“XAN-2017” MMC dövlətə olan vergi borcunu niyə ödəmir?
1-12-2022, 12:25
Son illər respublikamızda yollarda nəqliyyat vasitələrinin və piyadaların təhlükəsiz və rahat hərəkətini təşkil etmək, yol hərəkəti ilə bağlı insanların həyatının və sağlamlığının qorunması, ətraf mühitin və dövlət əmlakının mühafizəsi, yol-nəqliyyat hadisələrinin qarşısının alınması məqsədi ilə kompleks təbirlər həyata keçirilir. Daxili İşlər Nazirliyinin Baş Dövlət Yol Polisi İdarəsi əhaliyə yol hərəkəti qaydalarının öyrədilməsini və yol hərəkəti təhlükəsizliyinin təbliği işini təşkil etmək baxımından yol hərəkəti təhlükəsizliyi sahəsində mütəmadi olaraq tədbirlər təşkil edir. Bu kimi tədbirlərin həyata keçirilməsinə dövlət büdcəsindən hər il kifayət qədər vəsait ayrılır. Dövlətimiz həmçinin yollarda hərəkət surətinin məhdudlaşdırıldığı zonaları müəyyənləşdirmək və orada müvafiq yol nişanlarının qurulması üçün də büdcədən hər il vəsait ayrılır. Bəs bu sahədə işlər necə gedir?
Qeyd edək ki, yollarda müvafiq yol nişanlarının qurulmasına nəzarəti yol hərəkəti sahəsindəki aidiyyatı qurumlar və təşkilatlarla birgə Daxili İşlər Nazirliyi Baş Dövlət Yol Polisi İdarəsinin “SİQNAL” İxtisaslaşdırılmış Layihə-İstehsalat İdarəsi həyata keçirir. Açıq mənbələr üzərindən apardığımız araşdırmalar zamanı məlum oldu ki, son iki ildə dövlət tərəfindən işıqforların, yol nişanlarının, yol cizgi boyasının, mal-materialların alınmasına on milyon manat civarında vəsait ayrılıb. Bu on milyon manat ancaq Bakı şəhərində yol hərəkətinin təhlükəsizliyini təmin etmək məqsədi ilə ayrılıb. Çünki,mağistral yollara aidiyyatı qurum olaraq Azərbaycan Avtomobil Yolları Dövlət Agentliyi, digər şəhər və rayonlarda isə yerli icra hakimiyyəti orqanları nəzarət edir. Bəs Daxili İşlər Nazirliyi Baş Dövlət Yol Polisi İdarəsinin “SİQNAL” İxtisaslaşdırılmış Layihə-İstehsalat İdarəsi dövlət büdcəsindən ayrılan milyonları hara və necə xərcləyir?
Dövlət satınalmalarının vahid internet portalı üzərindən apardığımız araşdırmada məlum oldu ki. 28.01.2021- ci il tarixində sözügedən portalda Daxili İşlər Nazirliyi Baş Dövlət Yol Polisi İdarəsinin “SİQNAL” İxtisaslaşdırılmış Layihə-İstehsalat İdarəsinin Tender Komissiyası tərəfindən 2022-ci ilin satınalma planları açıqlanmışdır. Satınalma planlarına 5 açıq tender (2-i 3 milyon ABŞ dollarının manat ekvivalentindən çox ), 3 kotirovka sorğusu daxil edilmişdir. Lakin cari ilin 11-ci ayı olmasına baxmayaraq BDYPİ-nin “SİQNAL” İxtisaslaşdırılmış Layihə-İstehsalat İdarəsinin Tender Komissiyası dövlət satınalmalarının vahid internet portalında yalnız sürtkü materiallarının və soyuducu mayenin alınması və nəqliyyat vasitələrinin ehtiyyat hissələri üzrə 2 kotirovka sorğusunun keçirilməsi barədə iddiaçılara dəvət elanı vermişdir. Amma BDYPİ-nin “SİQNAL” İxtisaslaşdırılmış Layihə-İstehsalat İdarəsinin Tender Komissiyası tərəfindən cari ilin 11 ayı ərzində 2 açıq tender və 2 kotirovka sorğusu üzrə satınalma müqavilələrinin bağlanıldığını açıqlamışdır.
Sürtkü materiallarının və soyuducu mayenin alınması üzrə “LUBRİCANTS SUPPLİER” Məhdud Məsuliyyətli Cəmiyyəti ilə 18 130.7 manat məbləğində satınalma müqaviləsi 30.11.2022-ci il tarixdə bağlanmışdır.
Nəqliyyat vasitələrinin ehtiyyat hissələri üzrə “SABİROĞLU” Məhdud Məsuliyyətli Cəmiyyəti ilə 46 020 manat məbləğində satınalma müqaviləsi 21.10.2022-ci il tarixdə bağlanmışdır.
2022-ci ilin tələbatına uyğun olaraq “İşıqfor”ların satınalınması üzrə “GLOBAL MASTER” Məhdud Məsuliyyətli Cəmiyyəti ilə 1 499 367 manat məbləğində satınalma müqaviləsi 11.08.2022-ci il tarixdə bağlanmışdır.
BDYPİ “Siqnal ilii” tərəfindən 2022-ci ilin tələbatına uyğun olaraq mal-materiallar üzrə “YOL NİŞAN” Məhdud Məsuliyyətli Cəmiyyəti ilə 3 367 861.6 manat məbləğində satınalma müqaviləsi 01.08.2022-ci il tarixdə bağlanmışdır.
Buradan suallar yaranır.
BDYPİ-nin “SİQNAL” İxtisaslaşdırılmış Layihə-İstehsalat İdarəsinin Tender Komissiyası 11 ay ərzində cəmi 2 kotirovka sorğusunun keçirilməsi barədə iddiaçılara dəvət elan vermişsə, 2 açıq tenderi necə keçirmişdir?
Əgər Açıq Tender və kotirovka sorğulrının keçirilməsi barədə əvvəlcədən qanunla müəyyən olunmuş şəkildə dövlət satınalmalarının vahid internet portalı vasitəsi ilə, elektron qaydada iddiaçılara dəvət elanı verilməmişsə bu satınalma prosedurları hansı üsullarla keçirilmişdir?
Qeyd edək ki, analoji qanun pozuntularına BDYPİ-nin “SİQNAL” İxtisaslaşdırılmış Layihə-İstehsalat İdarəsinin Tender Komissiyası tərəfindən 2021-ci ildə də yol verilib. Belə ki, Tender Komissiyası illik satınalma planlarına daxil etdiyi 2 açıq tender, 4 kotirovka sorğusundan, yalnız 4 kotirovka sorğusunun keçirilməsi barədə iddiaçılara dəvət elan vermiş, yol nişanlarının, yol cizgi boyasının, mal-materialların, iş geyimlərinin və iş alətlərinin satın alınması, və işıqforların və onlara dair avadanlıqlaın satınalınması üzrə keçirilməsi nəzərdə tutlmuş açıq tenderlərlə bağlı qanunla müəyyən edilmiş qaydada əvvəlcədən dövlət satınalmalarının vahid internet portalında iddiaçılara heç bir dəvət elan verməmişdir.
Amma BDYPİ-nin “SİQNAL” İxtisaslaşdırılmış Layihə-İstehsalat İdarəsinin Tender Komissiyası tərəfindən 2021-ci il ərzində 2 açıq tender üzrə satınalma müqavilələrinin bağlanıldığı açıqlanmış, 4 kotirovka sorğusu üzrə bağlanmış satınalma müqavilələrinin nəticələri ictimaiyyətə açıqlanmamışdır.
2021-ci ilin tələbatına uyğun olaraq DİN Baş Dövlət Yol Polisi İdarəsinə bilavasitə tabe olan “Siqnal İLİ” idarəsi tərəfindən işıqforların və onlara dair avadanlıqlaın satınalınması üzrə “YOL NİŞAN” Məhdud Məsuliyyətli Cəmiyyəti ilə 1 388 167.28 manat məbləğində satınalma müqaviləsi 17.11.2021-ci il tarixdə bağlanmışdır.
Yol nişanlarının, yol cizgi boyasının, mal-materialların, iş geyimlərinin və iş alətlərinin satın alınması üzrə “XAN-2017” Məhdud Məsuliyyətli Cəmiyyəti ilə 3 701 167.29 manat məbləğində satınalma müqaviləsi 14.09.2021-ci il tarixdə bağlanmışdır.
Portal üzərindən apardığımız araşdırmalar zamanı müəyyən etdik ki, BDYPİ-nin “SİQNAL” İxtisaslaşdırılmış Layihə-İstehsalat İdarəsinin Tender Komissiyası ümumiyyətlə satınalma prosedurlarının təşkilini qanunla müəyyən edilmiş qaydalarla deyil, birbaşa bağlanılan müqavilələrə həyata keçirir. Bu isə satınalmalarda bir sıra saxtakarlıqlara, alınan malların və xidmətlərin qiymətlərinin süni şəkildə şişirdilməsinə yol açır.
Məlumatlardan da görsəndiyi kimi BDYPİ “SİQNAL” İdarəsinin Tender Komissiyası “YOL NİŞAN” və “XAN-2017” MMC ilə 2021-ci ildə işıqforların və onlara dair avadanlıqlaın satınalınması üzrə ümumi olaraq 5 089 334 manat, 2022-ci ildə isə tələbata uyğun olaraq mal-materiallar satınalınması üzrə ümumi dəyəri 4 867 228 manat olan müqavilələr bağlamışdır. Bu isə iki il ərzində ümumi olaraq 9 956 562 manat dövlət vəsaitinin xərclənməsi deməkdir.
Qeyd edək ki, BDYPİ-nin “Siqnal” İdarəsi tərəfindən 2021-ci ilin sentyabrında “XAN-2017” Məhdud Məsuliyyətli Cəmiyyəti ilə 3 701 167.29 manat məbləğində bağlanmış satınalma müqaviləsində saxtakarlığa yol verilmişdir. Belə ki, Dövlət Vergi Xidmətinin reyestr məlumatlarında apardığımız araşdırma zamanı məlum oldu ki, “XAN-2017” MMC (VÖEN 1805362831) satınalma müqaviləsi bağlanıldığından təxminən 4 ay əvvəl 2021-ci il mayın 5-də dövlət qeydiyyatına alınıb. Nizamnamə kapitalı isə cəmi 20 manatdır. Ən azı bir illik fəaliyyəti və anoliji işlərdə təcrübəsi olmayan şirkətin tenderdə iştirakı isə qanunla yolverilməzdir. MMC-nin qanuni təmsilçisi Məmmədov Ceyhun Seyidqabil oğlu və hüquqi ünvanı ilə bağlı apardığımız araşdırma da nəticəsiz qaldı. Məlum olan odur ki, “XAN-2017” MMC-nin dövlətə 913 370.37 manat vergi borcu var.
Buradan yenə suallar yaranır. “XAN-2017” MMC-nin dövlətə doqquz yüz min manatlıq vergi borcu haradan yaranıb? MMC tərəfindən BDYPİ-nin “SİQNAL” İxtisaslaşdırılmış Layihə-İstehsalat İdarəsinin sifarişi yerinə yetirilibmi? Heç bir maddi-texniki bazası olmayan, dövlət qeydiyyatına 4 ay əvvəl qeydiyyata alınmış bir MMC 3 701 167.29 manat məbləğində bağlanmış satınalma müqaviləsi üzrə öhdəliklərini yerinə yetirə bilmirsə, bu vergi borcu haradan yarana bilər? Qeyd edək ki, MMC “SİQNAL” İxtisaslaşdırılmış Layihə-İstehsalat İdarəsinin keçirdiyi açıq tenderdən başqa heç bir satınalmanın qalibi olmayıb. Deməli bu vergi borcu Baş Dövlət Yol Polisi İdarəsinin yol nişanlarının, yol cizgi boyasının, mal-materialların, iş geyimlərinin və iş alətlərinin satın alınması üzrə “XAN-2017” MMC-yə verdiyi sifarişdən yaranıb.
Qeyd edək ki, bu saxtalaşdırma əməliyyatı Baş Dövlət Yol Polisi İdarəsinin “Siqnal” İdarəsinin 2016-cı ildən rəisi olmuş polis polkovnik-leytenantı Mahir Məmmədyarovun dövrünə təsadüf edir. Amma bu onun məsuliyyətdən kənarda qalması demək deyil. Bu işin başında şübhəsiz Baş Dövlət Yol Polisi İdarəsinin rəisi general-mayor Ramiz Zeynalov dayanır. Odur ki, elə Ramiz Zeynalovdan soruşmaq istəyirik. “XAN-2017” MMC ilə bağlanmış satınalma müqaviləsindən bir il ötüb. Bir il ərzində doqquz yüz min manatlıq vergi borcu haradan yaranıb? MMC-nin vergi borcunu kim ödəməlidir? Təbii ki, heç kim. Çünki MMC öz işini, pul silmə funksiyasını yerinə yetirib, aradan çıxıb. Ramiz Zeynalov da “otkat”ını götürüb.
Qeyd edək ki, fevral ayından “Siqnal” İxtisaslaşdırılmış Layihə İstehsalat İdarəsinin rəisi vəzifəsinə Mayıl Yusifov təyin edilib. O, general-mayor Həsən Şirinovun kadrı kimi tanınır. Həsən Şirinov BŞDYPİ-nin rəisi işlədiyi vaxtda Mayıl Yusifov onun sürücüsü olub.
Aktualinfo.org
Geri qayıt