Azərbaycanda icra başçısı tətilə 1 milyon manat xərclədi
28-05-2019, 17:36
Lənkəran şəhərinin icra hakimiyyətinin başçısı Taleh Qaraşov haqda sensasion xəbər yayılıb.
Yayılan məlumatlara görə, Taleh Qaraşov 11 nəfər ailə üzvü ilə birgə (övladları və nəvələri) Çexiyaya səfər edib. AZAL şirkətinin Bakı-Praqa reysi ilə bu ölkəyə səfər edən icra başçısının məqsədi yaxınları ilə birgə istirahət etmək olub.
Qaraşovlar ailəsi Azərbaycan oliqarxlarının məskunlaşdığı Karlovı Varı şəhərinə gedib. Maraqlıdır ki, icra başçısı bütün ailə üzvləri üçün təyyarədə biznes-klassa bilet alıb. Yəni icra başçısı təyyarənin biznes-klass salonundakı bütün yerləri faktiki olaraq alıb.
Qeyd edək ki, AZAL-da bir biznes-klass biletinin qiyməti 1500 manatdır. Deməli, aylıq maaşı 2 min manata yaxın olan məmur təkcə aviabiletlərə 16500 manat xərcləyib.
Bundan başqa icra başçısı və ailə üzvləri Karlovı Varıdakı dəbdəbəli "Carlsbad Plaza” otelində yerləşiblər. Ailənin gündəlik hotel xərci 12 min dollar təşkil edib. İcra başçısı və ailə üzvləri bu oteldə 21 gün qalıb.
Artıq yay tətilinin başlanmasına az qalıb və sadə hesablamalar deyir ki, tətili başlamamış Lənkəranın icra başçısı artıq bir milyon manat xərcləyib. (Yenisabah.az)
Geri qayıt