Nazim İbrahimov məsuliyyətdən yayınmağa çalışır
4-04-2018, 10:57
Son dövrlər Avropada mühacir həyatı yaşayan bir qrub şəxs tərəfindən Azərbaycan hakimiyyətinə və ayrı-ayrı vəzifəli şəxslərə qarşı "qara piar” kampaniyası aparılır. Həttə əksər hallarda söyüş və təhqirlərə əl ataraq əndazəni aşırlar.Sözsüz ki, Azərbaycan cəmiyyəti, dövlətə və dövlətçiliyə sadiq ictimaiyyət adamları onlara layiqli cavablarını verirlər. Lakin bu situasiya Azərbaycanın xarici siyasətini müəyyənləşdirən qurumların fəaliyyətinin sıfıra bərabər olduğunu göstərdi. Xüsusən də ölkəmizin diaspor siyasətinin olduqca yanlış istiqamətlənməsi, bu sahəyə ayrılan vəsaitlərin göyə sovurulması açıq-aydın göründü. Necə olur ki, bu qədər qara piar kampaniyası aparılır, amma Diasporla İş üzrə Dövlət Komitəsi öz üzərinə düşən öhdəliyi yerinə yetirərək 3-5 adama qarşı normal mübarizə apara bilmir? Bəlkə də bu qarayaxmaya cavab vermək istəmirlər? Bütün hallarda adıçəkilən qurum və onun rəhbərliyinin səriştəsizliyi ortadadır.
Maraqlı məqamlardan biri də odur ki, Diasporla İş üzrə Dövlət Komitəsinin sədri Nazim İbrahimov dünən müsahibə verərək özünə haqq qazandırmağa çalışıb. "Unikal” qəzeti komitə sədrinin müsahibəsinin bəzi məqamlarını analiz edib. Müsahibəbə öz səhvlərini də etiraf edən N.İbrahimov məsuliyyəti üzərindən atmağa çalışaraq, özünü quyunun dibinə salır.
Komitə sədrinə sual ünvanlanır ki, Azərbaycan Avropanın təbliğat-informasiya kanallarında nə qədər yer ala biləcək ki, məsələn, siyasi mübarizələrini hətta təhqirlə, söyüşlə aparan bəzi şəxslərin bu kampaniyası ciddi görünməsin?
N.İbrahimov belə cavab verir: "Son zamanlar sosial media insanların həyatında çox böyük yer tutmağa başlayıb. Bu yeni platformadan istifadə edən iki-üç yaramaz, ailə tərbiyəsi görməyən, vətən, dövlət sevgisinin nə olduğunu anlamayan, kimlərinsə beş-üç qəpiyinə uyaraq mənsub olduğu ölkə əleyhinə iş aparan sosial media qəhrəmanları üzə çıxıb. Azərbaycan, dövlət başçısı, ailə üzvləri, ölkənin siyasi elitası, prezidentin komandası, bir sözlə, dövlət haqqında olduqca yaramaz, tərbiyəsiz bir kampaniya aparırlar. Bu kampaniya əslində Azərbaycanın daxili auditoriyasına, insanları çaşdırmağa hesablanıb. Bilirsiniz, bayaq dediyim kimi, dövlətimiz inkişaf etdikcə, siyasətimiz daha da qətiyyətli olduqca bundan narahat olan dairələr bütün üsullara əl atırlar və bu da onlardan biridir. Onlar törətdiyi əməllərə görə yaşadıqları ölkələrin hüquq-mühafizə orqanları tərəfindən həbs də oluna bilər. İndi görünür, bu təxribatçı qrupun belə çirkin metod istifadə etməsi hansısa dairələrin marağındadır. Hər şey ona hesablanıb ki, Azərbaycan dövləti müəyyən addımlar atsın, bu insanlara qarşı hansısa sərt tədbirlər görsün və sonra da bundan dövlətimizə qarşı istifadə etsinlər. Ancaq bacarmayacaqlar, çünki dövlətimiz onların təsəvvür etdiyindən daha güclüdür. Azərbaycanda xalq hakimiyyətidir və bütün Azərbaycan xalqı da dövlət başçısının ətrafında sıx birləşib”.
Komitə sədrinin fikirləri əsasən ölkə başçısının gördüyü işlər, xalqın onun ətrafında birləşməsini özündə ehtiva edir. Ancaq o, məsələnin nüvəsindən kənarda dayanır. Ortaya sual çıxır, Avropada 3-5 kəndini bilməz adam bu boyda səs-küy yarada bilirsə, o zaman siz və rəhbəri olduğunuz qurum bütün illər ərzində nə işlə məşğul olmusuz? Dövlət büdcəsindən hər il milyonlarla vəsait ayrılır ki, ölkəmizin maraqlarını beynəlxalq aləmdə təmin edəsiz, xaricdə həm dövlət, həm cəmiyyət Azərbaycanı tanısın, öyrənsin. Ancaq Avropadan ölkəmizə ünvanlanan qarayaxma kampaniyası və onların cavabsız qalması onu göstərir ki, N.İbrahimov və onun komandası heç bir iş görməyib. N.İbrahimov deyir ki, bu gün söyüş və təhqir metodu ilə guya siyasi mübarizə apardıqlarını zənn edənlərin sayı 4-5 nəfərdir, onların da ətrafında birləşənlərin sayı bütün Avropa üzrə maksimum 30-40 nəfər olar ya olmaz:
"Hər yerdə də eyni adamlardır. Biz araşdırmışıq ki, bunların əksəriyyəti heç yerdə işləmir, demək ki, haradansa maliyyələşirlər. Əlbəttə ki, havadarları var, onlara vəsait verən konkret qruplar var, yəni onları Azərbaycan dövlətini sevməyən dairələr maliyyələşdirir. Eyni zamanda, müəyyən aldanmış insanlar da var”. Yaxşı, bəs bu günə kimi komitənin fəaliyyəti nəticəsində niyə anti-Azərbaycan dairələri ilə münasibətlər qurulmayıb? Azərbaycanın lehinə iş necə aparılıb ki, orada ölkəmizə qarşı qərəzli mövqedə olanlar var. Təbii ki, bu suallara cavab vermək olduqca çətindir.Ən maraqlısı odur ki, komitə sədri özü də bilnmədən, ya məcburiyyətdən səhvini etiraf edir: "Onu deyim ki, görünür, burada bizim də müəyyən mənada səhvimiz var. Çünki bəlkə də biz ərəb ölkələrində hazırda baş verən proseslərin məğzini ictimaiyyətə kifayət qədər düzgün çatdıra bilməmişik. "Ərəb baharı”ndan əvvəlki və sonrakı prosesləri düzgün izah edə bilməmişik. Bütün bunları Azərbaycan ictimaiyyətinə tam açıb göstərmək lazımdır ki, görsünlər bu ölkələrdə hadisələri kimlər başlatdı, nələr oldu və bu gün nə baş verir. Azərbaycanın daxilində və xaricində kim onlara havadarlıq edirsə, Suriyanı və Liviyanı görüb xalq qarşısında məsuliyyətlərini dərk etsinlər. Əgər, Allah eləməsin, sabah Azərbaycanda həmən ölkələrdəki vəziyyət təkrarlanarsa, bu, heç kimdən yan keçməyəcək. Belə bir söz var ki, inqilab birinci öz uşaqlarını yeyir. Allah bunu bizə göstərməsin, əgər bu ölkədə xaos yaranarsa, bəlkə də birinci zərbəsi elə onlara dəstək verənlərə dəyəcək”.
Göründüyü kimi, N.İbrahimov ölkənin diaspor siyasətinin iflasa uğradığını özü etiraf edir. Ölkə başçısı ona etimad göstərərək önəmli bir sahəni tapşırır, lakin o, bu etimadı doğrulda bilmir. Ən pisi isə odur ki, müsahibənin bir hissəsində səhvini etiraf edir, bir hissəsində isə məsuliyyəti boynundan atmağa çalışır. Bu da onu göstərir ki, artıq Nazim İbrahimov başını itirib. İllər boyu diaspor fəaliyyəti əvəzinə şəxsi maraqlarını təmin etdiyi üçün Azərbayacana qarşı layiqli münasibət formalaşmayıb. Bu gün ölkəmizin dünyada mövqeyi, tutduğu yer və ona münasibət də Prezident İlham Əliyevin şəsxi xarakterinə və fəaliyyətinə bağlıdır. Lakin diaspor fəaliyyətinin sıfıra bərabər olması ölkəmizə yönəlik mənfi tendensiyalara yol açır ki, bu da son dövrlər baş verənlər üçün zəmin yaradır. Hər halda, komitə sədri bu məsuliyyətsizlik və səriştəsizliyin adekvat cavabını alacaq. \\musavat.com\\
Geri qayıt