Gəray Gəraybəylinin rektor təyin olunması nəyi dəyişdi?
26-03-2019, 11:52
Azərbaycan səhiyyəsindəki vəziyyət günü-gündən acınacaqlı duruma düşür.
dia-az.life Faktinfo.az-ya istinadən bildirir ki, ölkə vətəndaşları sağlamlıqlarının qeydinə qalmaq üçün Türkiyə, İran, Rusiya, Gürcüstan, Avropa və digər ölkələrə üz tutur. Bu məqsədlə ay ərzində minlərlə vətəndaş müayinə və müalicə üçün xarici ölkələrə pul aparır. Respublikamızdan milyonlarla manat vəsait səhiyyə məqsədilə çıxarılır. Amma ölkəmizə müayinə və müalicə üçün gələn demək olar ki, yoxdur,səhiyyə turizmi ölü nöqtədən tərpənmir. Ən yüngül tibbi əməliyyatların aparılması üçün səhiyyəmizə güvən itib. Açığı müəyyən kəsim savadlı və təcürbəli həkimlərin də nüfuzu bəzi üzdən iraq həkimlərimizə görə aşağı düşüb.
Səhiyyə sistemində bu vəziyyətin yaranmasında heç şübhəsiz ki,peşəkar həkimlərin hazırlanmalı olunduğu Azərbaycan Tibb Universitetindəki neqativ halların xüsusi rolu var. Bir neçə il bundan əvvəl Azərbaycan Tibb Universitetinə Gəray Gəraybəylinin rektor təyin edilməsi belə bu ali məktəblə bağlı müsbət gözləntiləri doğrultmadı. ATU-da dəyişən ancaq kadrlar oldu.Tədrisin səviyyəsində heç bir yenilik baş vermədi. Bu da gələcək üçün ATU-nun yetişdirdiyi həkimlərin həmişəki kimi,nəzəriyyəçilərdən ibarət olacağını bir daha təsdiqlədi. Diqqət tədrisdə keyfiyyət dəyişikliyinə yönəlmədi,ancaq kadr dəyişikliyinə üstünlük verildi. ATU-da baş mühasib,Təsərrüfat işləri üzrə prorektor, dekanlar, kafedra müdirləri, laboratoriya rəhbərləri, Tədris Terapevtik Klinikası və Tədris Cərrahiyyə Klinikası direktorları, eləcə də əli pulla “oynayan” digər vəzifə sahibləri böyük narazılıq doğursa da, rektora ən yaxın şəxslərlə əvəzləndi.
Təbii, növbəti yazılarımızda detallı şəkildə mövzuya qayıdacağıq. Hələlik isə ATU-nun rektoru G.Gəraybəylinin Tədris Terapevtik Klinikası ilə bağlı həyata keçirdiyi “islahat”a nəzər yetirək. ATU-nun nəzdində olan bu klinikada nə dəyişib,hansı müsbət göstəricilərə nail olunub?
G.Gəraybəyli rektor təyin olunandan sonra Tədris Terapevtik Klinikasında 4 dəfə direktor dəyişikliyi baş verib. Hər direktor dəyişikliyi isə böyük ölçüdə yeni “komanda”nın formalaşması ilə nəticələnib.Belə vəziyyət isə ciddi narazılıqlara, qarşıdurmalara,xoşagəlməz söz-söhbətə gətirib çıxarıb. Hələ də bu klinikada normal ab-hava yaranmayıb. Budur,G.Gəraybəylinin ATU-ya gətirdiyi yenilik?!
Vaxtilə ölkə prezidenti İlham Əliyevin açılışını etdiyi Azərbaycan Tibb Universitetinin Tədris Terapevtik Klinikasında qiymətlər hazırda “əl yandırır”. Klinikaya müraciət edən xəstələrə həkimlərin qəbulu üçün əvvəllər 30 manat ödəniş müəyyənləşdirilmişdisə, hazırda bu məbləğ iki dəfədən də çox qaldırılıb. Təbii, 60-70 AZN ödənilməsi isə kütləvi şəkildə narazılığa səbəb olub.
Hətta Faktinfo.az saytının əldə etdiyi məlumata görə,həmin məbləği ödəyən xəstə 10-15 gün sonra səhhətində yaranmış narahatlıqla bağlı həkiminin qəbuluna düşmək istəyəndə təkrar ödəniş tələb olunur. Bu isə pasiyentləri qıcıqlandırır, az qala xəstəsini gətirən sağlam insan da orada xəstəlik tapır.
Bütün bunları Tədris Terapevtik Klinikasının girişindəki qeydiyyat şöbəsinə yaxınlaşmaqla müşahidə etmək, hansı həkimin qəbuluna düşmək üçün nə qədər pul istənildiyini görmək elə də çətin deyil.
Təəccüblüsü də odur ki, bu qədər gəlirin qarşılığında sözügedən klinikanın son iki ildə kommunal xidmətlərə-işığa,qaza,suya külli miqdarda borcu yığılıb.
ATU-nun Tədris Terapevtik Klinikası ilə bağlı olan qeyrimüəyənlik son aylarda nüfuzlu və peşəkar həkimlərin oranı tərk etməsi ilə də nəticələnir. Belə ki,Klinikanın Ürək-Damar Mərkəzində Kardioloq-Aritmoloq həkim Fərid Əliyev nəinki özü,onunla birlikdə çalışan həkim korpusu ilə birgə ATU-nun Tədris Terapevtik Klinikasını tərk edib, Bakı Sağlamlıq Mərkəzində çalışmağa üstünlük verib.Bütün bunlar isə uzun müddətdir klinikada sağlam mühitin olmamasından,hardasa narazılıqların varlığından xəbər verir.
Eləcə də, ATU-nun sözü gedən klinikasına yeni təyin olunan baş həkim və direktorla bağlı təyinatlar da kollektivdə təəccüb doğurur. Belə ki,baş həkim və direktorun elmi dərəcələri olmadan Tədris Terapevtik Klinikasına rəhbər vəzifələrə təyin olunması,indiyə qədər orada baş verməyən istisna hal kimi danışılır. O da qeyd olunur ki,söz-söhbətin “böyüməməsi” üçün baş həkimi sonradan ATU-nun kafedralarından birinə assent vəzifəsinə işə götürüblər. Faktinfo.az-a Kardioloq-Aritmoloq Fərid Əliyevin Bakı Sağlamlıq Mərkəzində işləməsini təsdiqləsələr də sayt ATU-nun sözügedən klinikası ilə bağlı digər suallara cavab ala bilmədi.
Geri qayıt