Məmurlarımız üçün yeni pul qazanma sezonu start götürür
19-06-2014, 13:32
Yay fəsli gələr-gəlməz hər kəs istirahət üçün məkan axtarır. Kimisi ölkə xarcinə üz tutur, kimisi də Azərbaycanın səfalı guşələrinə gedib ağır iş aylarının yorğunluğunu çıxarır.
Uzun iş həftələrindən sonra dincəlmək, necə deyərlər "dərin bir nəfəs çəkmək" kimi bir şeydir. Ən azından səhər tezdən durmaqdan, işə getməkdən, işin əsəbini keçirməkdən, 8 saat klaviatura döyəcləməkdən, kompüterə gözlərini zilləməkdən (əgər işin kompüterdən asılıdırsa) və iş saatı tamamlayıb yorğun-arğın evə gəlməkdən azad olursan.
Yaddaqalan istirahət etmək üçün də gərək cibdə pul olsun. Hamı ayağını yorğanına görə uzadır. Yaxşı pulu, imkanı olan şəxslər ölkə kənarında yayın keyfini çıxarırsa, nisbətən kasıb təbəqə də bölgələrə üz tutur. Amma bölgələrimiz də nə şəraitinə, nə də qiymətlərinə görə heç də Antalyadan, Dubaydan, yaxud Avropanın hansısa ölkəsindən geri qalmır.
Yerli sakinlər isti yay günlərində əsasən istirahətlərini Qəbələ,Quba, Masallı, İsmayıllı , Şəki və digər səfalı rayonlarda edirlər. Təbii ki, müəyyən pul müqabilində.
Maraqlıdır, Azərbaycan istirahət etmək üçün nə qədər pul lazımdır? Azvision.az-ın məlumatına görə, məsələn, İsmayıllı rayonunda, İlisu kəndi yaxınlığında yerləşən "Green House" ailəvi istirahət mərkəzində bir nəfər üçün bir günlük qiymətlər kotec seçimindən asılı olaraq 60 AZN -lə 120 AZN arasında dəyişir.
Qaxda yerləşən "Eden Park Hotel" istirahət zonasında bir nəfər bir gün üçün yalnız oteldə qalmaq pulu olmaqla 25 manat ödəməli, 3 dəfə yemək daxil olmaqla 50 manat pul verməlidir. Nabranda "Atlant" Əyləncə və İstirahət Mərkəzində bir nəfər üçün yer pulu gündəlik 40 manatdır.
Xızıda "Cənnət Bağı" nda bir günlük istirahət qiymətləri 2 nəfər üçün səhər yeməyi daxil olmaql 55-80 manat, 2 otaqlı nömrə - 100 manat. Xaçmazda yerləşən "Çoban bulaq" istirahət kompleksində iki nəfər üçün bir günlük istirahətin qiyməti -60 -80azn civarındadır. Şəki rayonundakı "Küngüt" istirahət mərkəzində bir günlük yalnız oteldə qalmaq 50, 75, 100, manat arasındadır.
Ekspertlər isə bu mövsüm istirahət mərkəzlərində qiymətlərin bahalaşdığını bildirib. Onların sözlərinə görə, qiymət artımı əsasən yeni tikilən otellərdə müşahidə edilir. Bura nəqliyyat və yerli xərclər də daxildir. Yaxud da ki, iki nəfər üçün digər otellərdə orta qiymət yüz manatdır. Yalnız oteldə qalmaq xərci iki nəfər üçün 100 manatdır. Praktiki olaraq, iki nəfərin bir həftəlik istirahəti 700 manata başa gəlir. Bütün rayonlar üçün istirahətin orta stabil qiyməti 1000-1500 manatdır. Şamaxı, Qubada yeni açılmış otellərdə isə həftəlik qalma xərci 2 min manatdan artıq olur. Bahalı otellərdə qiymətlər fərqlidir .Şamaxıda, Qubada yerləşən bahalı otellərdə iki nəfərin qalma xərci hətta 5 min manata qədər dəyişir.
İstirahət qiymətləri rayonlara görə yox, rayonlardakı otellərə görə müəyyənləşir. Belə ki, Şamaxıda bir gecəsi 3000 manata olan otellər, 50 manata olan otellər də var. Qəbələdə 4 və 5 ulduzlu otellərdə orta qiymət 100-150 manat arasında dəyişir. Ona görə də rayonda harda qalmasından asılı olmayaraq, qiymətlər dəyişir. "Domik" adlanan yerlərdə qalmaq isə nisbətən ucuzdur. 7 gün təxminən 1000 manata başa gəlir.
Ekspertlər təsdiqləyirlər ki, ölkə xaricində istirahət xüsusən də qonşu ölkələrdəki istirahət ölkədaxilindəki istirahatə nisbətən daha ucuz başa gəlir. Nəzərə alsaq ki, Gürcüstanda istirahət hər gün üçün Azərbaycan vətəndaşları üçün ölkədaxili istirahətdən təxminən 60 faiz ucuzdur. Türkiyədə istirahət Azərbaycan daxilindəki istirahət mərkəzləri ilə müqayisədə təxminən 20 faizə yaxın ucuzdur.
Göründüyü kimi, ölkə daxilində də istirahət etmək üçün kifayət qədər vəsait olmalıdır. Bu isə sadə vətəndaşlar üçün əlçatmazdır.
Ekspertlər yaranmış vəziyyətdən bəzi məmurların qazanclı çıxdığını düşünür. Belə ki, bir çox yüksək vəzifəli şəxslər turizm sektoruna kifayət qədər "maya" qoyublar və faktiki olaraq "qaz vurub qazan doldururlar". Onların öz ciblərini doldurmaq niyyəti isə sadə vətəndaşları çıxılmaz vəziyyətdə qoyur. Adi insanlar yay tətilini mənalı etmək üçün pul tapa bilmirlər.
Məmurların turizm sektorundakı hegemonluğuna son qoyulmayacağı təqdirdə bu vəziyyət belə də davam edəcək. Onlar iri pullar qazanmağa, vətəndaşlar isə itirməyə məhkum qalacaqlar.
Bu vəziyyətdə mədəniyyət və turizm naziri Əbülfəs Qarayevin hərəkətə keçməsi qaçılmazdır. O, turizm şirkətlərinə gizli və ya aşkar himayəçilik edərək yay mövsümündən milyonlar qazanan bəzi məmurlara yerini göstərməli, sadə vətəndaşların da yay mövsümündən faydalana bilməsinə şərait yaratmalıdır.
Geri qayıt