Yeni rəhbərlik müəllimlərə təzyiq edir
26-07-2016, 10:37
DİA.AZ: - Məlum olduğu kimi, Bakı Slavyan Universitetində (BSU) kadr islahatları başlayıb.
BSU-nun iki yüksək vəzifəli əməkdaşı işdən azad olunub. Bunlar BSU-nun Kadrlar və Beynəlxalq Əlaqələr şöbələrinin müdirləridir. Bundan başqa, onlarla əməkdaş BSU-dakı vəzifələrindən azad olunmaqla bağlı ərizələr yazıblar.
Yeni rektor təyinatından sonra BSU-nun inzibati binasında təmir işlərinə də başlanılıb.
BSU-nun mətbuat katibi Adil Əliyev açıqlamasında Kadrlar və Beynəlxalq Əlaqələr şöbələri rəhbərlərinin işdən çıxarıldığını təsdiqləyib: "Onlar ərizə yazaraq öz xahişləri ilə vəzifələrindən azad olunublar”.
BSU sözçüsü digər əməkdaşların işdən çıxması barədə ərizə yazmasına münasibət bildirməyib. Bununla belə, o, universitetdə təmir işləri aparıldığını da təsdiqləyib.
Xatırladaq ki, bu il iyunun 23-də Nurlana Əliyeva BSU-ya rektor təyin olunub. Yeni rektor mətbuata açıqlamasında kadr dəyişikliklərinin olacağını bəyan edib.
Bununla bağlı DİA.AZ-a daxil olan informasiyada isə qeyd olunur ki, yeni rəhbərlik əslində ərizə yazaraq işdən çıxmaları üçün 20-yə yaxın müəllimə xəbərdarlıq etdikdən sonra onlar ərizə yazmalı olublar.
Mənbənin dia-az.life-a söylədikləri: "Yəni, bütün bunlar könüllülük əsasında baş tutmayıb. Hətta hədələnən müəllimlər də olub. Onlara deyilib ki, əks halda barələrində cinayət işi belə açıla bilər".
Qeyd edək ki, bütün bunlarla bağlı yeni rəhbərliyin rəyini öyrənməyə çalışsaq da, alınmadı. Amma yenə də qarşı tərəfi dinləməyə hazırıq.
Əlavə bilgilərimiz olacaq...
Geri qayıt