“BMTM-in sədrinin xarici səfərləri şəxsi hesabına həyata keçirilib”
6-08-2019, 12:07
Dünən PİA.az saytında “Fərid Şəfiyevin işçiləri 5 aydır maaş ala bilmir, özü isə...” adlı məlumat dərc edilib. Bununla bağlı Beynəlxalq Münasibətlərin Təhlili Mərkəzinin mətbuat katibi Məlahət Nəcəfova saytımıza təkzib məktubu yollayıb. Təkzib məktubunu olduğu kimi oxucularımızın diqqətinə cəlb edirik:
“Ötən gün pia.az saytında Beynəlxalq Münasibətlərin Təhlili Mərkəzi (BMTM) ilə bağlı həqiqətə uyğun olmayan informasiyalar dərc edilib. Bildirmək istərdik ki, BMTM Azərbaycan Respublikası Prezidentinin 6 fevral 2019-cu il tarixli fərmanı ilə yaradılıb. Ölkə başçısının 19 aprel tarixli fərmanı ilə “Beynəlxalq Münasibətlərin Təhlili Mərkəzinin Nizamnaməsi” təsdiq edilib. İyulun 15-də BMTM-in büdcə və ştat cədvəli Nazirlər Kabineti tərəfindən təsdiqlənib. Mərkəzin cari hesabı avqustun 2-də Azərbaycan Beynəlxalq Bankının Səbail rayonu filialında açılıb. Bu günə qədər hesaba maliyyə vəsaiti köçürülməyib. Bununla əlaqədar nə mərkəzin sədri, nə də əməkdaşlar maaş və ya digər məvacib almayıblar. O cümlədən iddia olunanların əksinə, bu müddət ərzində BMTM-in sədrinin xarici səfərləri şəxsi hesabına həyata keçirilib. Səfərlər və ezamiyyələrlə bağlı göstəriş və icazələr Prezident Administrasiyası tərəfindən verilib. Onların əksəriyyəti Ermənistan-Azərbaycan, Dağlıq Qarabağ münaqişəsi ilə bağlı həqiqətlərin dünya ictimaiyyətinə çatdırılmasına dair səfərlər olub. Bu baxımdan BMTM-in sədri Fərid Şəfiyev aprelin 9-da BMT-nin Cenevrə bölməsində “Münaqişə ərazilərində qeyri-qanuni iqtisadi fəaliyyətlərin insan hüquqlarına təsirləri” mövzusunda beynəlxalq konfransda iştirak edib.
Beləliklə, heç bir əsası olmadan, faktlar yoxlanılmadan BMTM, o cümlədən Mərkəzin səfri Fərid Şəfiyev barədə həqiqətə uyğun olmayan informasiyalar yayılıb. BMTM yarandığı ilk gündən şəffaflığı özünə prioritet seçib. Bu baxımdan Mərkəzin fəaliyyəti və digər təşkilati məsələlərlə ilə bağlı sədr Fərid Şəfiyev avqustun 2-də keçirdiyi mətbuat konfransında da məlumat verib. Təsadüfi deyil ki, bu informasiyalar məhz BMTM sədrinin mətbuat konfransı zamanı Mərkəzdə Ermənişunaslıq şöbəsinin yaradılacağı ilə bağlı bəyanatı və bu xəbərlərin erməni mətbuatında geniş ajiotaj doğurmasından sonra yayılıb.
Qeyd etmək istərdik ki, BMTM fəaliyyətini açıq şəkildə həyata keçirir. Fəaliyyəti və digər məsələlərlə bağlı bütün media qurumları ilə əməkdaşlıq etməyə hazırdır və bu strategiya bundan sonra da davam edəcək”.
Qeyd edək ki, təkzib olunan məlumat tərəfimizdən yoxlanılıb və doğrudan da işçilərin maaş almaması təsdiqlənib və bundan sonra dərc olunub.
Geri qayıt