"Sabunçu Rayon İcra Hakimiyyətinə gedib kömək istəmişəm"
1-01-2024, 12:03
Ağsu rayonu, Axunlu kənd sakini, hal-hazırda Bakı şəhərində yaşayan Qənbərov Sənan Rəşid oğlu tərəfindən Hurriyyet.az saytının redaksiyasına şikayət məktubu daxil olub. 44 günlük müharibə iştirakçısı, 10 il xüsusi təyinatlı dəstədə xidmət etdiyini bildirən şikayətçi deyir ki, hazırda səhhətində ciddi problem olsa da, müraciət etdiyi qurumlar ona kömək etmirlər:
“Mən, Qənbərov Sənan Rəşid oğlu, yazaraq sizdən xahiş edirəm ki, problemimi işıqlandırasınız.
Dəfələrlə Prezident Administrasiyasına, Sabunçu Rayon İcra Hakimiyyətinə gedib kömək istəmişəm. Mənə heç bir kömək etməyiblər.
Milli Məclisə məktub yazdım, cavab gəlmədi. Gedirəm, deyirlər ki, biz sənə nə kömək göstərə bilərik?! Heç bir kömək etmədən geri göndərirlər.
Müharibədə 2 dəfə ağır yaralanmışam, 27 gün komada qalmışam. Bir dəfə olsun Sabunçu Rayon İcra Hakimiyyəti maraqlanmayıb. Hal-hazırda da səhhətimdə problemlər var. Dövlətimdən, səlahiyyəti çatan çəxslərdən kömək istəyirəm”.
Məsələ ilə bağlı Sabunçu Rayon İcra Hakimiyyəti ilə əlaqə saxlamağa çalışsaq da, zənglərimiz cavabsız qaldı.
Geri qayıt