Gömrükdəki baha rüsumlar bizi belə müflis edir...
26-06-2020, 12:15
Məlum olduğu kimi, koronavirus pandemiyası səbəbindən iqtisadiyyatın bir çox sahələrində durğunluq müşahidə olunmaqdadır. Müşahidələr göstərir ki, mövcud vəziyyətdən zərər görən sahələrdən biri də avtomobil bazarıdır.
Yeniavaz.com xəbər verir ki, avtomobil bazarında müşahidə olunan durğunluğa baxmayaraq qiymətlərdə ciddi ucuzlaşma qeydə alınmayıb.
Onu da bildirək ki, Azərbaycanda “ikinci əl” avtomobillərin qiyməti koronavirus pandemiyası səbəbindən sərt karantin rejimlərinin tətbiq olunduğu qonşu ölkələrlə də müqayisdə kifayət qədər yüksəkdir.
Məlumat üçün bildirək ki, hazırda hər 3 ölkədəki mövcud qiymətlər arasında da ciddi fərqlər var. Hər 3 ölkədəki mövcud qiymət fərqini görə bilmək üçün avtomobil elanları saytlarına baxmaq kifayət edir. Nümunə olaraq 2009-cu ilin istehsalı olan "Mersedes B 180" model avtomobillərin qiymətinə nəzər salmaq olar.
Ermənistanın populyar avtomobil elanları saytlarından olan "auto.am"da 2009-ci ilin istehsalı olan "Mersedes B 180" avtomobilinin qiyməti 6 000 dollar göstərilib. Eyni model avtomobilin Gürcüstanın avtomobil elanları saytında - "myauto.ge"də 4 700 dollara satıldığı qeyd olunub. Azərbaycanın məşhur "turbo.az" saytında isə 2009-cu ilin istehsalı olan "Mersedes B 180" avtomobilinin satış qiyməti 15 000 manat və ya mövcud məzənnə (1$/1,7AZN) ilə hesablandığı zaman 8 820 dollar göstərilir.
Rəqəmlərdən də göründüyü kimi, 2009-cu ilin istehsalı olan "Mersedes B 180" model avtomobil Azərbaycanda Ermənistanla müqayisədə 47%, Gürcüstanla müqayisədə isə 88% baha satılır.
Geri qayıt