Gədəbəy camaatı Prezidentdən nə istəyir?
28-08-2020, 15:32
DİA.AZ: - "Hələ vəzifəyə ilk təyin olunduğu günlərdə barəsində ağır ittihamlar səsləndirildi. Doğrudur, Gədəbəyin icra başçısı İbrahim Mustafayev ona ittihamı səsləndirən Gədəbəy rayon Ərtəpə İƏD-nin icra nümayənsinin müavini olmuş Elşən Məmmədovu bir kənara ataraq bu hadisəni işıqlandıran mətbuatı hədəfə aldı və guya ki kimlərinsə onu işləməyə qoymadığını bəyan etdi. Özünə yaxın hesab etdiyi ünvanlarda çıxış edərək mətbuatı itiham edən İbrahim Mustafayev əslində iz azdırırdı". Bu sözlər DİA.AZ-a daxil olan məqalədə qeyd olunub.
Daha sonra məqalə müəllifi yazır: "İbrahim Mustafayev Gədəbəyə başçı təyin olunanda müəyyən ümidlərimiz var idi. Düşünürdük ki, Ramiz Yediyarov kimi bir qaniçən başçıdan sonra Gədəbəyə həqiqətən də milləti düşünən birinin təyin ediləcəyinə inanırdıq. Amma sən saydığını say, gör, fələk nə sayır... İndi Ramiz Yediyarov yalan olub, İbrahim Mustafayev doğru..."
Sakinlər bildirir ki, pandemiya səbəbindən vəziyyətin gərginləşməsi İbrahim Mustafayevə kar eləməyib: "Rayondakı fermer təsərrüfatları, sahibkarla elə Ramiz Yediyarovun vaxtında olduğu kimi işləyir. Nə pandemiya təsir edib, nə də başçının təzələnməsi. Yenə də eyni üsullar.
Bu rayonun da təməlini Ramiz Mehdiyev qoyduğundandır ki, bu gün Gədəbəydə vəziyyətin düzəlməsi imkansızdır. Hansı rayona təzə başçı göndəriblər, xəbərini oxuyuruq ki, oralar düzəlib. Amma Gədəbəydə vəziyyət dəyişməyib.
Biz dia-az.life vasitəsilə ölkə rəhbərliyinə müraciət edirik: Mümkündürsə, bizə gənc başçı yollayın... Ramiz Mehdiyevin əqidəsində olan yox, yeniləşən Azərbaycana qulluq edən bir başçı..."
İddia olunanlarla bağlı dia-az.life olaraq qarşı tərəfi də dinləməyə hazırıq...
Geri qayıt