Dövlət Vergi Xidməti borclu MMC-yə sanksiya tətbiq etməkdə niyə maraqlı deyil?
27-07-2021, 11:19
Bir neçə il öncə formal olaraq yaradılmış,heç bir maddi-texniki bazası olmayan MMC-lərin dövlət sifarişlərinə cəlb edilməsi, milyonlarla manat dəyərində satınalmaların qalibi olması və əldə etdikləri gəlirlərdən heç bir sosial ödəmə və vergi verməməsi artıq günümüzün ən aktual mövzularından birinə çevrilib. Elektron kütləvi informasıya vasitələrində,sosial şəbəkələrdə və televiziyalarda başqalarının adına yaradılmış,dövlətə külli miqdarda vergi borcu olan şirkətlər barədə kifayət qədər məlumatlara rast gəlmək mümükündür.Şabran rayonunun Borbor kənd sakinin adına 3 saylı Ərazi Vergilər İdarəsində dövlət qeydiyyatına alınmış “TİKİNTİ TƏMİR RR” Məhdud Məsuliyyətli Cəmiyyəti də belələrindəndin.
Aktualinfo.org sözügedən MMC-nin dövlətə olan mövcud borcu ətrafında apardığı araşdırmaları qanun çərçivəsində tədbirlər görmək məqsədi ilə İqtisadiyyat Nazirliyi yanında Dövlət Vergi Xidmətinin 3 saylı Ərazi Vergilər İdarəsinin rəsmi şəxslərinin də diqqətinə çatdırmışdı.
Dövlət Vergi Xidmətinin 3 saylı Ərazi Vergilər İdarəsinin rəisi,baş vergi xidməti müşaviri Sərxan Məmmədov isə redaksiyanın elektron poçtuna ünvanladığı 16.07 2021-cil tarixli cavab məktubunda yazır ki;
“Tikinti Təmir RR” MMC-nin (VÖEN 5000732791) dövlət büdcəsinə yaranmış vergi borcları barədə 22.06.2021-ci il tarixli müraciətinizə aidiyyəti üzrə 3 saylı Ərazi Vergilər İdarəsində baxılmışdır.
Bildiririk ki, “Tikinti Təmir RR” MMC-nin dövlət büdcəsində mövcud olan vergi borcu barədə məlumatı həmin borc məbləğinin dəyişdiyini nəzərə alaraq həmin cəmiyyətin vergi ödəyicisinin eyniləşdirmə nömrəsini e-texas.gov.az saytında vergi borcu barədə məlumatın verilməsi bölməsinə (https://www.e-texas.gov.az/ebyn/vergiBorcu.html) daxil etməklə əldə edə bilərsiniz.
Müraciətinizdə qeyd edilən digər məsələlər Azərbaycan Respublikasının Vergi Məcəlləsinin 30-cu maddəsinə əsasən kommersiya və vergi sirri olduğuna görə, həmin məsələlər ilə bağlı İqtisadiyyat Nazirliyi yanında Dövlət Vergi Xidmətinin Media və Komunikasiya İdarəsinə müraciət etməyiniz tövsiyə olunur.
Vergi qanunvericiliyi və inzibatçılığı, sığorta haqlarının hesablanmasına və ödənilməsinə münasibətdə sosial sığorta, işsizlikdən sığorta və tibbi sığorta qanunvericilikləri ilə bağlı əlavə məlumat almaq üçün İqtisadiyyat Nazirliyi yanında Dövlət Vergi Xidmətinin internet saytına (www.taxes.gov.az), Çağrı Mərkəzinə (195) və ya əvvəlcədən onlayn növbəyə yazılmaqla vergi ödəyicilərinə xidmət mərkəzlərinə müraciət edə bilərsiniz.
Qeyd edək ki, 3 saylı Ərazi Vergilər İdarəsinin rəisi vergi borcu barədə vergi ödəyicisi kimi “Tikinti Təmir RR” MMC-yə bildiriş göndərmək və borc məbləğini qanunvericilikdə nəzərdə tutulan müddətdə ödənilməsini tələb etmək əvəzinə absurd bir cavab vermişdir. Yaranmış vergi borcunun ödənilməsini təmin etmək məqsədilə “Tikinti Təmir RR” MMC-nin əmlakının siyahıya alınması haqqında təcili qərar çıxarmaq əvəzinə kommersiya sirri barədə qeyri müəyyən cavablar yazıb. Burada hansı kommersiya sirrindən söhbət gedə bilər? MMC “Dövlət Satınalmaları Haqqında” Azərbaycan Respublikası Qanununun tələblərinə uyğun olaraq açıq tenderlərdə iştirak edir, qalibi olduğu tenderlərin nəticələri satınalmaların elektron portalında yerləşdirilir və hər kəs görür ki,hansı işlərin müqabilində nə qədər vəait ayrılıb.Burada hər şey açıqdır və heç bir kommersiya sirrindən söhbət gedə bilməz.
Amma Dövlət Vergi Xidməti vergi öhdəliklərini tam həcmdə və vaxtında yerinə yetirməyən və büdcəyə ödənilməli vergi məbləğini hesabat təqdim etməməklə vergidən yayınan “Tikinti Təmir RR” MMC-yə qarşı qanunvericiliklə müəyyən edilmiş maliyyə sanksiyaları və digər məsuliyyət tədbirlərini nə üçün tətbiq etmir? Vergi öhdəliklərini yerinə yetirməyən hüquqi şəxslərə qanunda nəzərdə tutulmuş sanksiyalar tətbiq etmək Dövlət Vergi Xidmətinin birbaşa borcudur. Qanunla nəzərdə tutulan tədbirlərin biri də vergi öhdəliyini yerinə yetirməyən şəxsin əmlakının siyahıya alınması və həraca çıxarılmasıdır. Amma görəsən “Tikinti Təmir RR” MMC-nin hərraca çıxarılası hər hansı bir əmlakı varmı?
Cəmi 10 manat nizamnamə kapitalı olan bu MMC dövlət qeydiyyatına alındığı tarixdən, yəni 14.01.2019-cu ildən cəmi üç ay sonra Qusar rayon İcra Hakimiyyəti başçısı aparatının 15.04.2019-cu il tarixdə keçirmiş olduğu Qusar şəhər yollarının əsaslı təmir işlərini aparılması üzrə 434 479.95 manat, Gəncə şəhər İcra Hakimiyyətinin 10.07.2019-cu il tarixdə keçirmiş olduğu Gəncə şəhərində məktəbəqədər təhsil müəssisələrində istilik sistemlərinin quraşdırılması işlərinin satın alınması üzrə 316 800 manat,“Azərişıq” ASC tərəfindən 09.08.2019-cu il tarixdə keçirilmiş, Abşeron rayonu ərazisində torpaq sahələrinin suvarma sisteminin və Xaçmaz rayonunun Müqtədir qəsəbəsi ərazisində yerləşən aqroparkın xarici elektrik təchizatı işləri üzrə 1 549 306.76 manat, məbləğində tenderlərin qalibi olub.
Qeyd edək ki,dövlət satınalmalarının rəsmi portalında cəmi 3 tenderdə iştirak etmiş, 2 300 586 manat dəyərində dövlət sifarişi almış MMC-nin 22.06 2021-ci il tarixə 828 317.44 manat vergi borcu olduğu göstərilirdisə bu günə 834 124.20 manat təşkil edir.Bütün bunlar İqtisadiyyat Nazirliyi yanında Dövlət Vergi Xidmətinin və Antiinhisar və İstehlak Bazarına Nəzarət Dövlət Xidmətinin rəsmi portallarında açıq şəkildə göstərilirsə,burada hansı kommersiya sirrindən söhbət gedə bilər?
MMC-nin dövlətə olan vergi borcu onu göstərir ki, kifayət qədər iri məbləğli satınalmalarda iştirak edib. Lakin onların böyük əksəriyyəti ictimaiyyətdən gizlədilib. Məsələn 12.04 2019-cu ildə Siyəzən Rayon İHB-nin Siyəzən şəhər İƏD üzrə nümayəndəliyinin “Yolların əsaslı təmiri”, “Şəhərin abadlaşdırılması” və “Mənzil fondunun əsaslı təmiri” işlərinin satınalınması ilə əlaqədar dərc edilmiş açıq tender müsabiqəsində “Tikinti Təmir RR” MMC qalib elan olunmuş və müvafiq satınalma müqavilələri bağlanmışdır. Amma ayrılmış vəsait barədə heç bir məlumat göstərilməmişdir.
Dövlət satınlmalarının rəsmi elektron portalına yerləşdirilmiş məlumatlardan da göründüyü kimi MMC açıq tenderlərdə iştirak edərək qalib olmuş,müvafiq qurumlarla satınalma müqavilələri bağlamışdır. Bu MMC-nin dövlət sifarişlərini yerinə yetirməyə maddi-texniki bazasının,işçi qüvvəsinin olub olmaması artıq maraqlı deyil. Maraqlı olan odur ki,Şabran rayonunun 20-25 evlik bir kənd sakinin adına yaradılmış bu MMC-nin arxasında kimlər durur. İqtisadiyyat Nazirliyi yanında Dövlət Vergi Xidmətinin MMC-nin mövcud olan borcunu ödətdirməməkdə maraqlı olması isə daha maraqlıədır.
Aktualinfo.org
Geri qayıt