Bakıdakı dəhşətli terror planı: İŞİD-ə sadiqlik andı içmiş radikalın hücumu son anda əngəlləndi
Dünən, 20:01
Şok təfərrüatlar üzə çıxır! Musavat.com mötəbər qaynaqlara əsasən bildirir ki, yəhudi sinaqoquna “Molotov kokteyli” ilə hücum planlayan radikal şəxs Dövlət Təhlükəsizliyi Xidmətinin (DTX) peşəkarlığı sayəsində cinayət başında yaxalanıb.
Azərbaycanın Sumqayıt şəhərində yaşayan və “İŞİD Xorasan” terror təşkilatına bağlılığı ilə tanınan 18 yaşlı Abdulla Əliyev Bakı şəhərinin mərkəzində yerləşən “Bakı Dağ Yəhudiləri Sinaqoqu”na qarşı genişmiqyaslı terror aktı həyata keçirməyə hazırlaşırdı.
Mötəbər qaynaqların Musavat.com-a verdiyi məlumatda bildirilir ki, gənc radikal “Abu Radd” ləqəbli terror liderinə beyət edərək terrorçu fəaliyyətlərə başlayıb.
CİNAYƏT BAŞINDA YAXALANDI
28 dekabr 2024-cü il tarixində Abdulla Əliyev “KİA” markalı avtomobili ilə Bakı şəhəri, Nəsimi rayonu, Əlimərdan bəy Topçubaşov küçəsində yerləşən yəhudi sinaqoquna yaxınlaşıb. Həmin vaxt sinaqoqda ibadət gedirdi. O, avtomobilindən çıxardığı 3 ədəd “Molotov kokteyli” və digər silahlarla içəriyə daxil olmağa cəhd edib. Amma DTX əməkdaşları onu cinayət başında yaxalaya biliblər.
Əməliyyat zamanı Abdulla Əliyevin üzərindən və avtomobilindən 1 ədəd balta, 2 bıçaq və yandırıcı-partlayıcı vasitələr aşkar edilərək götürülüb.
TERRORUN “İLHAM MƏNBƏYİ”
Abdulla Əliyevin mobil telefonunda “SimpleX” ani mesajlaşma tətbiqi vasitəsilə yaratdığı “KHALIFATUL MUSLİMUN” adlı qrup aşkarlanıb. Bu qrupda terror planlarına aid yazışmalar və tapşırıqlar yer alırmış. Onun “İŞİD Xorasan”ın liderlərindən biri ilə təmasda olduğu və təlimat aldığı müəyyən edilib. Redaksiyaya çatan məlumata görə, şübhəli şəxs ifadəsində, cinayət əməlini şəxsi radikal ideologiya ilə əsaslandıraraq, bu planı müstəqil şəkildə həyata keçirmək qərarına gəldiyini bildirib.
ŞOK EDƏN PLANIN DETALLARI
Terror aktı şənbə günü, yəhudi icmasının sinaqoqda toplandığı vaxt həyata keçirilməli idi. Hücumun mümkün zərbələrinin daha geniş əks-səda doğurması məqsədilə, “Molotov kokteylləri” və digər dağıdıcı vasitələrdən istifadə planlaşdırılmışdı.
AZƏRBAYCANIN QƏTİYYƏTİ
Bu əməliyyat Azərbaycanın terrorla mübarizə sahəsində uğurlarından biri kimi qiymətləndirilir. Bakı, terrorçuların regionda sabitliyə və etnik icmalar arasında harmoniya atmosferinə zərbə vurmaq cəhdlərinin qarşısını almaqda qətiyyətlidir.
Musavat.com-a çatan məlumatda o da bildirilir ki, cinayətlə əlaqəli digər ehtimal olunan tərəfdaşlar araşdırılır və əlavə əməliyyat tədbirləri davam edir.
DÜNYAYA MESAJ
Azərbaycanın beynəlxalq səviyyədə bu əməliyyatla verdiyi mesaj aydındır: Qafqaz regionunda terrorçuluğa yer yoxdur. Bakı beynəlxalq tərəfdaşlarını da bu mübarizədə daha sıx əməkdaşlığa çağırır.
Geri qayıt