"Nə işə bərpa olunuram, nə də şikayətim araşdırılır"
20-06-2022, 09:20
DİA.AZ-ın məlumatına görə, "28 May" NQÇİ-nin Mənzil-Kommunal Təsərrüfatında vaxtilə çilingər-santexnik işləmiş Həsən Həsənov "Təzadlar"a müraciət edərək bidirir ki, neçə illərdir onun şikayətlərinə baxan yoxdur.
H.Həsənovun sözlərinə görə, o, uzun müddət çalışdığı SOCAR-dan 2018-ci ildə qanunsuz olaraq işdən çıxarılıb. Bildirir ki, dəfələrlə "28 May" Neft və Qazçıxarma İdarəsində baş verən qanunsuzluqlarla bağlı aidiyyəti qurumlara şikayət etsə də, heç bir tədbir görülməyib.
Şikayətçi H.Həsənov redaksiyamıza təqdim etdiyi müraciətində yazır:
"Hörmətli redaksiya!
Bildirirəm ki, 05.08.1993-cü ildən Azərbaycan Respublikası Dövlət Neft Şirkətinin “Azneft” İstehsalat Birliyinin “28 May” NQÇİ-də MKT-da II dərəcəli çilingər vəzifəsində işləmişəm. İşlədiyim dövrdə pillə-pillə 3-cü və 4-cü dərəcələri almışam. 03.01.1997-ci ildə vəzifəm dəyişdirildi, çilingər-santexnik oldum. Buna əsasən əmək haqqımın 12%-i həcmində zərərlilik artımı almalı idim. 26.12.1999-cu ildə istehsalatda ağır xəsarət almışam, qapalı kəllə-beyin travması, sol biləyin sınığı diaqnozu ilə Mərkəzi Neftçilər Xəstəxanasında 3 ay stasionar müalicələr almışam. İdarə tərəfindən akt tərtib olunsa da, nə birdəfəlik müavinət, nə də pensiya verildi.
16.07.2010-cu ildə həkim arayışı olduğu halda, üzrlü səbəb nəzərə alınmadan ixtisas dərəcəm bir dərəcə aşağı salındı, müddət qoyulmadı. Üzrlü səbəbi nəzərə almadan, arayış olduğu halda, idarədaxili qeyri-qanuni əmr çıxardılar. İdarənin məsul əməkdaşının qərəzli mövqeyi nəticəsində mənə Əmək Məcəlləsinin 156 maddəsinin 5-ci bəndi tətbiq edilmişdir. İşlədiyim vaxtda çox xahiş etdim ki, silinmiş dərəcəm bərpa olunsun, lakin bu xahişimə idarə rəhbəri məhəl qoymadı. 01.05.2017-ci ildə SOCAR-ın prezidenli Rövnəq Abdullayev tərəfindən əmr gəldi ki, dərəcəm bərpa olunsun. Lakin idarənin rəhbəri Zaur Bağırov bu əmri icra etmədi.
18.06.2018-ci ildə yaşadığım ünvanda səhhətimdə problem yarandı və məni Göytəpə Şəhər Xəstəxanasına apardılar. Baş həkim Eldar İsayev məni müalicə etdikdən sonra xəstəlik vərəqəsi verdi. 29.06 2018-ci ildə xəstəlik vərəqəsini idarəyə təqdim etdim. 02.07.2018-ci ildən 10.07.20l8-ci il tarixinə kimi işlədim. Mən işlədiyim ərəfədə idarə rəhbəri Zaur Bağırov baş həkim Eldar İsayevlə telefon əlaqəsı saxlamış və mənə verdiyi xəstəlik vərəqəsini ləğv etdirmişdir. 16.07.2018-ci ildə xəstəlik vərəqəm olduğu halda, məni işdən azad etdilər, 8, 9, 10-cu aylar üzrə hesabıma 3000 manata yaxın məbləğ koçürüblər. Sonra həmin məbləğ baş mühasib Babək Fərəcov tərəfindən hesabımdan çıxarılmışdır.
Bakı Şəhər Prokurorluğuna, Baş Prokurorluğa dəfələrlə ərizələrlə müraciət etmişəm. Mənim işdən çıxarılmağıma səbəbkar olmuş Göytəpə Şəhər Xəstəxanasının baş həkimi Eldar İsayevlə bağlı TƏBİB-ə də müraciətlər etdim. Amma bu günə qədər hər hansı bir tədbir görülmədi və mənə cavab da verilmədi. Göytəpə Şəhər Xəstəxanasının baş həkimi Eldar İsayevin qanunsuz hərəkətinin nəticəsində 3 ildən çoxdur işsiz qalmışam. Ailədə 7 nəfərik. Yeganə işləyən mən idim. Dövlətdən heç bir maddi yardım almıram. Pasport qeydiyyatım Masallı rayonunun Təklə kəndinədir. Ailəm ilə yaşadığım ünvan isə Pirallahı rayonu, Cilov qəsəbəsi, Dmitri Kselyov küçəsi ev 37 idi. Bu ev mənim şəxsi evim olsa da, qanunsuz olaraq işdən çıxarıldığım üçün 02.08.2019-cu ildən bu günə kimi dəniz yolu vasitəsilə evimə getməyimə qadağa qoyublar. Bu səbəbdən də kirayələrdə, çöllərdə qalmışıq. Ailə üzvlərim də evimizə gedə bilmir. Deyirlər ki, qeydiyyatın bura deyil, get, Masallıda yaşa.
Qeyd etdiyim kimi, dəfələrlə müxtəlif instansiyalara müraciət edərək “Azneft” İstehsalat Birliyinin “28 May” NQÇİ-də baş verən qanunsuzluqlar və özbaşınalıqlar haqqında məlumat vermişəm.
İndi isə bu təşkilatın ucbatından səhiyyə xidmətindən yararlana bilməməyim barədə bildirmək istəyirəm. Bu yaxınlarda səhhətimdə problemlər yarandığı üçün uzun illər çalışdığım və sığorta haqqı ödədiyim SOCAR-a tabe olan Mərkəzi Neftçilər Xəstəxanasına müraciət etdim ki, sığortam hesabına müayinələrdən keçim. Orada mənə bildirdilər ki, mən işdən çıxarıldığım üçün sığorta hesabım bağlanıb. Bu, məni çox narahat etdi. Çünki müayinə olunmağım üçün mənim maddi vəsaitim yoxdur. Digər tərəfdən, nə qədər çalışdımsa, sığorta hesabımdan yararlana bilmədim.
Mən işlədiyim müddətdə istehsalatda xəsarətlər almışam və 2000-ci ildən bu xəsarətə görə mənə əlillik dərəcəsi verilməli və pensiya almalı idim. Amma həmin vaxt məni pensiyaya çıxarmadılar, qalıb işləməli oldum. İndi 52 yaşım var, zərərliklə pensiyaya çıxmalı idim, onu da etmədilər. Digər tərəfdən, qanunvericiliyə görə, yaşım imkan vermir ki, pensiyaya çıxım. İşdən də çıxarıldığım üçün gəlirim yoxdur. Ailəm bir tikə çörəyə möhtac qalıb. Ailəmin üzünə baxa bilmirəm. Övladımı ARDNŞ-də işlə təmin etmələri barədə də müraciət etmişəm. Övladım sağlam, bacarıqlı olsa da, onu işə qəbul etməyib, əvəzində, yararsızları, saxta diplomluları rüşvət hesabına işə qəbul edirlər.
Məhkəmələrə müraciət etmişəm, sifarişlə iddialarım təmin edilməyib. Şikayətlərim araşdırılmır, Göytəpə Şəhər Xəstəxanasının baş həkimi Eldar İsayevin qanunsuz əməlləri sübut olunsa da, işimə bərpa edilmədim. Tibbi xidmətdən istifadə etmək üçün sığortam bağlıdır, pensiya, müavinət almıram. Bu qədər problemlər mənim üçün çox deyilmi?
Mən 2008-ci ildən Yeni Azərbaycan Partiyasının üzvüyəm. Dövlətimizə xeyirli vətəndaş olmaq üçün əlimdən gələni etmişəm. Amma çox təəssüflər olsun ki, haqlı olduğum üçün incidilmişəm. Hətta 13.10.2014-cü ildə işlədiyim təşkilatın rəhbərliyinin sifarişi ilə şərlənərək 30 gün inzibati cəza da almışam”.
Şikayətçi yazır ki, məcburiyyət qarşısında qalaraq dövlət başçısına rəsmi müraciət edib. Məsələnin araşdırılması “Azneft” İB-nin şöbə rəisi Mübariz Şamilova həvalə edilib.
H.Həsənov bildirir ki, ancaq şöbə rəisi Mübariz Şamilov onun şikayətinə baxmır: “İndi nə işə bərpa olunuram, nə də şikayətim araşdırılır. Bundan sonra nə edəcəyimi bilmirəm. Dərdimi kimə deyim ki, çarəsi tapılsın? Sizin vasitənizlə aidiyyəti qurumlara müraciət edirəm ki, bəlkə səsimi eşidib mənə bir kömək edən tapıldı".
Məsələ ilə bağlı qarşı tərəfin də mövqeyini dərc etməyə hazırıq.
Geri qayıt