“Cəmil Həsənli dövlət çevrilişi hazırlamağa gedib”
4-12-2014, 11:35
“Qərb kəşfiyyatı Azərbaycanda niyyətlərinə çatmaq üçün AXCP-li Kərimov Əlidən və Milli Şura sədri Həsənli Cəmildən istifadə edir”.
Bunu Hafta.az-a açıqlamasında Müasir Müsavat Partiyasının (MMP) sədri Hafiz Hacıyev Milli Şura rəhbəri Cəmil Həsənlinin Birləşmiş Ştatlara səfərinə münasibət bildirərkən deyib. MMP sədri C.Həsənlinin bu cür səfərlərinin çox ciddi və təhlükəli xarakter daşıdığını deyib: “Təəssüf ki, bəziləri bunu ciddiyə almaq istəmirlər. Amma düşündüyümüzdən də həssas məsələdir. Son günlər Cəmil Həsənlinin fəallığı diqqət çəkməyə bilməz. Onu ABŞ Konqresində dinlədilər, təlimat verdilər. Hətta Cəmil Həsənli ermənipərəst hüquq müdafiəçisinin həbsdə olmasını da müzakirə ediblər. Milli Şura sədri Vaşinqtona ayaq açıb. Kərimov Əli isə ABŞ səfirinin əvəzedicisi ilə görüşür. İş bununla bitmir. Kərimov Əli həmin görüşlərində Azərbaycan xalqının və dövlətçiliyimizin əleyhinə xoşagəlməz fikirlər səsləndirir. Onlar Azərbaycanda dövlət çevrilişinin əsasını qoymaqdan ötrü dayanmadan, durmadan addımlar atırlar”.
Hafiz Hacıyev adıçəkilən müxalifət kəsiminin ABŞ-da daha irihəcmli görüşlər keçirəcəyini də vurğulayıb: “Bizdə olan məlumata görə, keçmiş Milli Şura sədri Rüstəm İbrahimbəyov da Həsənli Cəmillə ABŞ-da görüşəcək. Artıq hakimiyyətdən qovulmuş çoxlu pulu olan oliqarxlar da Amerikaya yığışıblar. Aldığımız məlumata görə, bunların Fransa və Almaniyada da görüşləri olmalıdır. Onların 2015-ci il parlament seçkilərinə aid qara planlarının olduğu da bizə məlumdur. Cəmil Həsənli dövlət çevrilişi hazırlamağa gedib. Hətta onun erməni əsilli kürəkəni də qayınatasını Qərbin nüfuzlu dairələri ilə görüşdürmək üçün hərəkətə keçib”.
Xatırladaq ki, Milli Şura sədri Cəmil Həsənli ABŞ-a səfər edib. Yayılan xəbərlərə görə, Milli Şura sədrinin bu səfəri işgüzar xarakter daşıyır.
Geri qayıt