Bu rayonda yaşıllıqlara qənim kəsiliblər...
10-06-2015, 12:51
Məlum alduğu kimi, meşə sərvətləri heç bir digər təbii sərvətlərə xas olmayan çoxsahəli funksiyaları yerinə yetirir. Meşələr yeganə təbiət kompleksi hesab olunur ki, onlar su, hava və torpaq kimi biosferanın çox vacib olan komponentlərinin sabitləşdirilməsinə şərait yaradır. Azərbaycan meşələrinin əksər sahələri (85%) Böyük Qafqazda, Kiçik Qafqazda və Talış dağ bölgəsində yerləşir. Meşələrin çox hissəsi qiymətli ağac cinslərindən ibarətdir (palıd, fıstıq, vələs, cökə, ağcaqayın və s.). Respublikanın meşələrinin müxtəlifliyi, onun yayılması iqlim, torpaq, müxtəlif hündürlük qurşaqlarından və digər şəraitdən asılıdır. Bu baxımdan Ağcabədi rayonu da özünəməxsus gözəlliyə malikdir. Lakin bu gün rayon ərazisində meşə massivi, demək olar, məhv edilib. Müəyyən sahələrdə sonradan salınmış şam və çinar meşələrinə rast gəlinsə də, həmin ərazilərdə otlayan mal-qara və qoyun sürüləri ümumiyyətlə meşəyə nəzarət edilmədiyindən xəbər verir. Uzun müddətdir ki, redaksiyamıza daxil olan məlumatlarda Ağcabədi meşələrinin sistematik olaraq qırılması barədə həyəcan siqnalları öz əksini tapmışdır. Təqdim olunan materiallarda bildirilir ki, meşələrin bu acınacaqlı vəziyyətinə görə əsas məsuliyyəti Ağcabədi Meşə Mühafizəsi və Bərpası Müəssisəsinin direktoru Müzəffər Cəfərov daşıyır. Göstərilir ki, bu məmurun fəaliyyəti nəticəsində rayonun onsuz da kasad olan meşələri indi də ağac emalı müəssisələri üçün xammal bazasına çevrilmişdir. Meşələrin sürətlə qırılmasına səbəb olan digər bir amil də səfalı məkanlarda, təbiətin qoynunda istirahət mərkəzləri və iaşə obyektlərinə sahib olmaq istəyənlərin sayının çox olmasıdır. Kəsilən meşə zolaqlarının yerində tikilən obyektlərin sahibləri isə bu “əməkdaşlığın” müqabilində Müzəffər müəllimə külli miqdarda pul ödəyirlər. Digər tərəfdən də Müzəffər Cəfərov artıq uzun müddətdir ki, meşə torpaq sahələrini satmaq və ya icarəyə verməklə məşğuldur. Lakin Müzəffər müəllimin hətta bu fəaliyyəti də qalmaqallarsız ötüşmür. Hələ 2012-ci ildə redaksiyamıza şikayət ərizəsi ilə müraciət etmiş Qələndərova Pekar Misir qızı, Hümbətova Roza Həsən qızı, Misirov Misir Sərdar oğlu, Qələndərov Xaləddin Əşrəf oğlu və Qələndərova Telli Qulu qızı bildirmişdilər ki, 2011-ci ilin aprel ayında Ağcabədi rayonu Meşə idarəsinin müdiri Müzəffər Cəfərova meşə fondundan 50 ha sahəsi olan ərazinin müqavilə əsasında 3 il müddətinə onlara icarəyə verilməsi barədə müraciət ediblər. Müraciətə cavab olaraq M.Cəfərov vətəndaşların 3000 manat ödəyəcəkləri təqdirdə belə bir müqavilənin bağlanmasının mümkünlüyünü bildirib. Qarşılıqlı razılaşma əldə olunandan sonra vətəndaşlar göstərilən məbləği idarə müdirinə nəğd şəkildə ödəyiblər. Bunun müqabilində Müzəffər Cəfərov onlara artıq ərazıdən artıq istifadə edə bldiklərini və müqavilənin də yaxın vaxtlarda hazır olacağını bildirib. Bir müddət sonra vətəndaşların növbəti müraciəti zamanı idarə müdiri onlara deyib ki, nüqavilə artıq hazırdır və bu yaxınlarda Ekologiya və Təbii Sərvətlər Nazirliyi Meşələrin İnkişafı Departamentinin rəhbəriliyi tərəfindən təsdiq olunandan sonra sənədin bir nüsxəsi onlara təqdim olunacaq. Bu vəziyyət nə az-nə çox düz 2012-ci ilin noyabr ayına qədər davam edib. Nəhayət noyabr ayında Müzəffər Cəfərov həmin vətəndaşları yenidən idarəyə çağıraraq onlara əlavə olaraq 2000 manat da ödəmələri olduqlarını bıldırıb. İcarəçilər əlavə pulu ödəməkdən imtina etdikdə isə, Müzəffər Cəfərov bəyan edib ki, əgər müqavilə təsdiq olunmasa o, meşə sahəsindən qeyri-qanuni istifadəyə görə vətəndaşlara külli-miqdarda cərimə təyin edəcək. Sonra da onları prokuratura orqanlarına və məhkəməyə verəcək... Növbəti illər ərzində həmin ailələr Ağcabədi meşə təsərrüfatının 1 saylı meşə zolağında yerləşən köhnə tikili bir evdə yaşayıblar. Amma tərəflər arasındakı münasibətlər mütəmadi olaraq müəssisə rəhbərinin hansısa yeni bir iddiası ilə gərginləşdirilir. Son belə bir gərginlik isə qaçqın ailələrinə məxsus iki atın Müzəffər Cəfərov tərəfindən “müsadirə” olunması səbəbi ilə yaşanıb. Bu xüsusda məlumatda bildirilir ki, qaçqın ailələrinin Müzəffər müəllimə verdikləri 1870 manat məbləğində illik icarə haqqının müqabilində ondan çek tələb etmələri müəssisə rəhbərinin acığına gəlib. Buna görə də, vətəndaşlara məxsus atların guya ki, meşə massivinə vurduqları ziyana görə həmin ailələrə 200 manat müqabilində cərimə yazılıb... Etiraf etmək lazımdır ki, bu gün Azərbaycan dövləti tərəfindən həqiqətən də təbii sərvətlərimizin qorunması istiqamətində kifayət qədər əhəmiyyətli addımlar atılır, islahatlar həyata keçirilir. Lakin bu da faktdır ki, yuxarıda qeyd olunduğu kimi bilavasitə ətraf mühitin mühafizəsi məqsədilə təsis edilmiş bir çox struktur təşkilatlarına rəhbərlik bəzi hallarda tamamilə arzuolunmaz kadrlara həvalə olunur. Nəticədə isə həmin kadrların ətraf mühitə əsil talançılıq münasibəti qısa müddət ərzində bütün ictimaiyyəti yeni problemlər və daha gərgin vəziyyətlə üz-üzə qoyur.
Geri qayıt