Daha bir nazirin görəvdən alınacağı deyilir...
14-02-2022, 11:04
Azərbaycan hakimiyyəti daha bir dəyişikliyə hazırlaşır. DİA.AZ JAMAZ.İNFO-ya istinadla xəbər verir ki, yaxın günlərdə müdafiə naziri Zakir Həsənov da işdən çıxarılacaq.
Gələn xəbərlərə görə, Həsənov böyük ehtimalla əvvəlki iş yerinə təyinat alacaq. Belə ki, o, Daxili Qoşunların komandanı postunu tutacaq.
Həmin xəbərlərdə bu işdən çıxarma olayının dünən DTX tərəfindən keçirilən əməliyyatla heç bir bağlılığının olmadığı vurğulanır. Bildirilir ki, belə bir qərar xeyli əvvəl verilib.
Yeni nazirin kimliyi barədə isə hələlik dəqiq məlumat yoxdur. İddialara görə, Zakir Həsənovu əvəz edəcək nazir 44 günlük Vətən Müharibəsində döyüşmüş generallardan biri olacaq. Lakin həmin generalın hazırda Müdafiə Nazirliyində işləyib, işləmədiyi barədə dəqiq bilgilər yoxdur.
Qeyd edək ki, indiyə qədər Azərbaycanda müdafiə naziri postunda orduda yetişmiş şəxslər oturublar. Əsasən də nazirlər ya Baş Qərargah rəsiləri olublar, ya da nazir müavinləri. Əgər Zakir Həsənov işdən çıxarılarsa, onun yerinə potensial bir neçə namizədin olduğu da sirr deyil. Məsələn, Kərim Vəliyev Baş Qərargah rəisidir. Müharibədə iştirak edib. Ondan başqa, müdafiə nazirinin müavini Nizami Osmanovun da adını çəkmək olar. Son zamanlar onun da adı diqqət mərkəzinə düşüb.
Bir başqa namizəd isə Naxçıvandakı Ordu Birləşmələrimizin komandanı Kərəm Mistafayev sayılır. Hərçənd digər nazmizədlərlə müqayisədə onun şansının az ola biləcəyini düşünənlər də az deyil.
Lakin söhbət mənbələrin dediyi kimi, MN-in mərkəzi aparatından kənardakı namizədlərdən gedirsə, bu, daha çox namizəd barədə ehtimallar irəli sürməyə əsas verir. Məsələn, Xüsusi Təyinatlı Qüvvələrin komandanı Hikmət Mirzəyev, həm müharibədə göstərdiyi qəhrəmanlığı, həm də peşəkarlığı baxımından xalq tərəfindən daha çox sevilir. Və ya müharibə zamanı əsas döyüşlərin iştirakçısı olan korpus komandiri Mais Barxudarov da bu şansa sahibdir.
Bir başqa namizəd kimi, Qarabağ xanlığının banisi Pənahəli xan Cavanşirin nəslinin davamçısı, Xüsusi Təyinatlı Qüvvələr komandanının birinci müavini- Qərargah rəisi, Vətən müharibəsinin komandanlarından biri, Şuşanın ilk komendantı, Vətən Müharibəsi Qəhrəmanı general-mayor Zaur Cavanşiri (Məmmədov) göstərmək olar.
Bir sözlə, Ordumuzun daxilində hazırda görəv başında olan, amma MN-in Mərkəzi Aparında təmsil olunmayan yetərli qədər qəhrəman zabitlərimiz var ki, nazir postunu şərflə icra edə bilərlər.
Amma yeni nazir məsələsi ilə bağlı bəzi ehtimallar da var. Həmin ehtimallardan biri də yeni nazirin mülki şəxs ola bilməsi ilə bağlıdır. Bunu da belə əsaslandırırlar ki, NATO ölkələrində müdafiə nazirləri əsasən mülki şəxslərdən təşkil olunur. Ordunu isə Baş Qərargah rəisi idarə edir.
Belə bir islahatın indiki məqamda Müdafiə Nazirliyində həyata keçirilməsinin nə qədər mümkün olub, olmadığı barədə mütəxəssislərin fikirləri isə birmənalı deyil. Onlar hesab edirlər ki, müharibədən çıxmış Azərbaycan Ordusunun başına indiki məqamda mülki şəxsin gətirilməsinin faydasından çox ziyanı ola bilər. Bunu da belə əsaslandırırlar ki, Ermənistanla müharibə riski hələ davam edir, sərhəddə vəziyyət tam sabit deyil və belə məqamda MN-in başında peşəkar hərbçinin dayanması daha məqsədəuyğundur. Onlar hesab edirlər ki, gələcəkdə müdafiə nazirinin mülki şəxs olması barədə düşünmək olar.
Xatırladaq ki, son günlər Azərbaycan hakimiyyəti bir neçə kadr dəyişikliyi həyata keçirib. Belə ki, Rövnəq Abdullayev SOCAR-ın prezidenti postundan çıxarılaraq, iqtisadiyyat nazirinin müavini təyin edilib. Onun yerini isə iqtisadiyyat nazirinin birinci müavini Rövşən Nəcəf tutub.
Geri qayıt