Vəliyevlərin Rusiyadakı şirkəti 6 ildən sonra gəlir əldə etdi
17-02-2023, 11:49
Gəncə şəhər İcra Hakimiyyıtinin sabiq başçısı Elmar Vəliyev və Azərbaycanın hərbi prokuroru Xanlar Vəliyevin qardaşı Şahmar Vəliyevin Rusiyanın Yesentuki şəhərində təsis etdiyi “Rusel” şirkəti ötən il üçün maliyyə hesabatını açıqlayıb.
DİA.AZ-ın məlumatına görə, Yeniavaz.com şirkətin açıqladığı maliyyə hesabatına istinadən bildirir ki, “Rusel” şirkəti 2022-ci ildə 4 milyon 76 min rubl (54 min dollar) gəlir əldə edib və bu gəlirin cəmi 120 min rublu (1,6 min dollar) xalis mənfəət olub.
Məlumat üçün bildirək ki, yaşayış və qeyri-yaşayış binalarının tikintisilə məşğul olan şirkət 2016-cı ildə təsis olunub. Təsis olunduqdan sonra “Rusel” şirkəti ilk dəfə mənfəət əldə etdiyini bəyan edib. Şirkət 2021-ci ildə 1,24 milyon, 2018-ci ildə isə 1,25 milyon rubl zərər etdiyini açıqlamışdı.
Qeyd edək ki, hazırda şirkətin yeganə təsisçisi Şahmar Vəliyevdir. “Rusel”in direktoru isə Olqa Kərimovadır. Şahmar Vəliyevin Rusiyada təsisçisi olduğu daha bir şirkət “Rusel Park” adlanır. Bu şirkəti 2021-ci ilin noyabr ayında Nataliya Orlyuk adlı şəxs təsis edib və ötən ilin mart ayından isə şirkətin təsisçisi Şahmar Vəliyev olub.
Onu da qeyd edək ki, Şahmar Vəliyev 2017-ci ildə keçirilən Rusiya-Azərbaycan regionlararası forumu çərçivəsində Kislovodsk şəhərində “Rusel” sanatoriyasının tikintisilə bağlı müqavilə imzalayıb. Rusiya mətbuatının yazdığına görə “Rusel” sanatoriyasının tikintisinə 2018-ci ildə başlanılıb və 2021-ci ildə başa çatdırılıb.
Qeyd edək ki, Azərbaycanda da “Rusel” adı ilə fəaliyyət göstərən və Şahmar Vəliyeva məxsus şirkətlər var. Şahmar Vəliyevin direktoru olduğu “Rusel” şirkəti (VÖEN- 1600133861) dövlət qurumlarının keçirdiyi müxtəlif tenderlərdə qalib olub. Xətai rayonundakı “Rusel Plaza”nın da Şahmar Vəliyevə məxsus olduğu bildirilir. Bunlardan başqa Şahmar Vəliyev “Rusel” şirkəti ilə eyni ünvanda yerləşən "Azneftemaş" ASC-nin də prezidentidir.
Geri qayıt