Təhsil Nazirliyinin 10 milyonluq müəmmalı “tenderi”
7-12-2020, 08:42
Təhsil Nazirliyi bu ilin oktyabrında 10 milyonluq müəmmalı tenderə yekun vurub.
Reportyor.info xəbər verir ki, hər 2 tenderin qalibi “Simplex” QSC-dir. Qalib şirkətə ümumilikdə 10,388 milyon manat ödəniləcək.
Belə ki nazirliyin Təsərüfat Hesablı Əsaslı Tikinti və Təchizat İdarəsi digər malların alınması, eləcə də yumşaq inventar, yataq ləvazimatları və xüsusi geyimlərin alınması ilə bağlı elan etdiyi 2 açıq tenderi yekunlaşıb.
Lakin adından da göründüyü kimi, yumşaq inventar, yataq ləvazimatlarının alınması nəzərdə tutulur. Bu zaman qeyri-ixtiyari sual doğur ki, yataq dəstləri üçün 10 milyondan çox vəsait nəyə lazımdır?!
Ümumiyyətlə, bu vəsaitin şəffaf xərclənməsi, maliyyə hesabatlılığı nə dərəcədə obyektiv təmin olunur. Çünki sözügedən materialların alınması üçün 10 milyondan çox maliyyə fantastik məbləğdir.
Çox maraqlıdır ki, rəsmi açıqlamaya görə ötən il 18 oktyabr 2019-cu il tarixində elektron qaydada həyata keçirilmiş açıq tender prosedurunun nəticəsinə əsasən, yenə “Simplex” QSC qalib elan edilib.
Həmin təşkilatla 3 373 117 manat məbləğində müvafiq satınalma müqaviləsi imzalanıb.
Təhsil Nazirliyinin Təsərrüfat hesablı əsaslı tikinti və təchizat idarəsinin tender komissiyası bildirib ki, məqsəd 282100 “Sair xərclər” maddəsi üzrə malların satın alınmasıdır. Görəsən, “Sair xərclər” nə deməkdir?
Niyə incəlikləri açıqlanmır? Və bu “Sair xərclər” üçün 3 milyondan artıq vəsait ayrılması nə dərəcədə düzgündür, xərclənməsi şəffafdır?
Qeyd edək ki, Emin Əmirullayev 4 aydır təhsil naziri təyin edilib. Amma indiyə qədər hər hansı təklif, dəyişikliklə yadda qalmayıb. Yeni təhsil nazirinin fəaliyyəti haqda ayrıca araşdırma aparırıq.
Geri qayıt