“Doyunca yemək olmur, əti yaddan çıxartmışıq”
15-03-2021, 09:15
Kijabə qəsəbəsi Astara rayonun dağlıq ərazisində yerləşir. Yolmuz da bu qəsəbəyədir. Qəsəbənin əsas yolu asfaltlaşdırılsa da, ara yollar təmirsizdir. Qəsəbə sakini Təbriz Həndəmov deyir ki, bu illər ərzində azca asfalt yol salınıb, bir də təzə məktəb tikilib:
“Kim təzə yaşayış üçün fərdi ev inşa edibsə, bilin ki, ya Rusiyada işləyir, ya da biznesi var. İşsizlikdir. Cavanlar daş karxanalarına işləməyə gedirlər. İki ildən sonra onlarin da belində yırtıq əmələ gəlir, əlilə çevrilirlər. Deyirlər ki, daş karxanaları əlil istehsal edilən yerdir. Bunu bilə-bilə gedirlər. İndi əlillik də vermirlər. Sərt karantin rejimi olanda, (Koronavirus pandemiyasi ilə bağlı ötən ilin martından ölkədə karantindir. Rejim bəzən sərtləşdirilir) daş işinə də gedə bilmirlər.”
“Külək əsəndə elə bilirik ki, evi aparacaq”
Yolu maşınla davam etmək mümkün olmadı. Yolun yarısını piyada getməli olduq. Gəlib Həndəmovların yaşadığı evə çatdıq. Təbriz Həndəmovun sözlərinə görə, ev ötən əsrin 80-ci illərində inşa edilib:
“Sovet dövründə də ehtiyac içində yaşamışıq. Atam məcbur olub gildən ev tikib. Baxın, suvaqları tökülür. Evin arxa hissəsi əyilib. Qar, yağış yağanda qorxudan yata bilmirik. Külək əsəndə elə bilirik ki, evi aparacaq.”
Onun deməsinə görə, evin qəzalı vəziyyətə düşməsi onları çətinə salıb:
“O tərəfdən yer sürüşə-sürüşə gəlir. Hər dəfə yer sürüşəndə biz hiss edirik. Evin yararsız hala düşməsinin bir səbəbi də yerin sürüşməsidir. Yerin sürüşməsi nəticəsində qonşumun evi dağıldı, yenisini inşa etdilər. Mənə deyirlər ki,evin sürüşmə zonasından 50 metr uzaqdadır. İnanın ki, 20 metrdən də azdır. Bir gün torpaq üstümüzü örtəcək.”
“Fövqəladə Hallar Nazirliyi deyir ki, evi sığorta elə”
Təbriz Həndəmov-un deməsinə görə, rəsmi orqanlara dəfələrlə məktubla müraciət edib, lakin nəticəsi yoxdur:
“Əvvəllər ildə 1-2 məktub yazardım.İki ildir ki, tez-tez şikayət məktubları yollayıram. Fövqəladə Hallar Nazirliyi deyir ki, evi sığorta elə.Kim o evi sığorta edər? İndi heç məktublara da cavab vermirlər. Prezident dəfələrlə deyib ki, şikayət məktublarına həssaslıqla yanaşın.Allaha and olsun,imkanım olsayadı bunlara heç vaxt üz tutmazdım.Carəsizlikdən dövlət orqanlarına müraciət edirəm.”
Təbriz Həndəmovun həyat yoldaşı Əfsanə Həndəmova isə bunları deyir:
“Bu dağılmaqda olan evdə 7 nəfər yaşayır. Üç azayaşlı uşağımız var. Bizimlə Təbrizin bir bacısı və bir qardaşı yaşayırlar. Hər ikisinin gözləri görmür. Dünya işığına həsrətdirlər. Onlara əlillik verirlər, o pullar da dərmana gedir ”
“Doyunca yemək olmur, əti yaddan çıxartmışıq”
O deyir ki,bir uşağı məktəblidir, dərs ləvazimatlarını,məktəb paltarlarını ala bilmir:
“Doyunca yemək olmur, əti yaddan çıxartmışıq.Novruz bayramı olacaq ( martın 21-də).Bayram süfrəsini açmaq üçün 200-300 manat pul lazımdır. Bayrama bu qədər pul xərcləsək bütün ayı gərək ac qalaq.”
O deyir ki, sərt qış aylarını arxada qoyduqlarına görə sevinirlər:
“Bura dağdır. Hava sərt keçir. Təbii qaz yoxdur. Odunla keçinirik. Qışa odun tədarük etmək üçün 300 manatdan çox pul xərclənir. Həyətdə elə də ağac qalmayıb, çoxusunu kəsib qışa tədarük etmişik. Paltarla yatırıq.”
Təbriz Həndəmovun azyaşlı uşaqları şüşəsi olmayan pəncərədən boylanırlar. Rəngləri solğundur. Yenə Təbriz Həndəmov danışır:
“Həyətdə atamın əkdiyi naringi ağacları var.İldə bir dəfə 100-200 kiloqram məhsul dərib satıram.Onda evə ət alıram.İldə bir dəfə.Bakıya gedib orda ailəmi dolandıra bilərəm.Orda iş var. Baci və qardaşıma görə qalmışam burada.Ev də dağılır.”
Rəsmilər nə deyir?
Astara rayonun Kijabə qəsəbə icra nümayəndəsi Sədail Qasımov da deyir ki, Təbriz Həndəmovun problemlərində xəbərdardır:
“Onun evi köhnə evdir.Qabaqcadan desəydi icra hakmiyyətindən bir kömək olardı.Orda sürüşmə yoxdur.Qardaşı həyətdə ev tikib. Deyib ki,mən Bakıdan gəlmirəm, sən bu evi özün üçün düzəlt.Rayon icra hakimiyyətinə müraciət olunub, ona kömək üçün söz veriblər.Üç dəfə evində olmuşuq.İqtisadi vəziyyət deyəndə ki, orada iki yataq xəstəsi var.Hər dəfə yardım olanda onu nəzərə alıram.Kasıb ailədir...”
Geri qayıt