətə hansısa mərhələdə verə biləcəkləri töhfələri diletantlığı ilə bəribaşdan məhv edir, onlara olan etimadı da azaldır.
Natiq Cəfərli, Erkin Qədirli kimi cəmiyyətimiz üçün faydalı ola biləcək adamlar da onun diletantlığının və Kefli İsgəndər obrazının qurbanına çevrilirlər. Elə bir durum yaradır ki, cəmiyyət “dostunu göstər sənin kim olduğunu deyim” düşüncəsi ilə hərəkət etsin.
ReAL-ın bugünkü durumunun səbəbkarı İlqar Məmmədovdur. Onun sosial şəbəkə hesablarından bu aşkar görünür. İlqar Məmmədovun “Telegram” kanalında 651 abunəçisi var. 651 nəfər arasında isə keçirdiyi sorğunun yükü, mahiyyəti ən azı 651 minlikdir. Azı 651 min nəfər arasında keçiriməli olan sorğunu 651 nəfər arasında keçirmək siyasətdə müasir Kefli İsgəndərlikdir. Dövrümüzün və siyasətimizin müasir Kefli İsgəndəri 651 nəfər abunəçisinə müraciət edir:
“Qarşıdakı parlament seçkilərində Respublikaçı Alternativ Partiyasına səs vermək niyyətindəsiniz, amma təsəvvür edin ki, hakimiyyət bizim partiyanı ləğv edib seçkiyə buraxmır. Onda hansı partiyaya səs verərsiniz?”
Sualda işimiz yox. Sualdır, özünü müxalifətçi hesab edən hər kəs, hər bir təşkilat bu sualla seçicilərə müraciət edə bilər. Amma bəs say? Lap 651 nəfər ancaq sənə səs verəcəyini, yaxud sən olmasan, sənin partiyan olmasa, heç kimə səs verməyəcəyini yazsın, nə dəyişəcək? Özünü böyük siyasi xadim sayan adamın abunəçilərinin sayı cəmi-cümlətanı 651 nəfərdirsə, bəs onun böyük siyasətçiliyi harda qaldı?
Bu qədər iddiada olan “böyük siyasətçi”nin izləyicilərinin sayı bu qədər olur? Türkiyədə aktiv sosial şəbəkə hesab olunmayan “Telegram” platformasında bir bələdiyyə başkanının izləyicilərinin sayı aşağısı 14 000 nəfərdir. Rusiyada özünü müxalifət lideri adlandıran bir siyasətçinin izləyicilərinin sayı 230 mindən yuxarıdır. Belaruslu Tixanovskayanın abunəçiləi 32 mindən çoxdur. İlqar Məmmədovun isə 651 nəfər!!! 651 nəfər abunəçinin hər halda 500 nəfəri özünün qohum-əqrabasıdır. Amma keçiridiyi sorğuda heç onlardan da dəstək ala bilməyib.
Onun bu “taleyüklü sorğusu”na 190 nəfər yorum yazıb, 338 nəfər isə bu sorğunu görüb. Bəs partiyasının Ədliyyə Nazirliyinə təqdim etdiyi 5000 nəfər üzvü hanı? Onun “Telegram” kanalına niyə abunə olmurlar? Gülməlidir... Bütün bu faktlardan sonra kimsə iddia edirsə ki, ona qarşı qısqanclıq var və ya onu bilərəkdən qeydiyyata almırlar, deməli, adam doğrudan da Kefli İsgəndərdir. Özü də birinci fazada...
Rəfail Becanov
Cebhe.info
Geri qayıt