Tovuzda ƏCAİB OLAY...
15-08-2018, 10:34
Bir müddət əvvəl ölkə mətbuatunda Tovuz rayonu, Düz Qırıqlı kənd Poçt şöbəsinin poçtalyonu kimi fəaliyyət göstərən Süleymanov Elməddin Fəxrəddin oğlunun heç də düz olmayan əməllərindən yazı yazılmışdır.
Onun barəsində tədbir görülməsi üçün hətta Azərbaycan Respublikasının Nəqliyyat, Rabitə və Yüksək Texnologiyalar naziri cənab Ramin Quluzadəyə həmin kənd sakini Hümmətov Rəfail Talıb oğlunun müraciəti də saytımızda dərc olunmuşdu.
Xatırladaq ki, Düz Qırıqlıda vaqe olan hadisələrin kökü yaxın keçmişdən başlamışdır.
Belə ki, həmin kənd sakini Anar Məhərrəm oğlu Məhərrəmov keçmiş MTN-nin Göygöl, Ağstafa rayon şöbələrinin rəisi olarkən vəzifəsindən sui-istifadə etməklə və aldatma yolu ilə Rəfail Hümmətovun ümumilikdə 200.000 ABŞ dolları məbləğində əmlakını və pullarını alıb mənimsəmişdir.
Legion.az bildirir ki, onun bu əməlləri barədə hüquq-mühafizə orqanları ilə yazışmaları Rəfail Hümmətov kəndin poçtu vasitəsi ilə göndərmiş və cavabları da həmin poçtla almışdır.
“Almışdır” demək də heç düz deyil, çünki az əvvəl Elməddin Süleymanovun “poçtalyon kimi fəaliyyət göstərir” yazmağımızın səbəbsiz deyildir. Gəlin “yaxın keçmiş”dən başlayaq.
Naziri Eldar Mahmudov olan keçmiş “MTN-çi rəis” Anar Məhərrəmov özü və ətrafına topladığı qohum-dostlarının vasitəsi ilə 2012-15-ci illər ərzində Rəfail Hümmətova və ailə üzvlərinə zorakılıq etməklə onların pullarını, avtombillərini və digər əmlaklarını zorla əlindən almışdır.
Hələ bu azmış kimi 2014-cü ildə Anar Məhərrəmov Moskvada istirahət edərkən, Ufa şəhərində yaşayan doğma qardaşı Natiq qəflətən vəfat etmişdir. Onun meyitini gətirmək üçün Hümmətov Rəfaildən 1 milyon rubl tələb etmiş, ala bilmədikdə isə qardaşının meyitini kəndlərinə gətirməyə məcbur etmiş və ona 9.000 dollar pul xərclətmişdir. Özü isə Rəfail Hümmətovun otelə ödədiyi pulu geri alıb kəndlərinə qayıtmışdır.
MTN dağıldıqdan sonra Rəfail Hümmətov Anar Məhərrəmovdan pullarını tələb etdikdə o, əvvəlcə ağlayıb-yalvarmış və “son qəpiyinə kimi qaytaracam” desə də, işini hərbiyə dəyişib verdiyi sözdən qaçmağa başlamış və hətta ona hədə-qorxu da gəlməyə başlamışdır.
Buna görə Rəfail Hümmətov şikayətlər yazmağa və kəndin poçtundan istifadə etməyə başlamışdır.
Anar Məhərrəmov və yaxınları bu səbəbə görə Rəfail Hümmətova qarşı bacardıqları qədər təsirlər göstərməklə, onu bu şikayətlərdən yayındırmaq üçün dəridən-qabıqdan çıxırlar.
Göstərdiyimiz kimi, şikayətləri ilə əlaqədar Rəfail Hümmətova poçt vasitəsi ilə sənədlər yollanılır, yazışmalar aparılır. Lakin, həmin sənədlərin bəziləri gec çatdırılır, bəziləri isə ümumiyyətlə ona verilmir. O, dövlət orqanlarında olub maraqlanarkən, ona bildirilir ki, cavablar və digər sənədlər onun ünvanına yollanmışdır.
Rəfail Hümmətov onun poçt sənədlərinə əngəl törədilməsində Düz Qırıqlı kənd poçtunun poçtalyonu Süleymanov Elməddin Fəxrəddin oğlundan şübhələnir.
Çünki, Süleymanov Elməddin “MTN-çi rəis” Anar Məhərrəmovun əmisi qızının həyat yoldaşıdır və Anar Məhərrəmov onu əvvəllər həmin poçt şöbəsinin rəisi vəzifəsinə düzəltmişdi.
Lakin, təxminən 2 il öncə poçtun pullarını mənimsəmək məqsədi ilə Elməddin Süleymanov özü öz başını yaralayıb və poçta basqın edilib soyğunçuluq olması barədə polisə yalan məlumat vermişdi. Polisdə yalanın üstü açılanda, Anar Məhərrəmov işə qarışaraq məsələni ört-basdır etdirmişdir. Elməddini isə poçtalyon vəzifəsinə keçirmişlər.
Beləliklə, 27.03.2018-ci il tarixdə Rəfail Hümmətov təsadüf nəticəsində görür ki, poçtalyon Süleymanov Elməddin kənddə aviakassada satıcı işləyən - Anar Məhərrəmovun qaynı Vüsal Bağırovun iş yerinə gəlib onun maşını ilə Tovuz şəhərinə gedirlər. Elməddin mərkəzi poçtdan poçtu alır və onlar kəndə Vüsalın evinə qayıdırlar. Elməddinin həmin bağlamanı aparıb Vüsalın evində yoxladıqdan sonra, evdən çıxıb yenə maşınla geri qayıdanda, Rəfail Hümmətovun onları maşınla izlədiyini görüb yollarını dəyişirlər, lakin o, başqa yolla hərlənib onların qarşılarına çıxaraq izlədiyini onlara biruzə verdikdə, onlar Rəfailin maşınını uzaqdan görüb poçta getmək üçün yenə istiqaməti dəyişib üçüncü yolla gedirlər. Rəfail isə poçtun qarşısında dayanır. Başqa küçə ilə gələn Vüsal Bağırov uzaqdan Rəfaili görüb, xeyli kənarda maşını saxlayıb poçtalyon Elməddin Süleymanovu düşürüb gedir.
Poçtun rəisi Fərid Hüseynovun iş otağında məlum olur ki, poçtalyon Elməddinin əlindəki bağlamada prokurorluqdan və məhkəmədən cəmisi 3 məktub var və onlar hamısı Rəfail Hümmətova gəlib. Həmin sənədlər poçtalyon Elməddin Süleymanovla Bağırov Vüsalın evində açılıb oxunub.
Poçtun rəisi Fərid Hüseynovun buna aid sualına poçtalyon Elməddin dəqiq bir cavab verməyib deyir ki, “Rəfailin bizi bir yerdə görməməsi üçün Vüsal maşını başqa istiqamətə sürdü”.
Məlumat üçün bildirək ki, Anar Məhərrəmov, onun qaynı Vüsal Bağırov və digərləri barədə Rəfail Hümmətovla həyat yoldaşı Məhbubə Məhərrəmovanın ünvanına Şəmkir rayon məhkəməsindən 08.01.2018-ci il tarixdə yollanmış qətnamələri poçtalyon Elməddin Süleymanov gizlədib vermədiyi üçün, vaxtında Apellyasiya şikayəti verə bilməmişlər. Məhkəmədə hakim Nemət Paşayev qətnamələrin göndərilməsi barədə poçt qəbzlərini onlara təqdim edəndə aşkar olur ki, imzalar onların deyil.
Poçtalyon Elməddin Süleymanov bu əməlləri qohumu - keçmiş “MTN-çi rəis” Anar Məhərrəmovun tapşırığı ilə ona görə edir ki, Anar Məhərrəmov, onun qaynı Vüsal Bağırov və digərləri barədə şikayətlərə əngəllər törətsinlər. Etdiyi şikayətlərlə bağlı dövlət orqanlarından ünvanına yollanmış sənədlər Anar Məhərrəmovun tapşırığı ilə poçtalyon Süleymanov Elməddin tərəfindən Anar Məhərrəmovun qaynı Bağırov Vüsala verilir və onun evində açılıb yoxlanılır, oxunur, sonradan ya məhv edilib verilmir, ya da vaxtından gec verilir. Çünki, son 8 ay ərzində DİN, Baş Prokurorluq, Ombudsman, Milli Məclis, Tovuz, Şəmkir rayonlarının prokurorluq, polis və məhkəmələrindən yollanmış sənədlərin bir çoxu Rəfail Hümmətova çatdırılmasa da, xəbərnamələrdə həmin sənədlərin ona verildiyi göstərilmişdir.
Bütün bunlara rəğmən Rəfail Hümmətov poçtalyon Süleymanov Elməddinin əməlləri barədə Azərbaycan Respublikası Nəqliyyat, Rabitə və Yüksək Texnologiyalar naziri cənab Ramin Quluzadəyə müraciət edərək tədbir görülməsini xahiş edir.
Nazir vətəndaşın müraciətinə görə dərhal Tovuz rayonuna Azərpoçtun İsax Cəfərov adlı əməkdaşını ezam etdirir. İsax Cəfərov Tovuz rayon poçt şöbəsinin rəisi Elşən Kəmərovu Düz Qırıqlı kənd poçtunun rəisi Fərid Əmirovu, poçtalyon Elməddin Süleymanovu və onun qaynatası – Anar Məhərrəmovun əmisi – Məhərrəmov Hüseyni kəndin çayxanasına toplayıb şikayətçi Rəfail Hümmətovu da oraya dəvət edərək, öz “razborka”sını apardıqdan sonra, Rəfail Hümmətova müraciətlə deyir ki, “Sənin şikayətin öz təsdiqini tapdı və mütləq poçtalyonun barəsində ən ciddi tədbir görüləcək.”
Poçt əməkdaşları və poçtalyon Elməddinin qaynatası tərəfdən Düz Qırıqlı kəndindən Bakıya təm-təraqla yola salınan İsax Cəfərov, nədənsə öz iş yerinə çatan kimi məsələni “unudur”. Nazirə müraciətdən 1 ay keçməsinə baxmayaraq vətəndaşa cavab verilmir. Rəfail Hümmətov məsələni İsax Cəfərovun yadına saldıqdan sonra “Azərpoçt” MMC-nin baş direktor müavini Sübhan Kazımovun imzaladığı 2-02-14/2580 saylı, 21 iyun tarixli məktubla Rəfail Hümmətova bildirilir ki: “Sizin Azərbaycan Respublikası Nəqliyyat, Rabitə və Yüksək Texnologiyalar Nazirliyinə ünvanlanmış Tovuz Regional Poçt Filialının Düz Qırıqlı kənd poçt şöbəsinin əməkdaşı barədə müraciətə aidiyyəti üzrə “Azərpoçt” MMC tərəfindən baxılmışdır.
İlk öncə “Azərpoçt” MMC-nin poçt xidmətlərindən istifadə etdiyinizə görə Sizə təşəkkür edirik.
Eyni zamanda bildirilir ki, müraciətinizdə qeyd olunanlarla əlaqədar müvafiq araşdırma aparılmış və sifarişli poçt göndərişinin ünvançıya çatdırılması üzrə mövcud qaydanı pozan əməkdaşlar barədə qanunvericiliyin tələblərinə uyğun olaraq müvafiq intizam tənbehi görülmüşdür. Nəzərə almağınızı xahiş edirik.”
Cavab məktubundan bilinir ki, poçtalyonla qaynatası “nazirlikdən gələn qonağı hörmətlə” yola salıblar. Ona görə də baş direktor gözlərini yumub məktubu imzalayıb. Məktubda isə nə ad var, nə soyad, nə də ki, vəzifə. 2 il öncə poçt rəisi Elməddinin təşkil etdiyi “poçta quldur basqını”nın da “razborkasını” yəqin belə “mükəmməl” yoxlayıblar ki, onu “aşağı vəzifəyə” keçiriblər.
Ən başlıcası isə odur ki, vətəndaşın müraciətinə dərhal reaksiya verən Azərbaycan Respublikası Nəqliyyat, Rabitə və Yüksək Texnologiyalar naziri cənab Ramin Quluzadə tərəfindən Düz Qırıqlı kəndinə ezamiyyə edilən İsax Cəfərov və başdansovdu cavab məktubunu imzalayan “Azərpoçt” MMC-nin baş direktorunun müavini Sübhan Kazımovun öz nazirlərinin tapşırığını göstərdiyimiz kimi “çayxana razborkası” səviyyəsində icra ediblər.
Sonda isə həmin şəxslərə xatırlatmaq istərdik ki, Poçt haqqında Azərbaycan Respublikasının Qanunu Azərbaycan Respublikasında poçt sahəsində fəaliyyətin hüquqi, iqtisadi, təşkilati əsaslarını müəyyənləşdirir, poçt xidmətləri göstərənlərlə istifadəçilər arasında münasibətləri tənzimləyir.
Nazirə müraciət etmiş vətəndaşın isə aşağıdkı hüquqları pozulmuşdur:
Azərbaycan Respublikasının Konstitusiyasının 32-ci maddəsinə əsasən hər kəsin şəxsi toxunulmazlıq hüququ vardır və hər kəsin yazışma, telefon danışıqları, poçt, teleqraf və digər rabitə vasitələri ilə ötürülən məlumatın sirrini saxlamaq hüququna dövlət təminat verir.
Bu hüquqların pozulmasına görə isə, AR Cinayət Məcəlləsinin 155-ci (Yazışma, telefon danışıqları, poçt, teleqraf və digər məlumatların sirrini pozma), 308-ci (Vəzifə səlahiyyətlərindən sui-istifadə) maddələri ilə cinayət məsuliyyəti nəzərdə tutulmuşdur.
Geri qayıt