Buranın başçısı da sahibkarlıq sevdasına düşüb
2-12-2016, 11:19
Artıq dəfələrlə qeyd olunduğu kimi, bu gün rayon rəhbərliyinin fəaliyyətindən çoxsaylı narazılıqların əks olunduğu şikayət məktublarının yuxarı instansiyalara, eləcə də ölkə mətbuatına ünvanlandığı bölgələrimizdən biri də Ağstafa rayonudur. O cümlədən, redaksiyamıza indiyədək daxil olan çoxsaylı məlumatlarda da vurğulanır ki, Ağstafa Rayon İcra Hakimiyyətinin başçısı Məhərrəm Quliyevin qeyri-qənaətbəxş fəaliyyəti nəticəsində hazırda rayonda müşahidə olunan müxtəlif sosial problemlər sakinlər üçün bir sıra çətinliklər yaradıb. Bunlara misal olaraq təhsil, səhiyyə, yolların təmiri və əhalinin sosial müdafiəsi sahəsindəki nöqsanları göstərmək olar. Rayon sakinlərini xüsusilə narahat edən əsas problemlərdən biri də Ağstafanın yolları ilə bağlıdır. Məlumatlarda bildirilir ki, rayon mərkəzi istisna olmaqla, bütün yollar yaman gündədir. Yağış, qar yağan kimi xüsusən kəndlərdə nəqliyyatın hərəkəti iflic olur. Palçıq əlindən tərpənmək mümkün olmur. Halbuki hər il dövlət büdcəsindən Ağstafada yol infrastrukturunun yaxşılaşdırılması məqsədilə böyük məbləğlərdə vəsaitlər ayrılır.
Daha sonra məlumatlarda qeyd olunur ki, Məhərrəm Quliyev Kənd Təsərrüfatı Nazirliyinin Ağstafa rayonundakı heyvandarlıq təsərrüfatlarını da az qala özünün şəxsi obyektinə çevirib. Bu barədə bizə daxil olan məlumata görə icra başçısı rayonda Kənd Təsərrüfatı Nazirliyinin nəzdində fəaliyyət göstərən təsərrüfatlarının direktorlarını aylıq ödəmə yığımları ilə bezdirib. Daxil olan məlumata əsasən Ağstafada Kənd Təsərrüfatı Nazirliyinin nəzdində fəaliyyət göstərən M.Mikayılov adına qoyunçuluq təsərrüfatı və Səməd Vurğun qəsəbəsində Yardımçı Təcrübə Təsərrüfatı mövcuddur. İcra başçısı Məhərrəm Quliyev bu iki təsərrüfatı özünə şəxsi obyekti hesab edir və həmin təsərrüfatların gəlirlərini öz gəlirləri kimi idarə edir. Digər tərəfdən də, aldığımız məlumatlara görə hal-hazırda başçının özünün ceuran çölü deyilən ərazidə 14 yatağı vardır ki, burda sayı min başlarla hesablanan heyvan sürüləri bəslənilir.
Aldığımız bir başqa məlumatda isə vurğulanır ki, Məhərrəm Quliyev Ağstafada tikinti işlərinə sifarişlərin alınması üçün keçirilən tenderlərin də hamısına şərik olur. Belə ki, bu tenderləri yaxınları və ya qohumlarının nəzarətindəki şirkətlərə qazandıran icra başçısı ayrılmış vəsaitin 20 faizə qədərini özünə götürür. Tikintidən söz düşmüşkən, bu gün Ağstafanın məşhur “naxış daşı” karxanaları ətrafında yaranmış vəziyyət də xüsusilə maraq doğurur. Məlumat üçün bildirək ki, Ağstafa rayonun Tatlı kəndində çıxarılan naxış daşı həm bu kəndin rəmzinə çevrilib, həm də yerli sakinlərin qazanc mənbəyidir. Naxış daşı bir çox şəhər və rayonlarda evləri, həyətləri bəzəyir. İllər öncə insanlar ərazidə tikinti daşı tapdıqlarını iddia ediblər. Yaşayış məskənində bir neçə ev də bu daşdan hörülüb. Amma min-bir əziyyətlə qayalıqdan çıxan daşın zaman keçdikcə müxtəlif rəngləri aşkarlanıb ki, bunun da daha sonra divarlara, səkilərə bəzək kimi vurulması uyğun bilinib. Kənd sakinləri dekorativ daşı rayonun milli sərvəti hesab edirlər. Elə adını da Tatlı naxış daşı qoyublar. Əvvəllər Tatlının girişində bir neçə hektar ərazini əhatə edən məkandan kəndlilər dekorativ daşı çətinliklə çıxarırdılar. Çörəyini daşdan çıxaran sakinlər 1 kvadrat daşı 2 manata, bir maşını isə 150-200 manata satırdılar. Lakin bütün bunlar artıq keçmişdə qalıb. Aldığımız məlumatlarda bildirilir ki, bu gün naxış daşı çıxarılan bütün karxanaları artıq Məhərrəm Quliyev öz nəzarətinə alıb. Hətta icra başçısı bir müddət əvvəl həmin karxanalarda öz payı olan müavini Ramiz Tatarovu da bu işdən sıxışdırıb-çıxarıb. Digər tərəfdən isə, açıqlamalara görə hazırda icra başçısı ilə bu rayondan Milli Məclisin deputatı olan Nizami Cəfərov arasında məhz həmin karxanaların bölgüsü zəminində “mübarizə” gedir.
Daha sonra aldığımız məlumatlarda Məhərrəm Quliyevin rayondakı obyektləri barədə açıqlama verilir. Bildirilir ki, hazırda Ağstafada fəaliyyət göstərən 3 bank filialının (“Kapitalbank”, “Turanbank” və “Accsesbank”) icarə əsasında yerləşdikləri binalar da məhz başçıya məxsusdur. Həmçinin məlumata görə, Məhərrəm Quliyev Ağstafa mərkəzi rayon bazarının müdiri, Elmar adlı şəxsin elə bazarla üzbəüzdə tikdirdiyi “Səbət Market”ə də şərikdir.
Maraqlıdır ki, Ağstafa RİH-nin rəsmi saytında icra başçısının 2003-cü ilə qədər olan dövr ərzində həyat və fəaliyyəti barədə heç bir məlumat da yerləşdirilməyib. Rayondan aldığımız məlumatda isə, Məhərrəm Quliyevin hətta hərbi xidmətdə belə olmadığı vurğulanır.
Yazıda adı keçən bütün şəxslərin mövqelərini dərc etməyə hazırıq.
Geri qayıt