Mirmahmud Miratayev Astara gömrüyündə zülm edir…
7-05-2019, 10:04
Dövlət başçısı İlham Əliyev ötən il aprelin 11-də keçirilən növbədən kənar prezident seçkilərindən sonra kadr islahatlarını daha da sürətləndirdi.
Aprel seçkisindən sonra təsdiqlənən Nazirlər Kabinetinin yeni tərkibində xeyli sayda nazir və məmurların adlarını görmədik.
Onların arasında işdən azad olunması çoxdan gözlənilən Dövlət Gömrük Komitəsi sədri Aydın Əliyev idi. A.Əliyevin yerinə sürpriz kadr təyin olunmadı.
Elə onun müavini, adı həmişə monopoliya və s. məsələlərdə hallanmış Səfər Mehdiyev bu posta gətirildi. Bununla da gözləntilər varıydı ki, S.Mehdiyev bəlkə gömrükdə hansısa nöqsanları aradan qaldıracaq.
Hətta yeni gömrük komitəsi sədri bəyan eləmişdi ki, ölkədə inhisarçılığın bir faizini göstərsəniz, istefa edərəm. S.Mehdiyev daha da irəli gedərək açıqlamışdı ki, 1 manat rüşvət alsaq, həbsxanada oturmağa hazırıq.
Təbii ki, pafoslu açıqlamaların ardından ümid olunur bəlkə ciddi addımlar atılacaq, gömrükdə şəffaflıq təmin ediləcək, monopoliya qalxacaq, vətəndaşların əzab-əziyyətlə, basabasla sərhədi keçməsi rüsvayçılığı aradan qalxacaq.
Lakin təkcə Astara gömrük məntəqəsinə baş çəkmək və orada baş verənləri bir saat izləmək kifayətdir ki, S.Mehdiyevin bəyanatlarının sabun köpüyündən ibarət olduğunu anlayasan.
Reportyor.info-ya məlumat verən vətəndaşların sözlərinə görə, S.Mehdiyev vaxtını ayırıb Astara gömrüyünə getsin, özü həmin sıxlığın, basabasın içində qalsın və həyatına nifrət eləsin.
Çünki Astara Gömrük İdarəsinin rəisi Mirmahmud Miratayev vətəndaşlar üçün elə məngənə, gestapo sistemi yaradıb ki, insan çəkdiyi zülmdən intihar etmək istəyir.
M.Miratayev özü də oturduğu kabinetindən çıxıb bir dəfə sərhəd xəttinə gəlsin, xüsusi ilə həftə sonu hansı məşəqqətin, qəddarlığın, insanlığa sığışmayan haqsızlığın baş verdiyinə şahid olsun və adı-soyadından da bəlli olduğu kimi, bir seyid nəslinin övladı kimi əlini ürəyinin üstünə qoyub vicdanını dinləsin.
Vətəndaşlar bizə yazırlar ki, S.Mehdiyevin gömrükdə apardığı analoqsuz “islahat”lar Astara gömrük məntəqəsində göz deşir.
Vətəndaşlar saatlarla sərhəddə gözləməli olurlar, meymun qəfəsinə oxşayan dəmirlərlə əhatələnmiş labirintə salınırlar, havasız, ac-susuz növbəyə dayanırlar.
Bir-birini itələyənlər kim, dava-qırğına çıxanlar kim, rəsmən bir rəzalət yaşanır. Halbuki, İran gömrükçüləri vətəndaşları 10-15 dəqiqə ərzində pasportuna möhür vurub buraxırlar.
Məlumatda deyilir ki, İrandan qayıdarkən vətəndaşlar daha çox incidilir. İran sərhədini bir göz qırpımında keçən insanlar Azərbaycan sərhədində 4-5 saat ayaq üstə gözləməli olurlar.
Azərbaycan tərəfi bütün çantaları, yükləri bir-bir yoxlayır, insanları incidir, gözlədir və bir cəhənnəm yaşadırlar.M.Miratayev bir seyid övladı olaraq bu zülmə-zillətə necə dözə bilir?
Vətəndaşlar qeyd edirlər ki, S.Mehdiyevlə M.Miratayevin yaratdığı bu sistem birbaşa prezidentin siyasətinə, gömrüklə bağlı tapşırıqlarına, islahatlar paketinə ziddir.
Necə olur ki, İran tərəfini vətəndaşlar rahat, tez keçirlər, Azərbaycan isə gedəndə, əliboş insanları saatlarla gözlədir, qayıdanda əli dolu vətəndaşları yenə gözlədir.
İran isə hər iki halda vətəndaşı incitmədən yola salır. Çünki sistem işləyir, çantalar aparatla yoxlanır, hər hansı problem olursa baxılır.
Astara gömrüyü isə əsassız yerə həkimə, dərmana gedən yüzlərlə insanı incidir, buraxmır. Maraqlıdır ki, nə Rusiya, nə Gürcüstan sərhədində gömrükdə vətəndaşlarımız bu qədər əzab çəkir.
Sözsüz ki, bu ölkələrlə sərhədimizdə də gömrükdə vətəndaşlar yenə əziyyət görürlər. Lakin Astara gömrüyü sanki camaata işgəncə vemrəkdən həzz alır.
Bu da birbaşa prezidentə qarşı insanları qaldırmaq, narazı salmaq, islahatların əleyhinə iş görməkdir. Vətəndaşlar çağırış edirlər ki, S.Mehdiyev həqiqətən islahatlar aparırsa gəlib Astara gömrüyündə dayansın, M.Miratayevin fəaliyyətinə nəzər salsın. Aralarında qadınlar, yeniyetmə uşaqlar, yaşlı kişilər var. Hamısı işgəncə görürlər.
Qapı açılır. Basabas düşür… Sıxılmış adamların fəryadı eşidilir. Kim güclüdürsə içəriyə girir. Qapı bir neçə dəqiqə açıq qalır.
Sərhədçilərlə gömrük işçiləri qapını bağlamaq istəyirlər. Qapının yanında duranlar isə buna imkan vermək istəmirlər.
Nəhayət, qapını bağlaya bilirlər. Sakinlər bura “meymun kletkası” deyirlər. Onlar hesab edirlər ki, Astara gömrüyü işgəncə aparatıdır.
Xatırladaq ki, Astara Gömrük Məntəqəsində İrana getmək istəyən bir Azərbaycan vətəndaşı İlqar Kərimov vəfat etmişdi. Həmin gün İrana getmək istəyənlər çox olub.
Hadisə şahidlərindən Fərbiyə İbayevanın dediklərinə nəzər salaq: “Adamların fəryadı qulaq batırırdı. Ölən adam da bizim aramızda idi. Mənim iki qolum da zədələndi.
Biz içəriyə girdik, qapını yenidən bağladılar. O adam münasib bir yer tapan kimi əyləşdi. Görünürdü ki, sıxıntı keçirdib. İranla Azərbaycan arasında olan körpüyə çatanda kənara çəkilib əyləşdi. Orda da keçindi”.
Azərbaycandan İrana gedən vətəndaşlardan gömrükdə növbədə ölüm hadisələri bundan əvvəl də baş verib. Biz Gömrük Komitəsinin və Astara gömrük rəisinin fikirlərini, problemlə bağlı mövqeyini dərc etməyə hazırıq.
Geri qayıt