BANK VTB-də qalmaqal:
23-01-2021, 09:09
Rusiyanın VTB Qrupunun ölkəmizdəki törəməsi Bank VTB (Azərbaycan) ASC-də qalmaqal yaşanır.
HİT.az xəbər verir ki, bankın Təhlükəsizlik idarəsinin rəisi Zahid Səmədzadə 19 yanvar tarixində işlədiyi banka və onun İdarə Heyətinin sədri Yevgeniy Kirinə qarşı iddia ilə Nəsimi rayon məhkəməsinə müraciət edib.
Vəkil Əkrəm Həsənovun sözlərinə görə, işin mahiyyəti mülki hüquq pozuntularından(deliktlərdən) əmələ gələn öhdəliklər üzrə mübahisədir və iddiaçı mənəvi zərərin ödənilməsini tələb edir:
"Ölkə tarixində hələ belə iddia olmamışdı. Görəsən, bank və onun rəhbəri Təhlükəsizlik idarəsinin rəisinə necə mənəvi zərər vura bilərdi axı? Vurubsa belə, bankda işləyə-işləyə həmin şəxs necə cürət edib bankı və onun rəhbərini məhkəməyə verib axı?..
Vəkil məhkəmə işindən təsadüfən xəbər tutduğunu bildirməklə yanaşı qeyd edib ki, bu bankın daxilində ciddi toqquşmalardan xəbər verir: "Bank yarandığı andan da belə olub. Orada 5 rəhbər dəyişib. Dəyişməyən təkcə Təhlükəsizlik idarəsinin rəisidir: bütün rəhbərləri bir-bir yola salır, onlar isə ona heç nə edə bilmir, çünki birbaşa Moskvadakı baş banka tabedir. Düz 10 il əvvəl Səmədzadəyə satınalmada yol verdiyi pozuntuya görə töhmət də elan olunmuşdu. Buna görə də o zaman bankı məhkəməyə vermişdi. Moskvanın göstərişi ilə töhmət ləğv olundu və o, iddianı geri götürdü. Yəni bankda kifayət qədər güclü şəxsdir və idarəetmənin bütün sahələrinə, o cümlədən kreditlərin verilməsinə ciddi təsir edə bilir.
Yeri gəlmişkən, bu bank ölkəmizdə ən iri problemli kreditlər portfeli olanlardandır. Ötən ilin 9 ayının nəticəsinə görə verdiyi 243 milyon manat məbləğində kreditlərin 161 mln. manatı (yəni 2/3 hissəsi) problemli idi. Özü də bu kreditlərin adekvat təminatı da yoxdur: götürdüyü girovlar, bir qayda olaraq, verilən kredit məbləğlərindən bir neçə dəfə azdır. Təbii, belə vəziyyət ilk növbədə bankın təhükəsizlik sisteminə dair əsaslı suallar yaradır…"
Vəkilin dediyinə görə, Moskvadan müdaxilə olunmasa, çox maraqlı məhkəmə prosesi ola bilər: "Əlbəttə, əgər Moskvanın göstərişi ilə bankın rəhbəri tabeliyində olan Səmədzadənin istədiyini etməsə və o da iddiasını geri götürməsə. Bir də gördüz ki, bu rəhbəri də yola saldılar və problemli kreditlərin həddi növbəti rekordu vurdu".
Geri qayıt