Hər bir azərbaycanlının əbədi qürur duyacağı Komandan
31-10-2020, 09:55
Düşmənin puç olan xəyalları, darmadığın edilən canlı qüvvəsi, havaya sovrulan milyardlıq texnikası və ildırım sürəti ilə azad edilən tarixi torpaqlarımız. Azərbaycan qalibdir, tam qələbəyə sayılı günlər qalır. Tarixdə görünməmiş bu uğurların müəllifi İlham Əliyevdir - hər bir azərbaycanlının əbədi qürur duyacağı Ali Baş Komandan.
Azərbaycan döyüş meydanlarında göstərdiyi inanılmaz hərbi qələbələri ilə dünyanı heyran qoyur. Yüksək peşəkarlıqla reallaşdırılan hərbi manevrlər, ən müasir döyüş taktikası artıq çoxları üçün nümunə ola bilər. Azərbaycan ordusu Ermənistanın bir illik dövlət büdcəsi dəyərində hərbi texnikasını cəmi bir aya darmadağın edib. Bu, misli-bərabəri olmayan maddi ziyandır. Onsuz da müflis vəziyyətdə olan işğalçı Ermənistan üçün bu, əsl iflasdır. Ermənistan məhv edilən hərbi texnikasının, canlı qvvəsinin sayını-hesabını itirib. Bir sözlə, düşmənə yüzillər boyu unuda bilməyəcəyi amansız dərs verilib. Bu qələbələrimiz sözsüz ki, sarsılmaz vətəndaş birliyinin, xalqla ordu, Ali Baş Komandan arasında yaranan möhkəm həmrəyliyin təntənəsidir. Ortada sərt və qətiyyətli mövqe, ustalıqla yürüdülən düşünülmüş siyasət, zərgər dəqiqliyi ilə ölçülüb-biçilmiş taktika var. Bu, Azərbaycan Prezidentinin özünəməxsus kursu, unikal uğur formuludur.
Ermənistan bütün istiqamətlərdə iflic, məğlub vəziyyətdədir. Düşmən hər ötən gün daha öldürücü zərbələr alır və son günlərini yaşayır. Bu haqq-ədalətin bərpası, təntənəsidir. Əslində başqa cür ola da bilməzdi. İşğalçılığın, terrorun sonu bir gün gəlməli idi. Düşmənin həzin sonunu gətirmək xoşbəxtliyi Azərbaycan dövlətinə, xalqına və onun əvəzsiz lderinə nəsib oldu. Bu gün, həmin gündür. Azərbaycan xalqının otuz illik niskilinin, torpaq, vətən həsrətinin bitdiyi gün.
Düşmən isə son nəfəsində də murdar siyasətindən əl çəkmir. Terror, soyqırım, dinc əhaliyə qarşı hərbi cinayətlər. Ermənistan bununla həm də dünyaya meydan oxuyur. Paşinyan beynəlxalq hüquq və qanunları ayaq altına atır. İşğalçı heç bir sərhəd tanımır, hər gün daha da azğınlaşır, daha amansız vəhşiliklər törədir. Döyüş meydanlarında biabırçı məğlubiyyətin acısı dinc əhalimizdən çıxılır. Ermənistan bununla bölgədə sülhə və təhlükəsizliyə açıq təhdid olduğunu bir daha göstərir. Paşinyan hökumətinin bu faşizm siyasətinin, terror və soyqırım əməllərinin qarşısında Azərbaycan dövləti demək olar ki, təkbaşına mübarizə aparır. Çünki, bəzi dövlətlər, beynəlxalq təşkilatlar, xüsusilə də Minsk qrupuna daxil olan ölkələr Ermənistanın bu vəhşiliklərinə açıq-aydın göz yumur. Ən dəhşətlisi də budur ki, Ermənistan əvvəlki illərdə olduğu kimi bu gün də bir çox ölkələr tərəfindən silahlandırılır. Bu addım təkcə münaqişə bölgəsi üçün deyil, ümumilikdə region üçün, daha böyük anlamda dünya üçün təhlükəli gələcək vəd edir. Ermənistanın silahlandırılmasının konkret olaraq bir adı var: İşğala, terrora, soyqırıma, dinc əhaliyə qarşı vandalizm aktlarına dəstək. Bu dəstəyi məlum qüvvələr verir, özü də bütün dünyanın gözü qarşısında.
Bu gün Azərbaycan Prezidenti faktiki olaraq bir neçə cəbhədə müharibə aparır. Döyüş meydanlarında, informasiya cəbhəsində və diplomatik müstəvidə uğurla davam edən bu mübarizənin önündə İlham Əliyev dayanıb. Prezident hər gün, bəzən gün ərzində bir neçə dəfə xarici kütləvi informasiya vasitələrinin nümayəndələrinə müsahibələr verir. Dövlət başçısı istər cəbhədəki real vəziyyət, istərsə də Azərbaycanın tarixi həqiqətləri barədə doğru-düzgün məlumatları dünya ictimaiyyətinə çatdırır. İlham Əliyevin bu fədakar fəaliyyəti olduqca təqdirəlayiqdir, əhəmiyyətli və həlledicidir. Prezidentin qətiyyətli və sərt bəyanatları, dəyişməz mövqeyi proseslərin gedişatında ölkəmizin haqqlı mövqeyinin möhkəmlənməsini şərtləndirir. Çünki, cəbhədə əks-hücum əməliyyatları başlayandan bu günə kimi Azərbaycan bəzi beynəlxalq dairələrin haqqsız təziqləri ilə üz-üzədir. Lakin, Prezident İlham Əliyev ikili standartlar siyasəti yürüdən dünya güclərini, riyakar mövqedə dayanan bəzi ölkələri bütün hallarda susdurmağı bacarır, onlara öz yerlərini göstərir. Bu gün Azərbaycanın hansı dünya nəhəngləri ilə savaşdığı, Ali Baş Komandan İlham Əliyevin bu qüvvələr qarşısında necə əzmlə dayandığı və onları necə məharətlə neytrallaşdırdığı göz önündədir. Azərbaycan Prezidenti ölkəmizin milli maraqlarından, haqqlı mövqeyindən bir addım belə geri çəkilmir. Çünki, ölkəmizin müstəqilliyi, təhlükəsizliyi və rifahı, ərazi bütövlüyümüz İlham Əliyevin bir nömrəli amalı, ən başlıca məqsədidir.
Bu gün Azərbaycan cəmiyyətində tarixdə heç vaxt olmadığı kimi birlik, vəhdət, ruh yüksəkliyi və döyüş əzmi var. Bütün Azərbaycan Ali Baş Komandan İlham Əliyevin əmrində dayanıb. Bütün xalq ordusunun, əsgər və zabitinin arxasındadır. Belə birlik və həmrəylik, inamlı döyüş ruhu nümayiş etdirmək, şanlı qəhrəmanlıq salnaməsi yazmaq heç də bütün xalqlara nəsib olmur.
Azərbaycan hərbi əməliyyatları ilə düşməni sülhə məcbur etmək istəyir, daha çox qan tökülməməsinə, düşməni torpaqlarımızdan dinc yolla çıxarmağa çalışır. Bunun üçün son bir ayda Ermənistana dəfələrlə şans verilib. Humanitar atəşkəs barədə razılığa gəlinsə də Ermənistan buna əməl etməyib. Çünki, işğalçılıq, terrorçuluq siyasəti bu dövlətin canındadır, təməlindədir. Beynəlxalq qurumlar isə bütün bunlara nəinki təpki göstərir, əksinə, işğalçı ölkəyə gizli və ya açıq dəstək verir. Amma bütün bu cəhdlər uğursuz və əbəsdir. Çünki, Ermənistan və onun havadarları qarşısında keçilməz sədd, yenilməz güc və qüdrət dayanır. Bu reallıqları İlham Əliyev yaradır. Bir millət kimi başımızı uca edən odur. Qüdrətli Azərbaycanın, milli birliyin, həmrəyliyin, güclü ordunun, dönməz qələbələrin təməlində onun qətiyyəti, onun iradəsi və məxsusi liderlik bacarığı dayanır. İlham Əliyev xalqı ilə bərabər tarix yazır və bu tarixdə əbədi olaraq yaşayacaq.
Sahil Kərimli
Trend BİA-nın Baş redaktor müavini
Geri qayıt