Azərbaycanda su üçün milyonları su kimi axıdanlar kimlərdi?
12-03-2020, 08:02
Bakı şəhəri, Xəzər rayonu, Buzovna qəsəbəsi Rasim İmanov küçəsi 37 ünvanında fəaliyyət göstərən Respublika Uşaq Sanatoriyasının "Suyun satın alınması" məqsədilə keçirdiyi tenderin qalibi "Dilək-1" MMC adlı şirkət olub.
Yeniavaz.com xəbər verir ki, tenderin nəticəsinə əsasən "Dilək-1" MMC Respublika Uşaq Sanatoriyasına 35 min 290 ton su satacaq. Bu miqdarda suyun satın alınması üçün Respublika Uşaq Sanatoriyası MMC-yə 178 min 214 manat 5 qəpik ödəyəcək. Rəqəmlərdən də göründyü kimi 1 ton suyun qiyməti 5 manat 5 qəpik təşkil edir. Qeyd edək ki, bu qiymət “Azərsu” ASC-nin əhaliyə satdığı içəmli suyun qiymətilə (0,35 manat) müqayisədə 14,4 dəfə çoxdur.
Məlumat üçün onu da bildirək ki, Respublika Uşaq Sanatoriyasının keçirdiyi tenderin qalibi olan şirkət tender elanından cəmi 25 gün əvvəl dövlət qeydiyyatına alınıb. Nizamnamə kapitalı 10 manat olan "Dilək-1" MMC 7 yanvar 2020-ci il tarixində dövlət qeydiyyatına alınıb. Şirkət barədə açıq internet resurslarda heç bir məlumat mövcud deyil.
Onu da əlavə edək ki, Respublika Uşaq Sanatoriyası bu gün – 11.03.2020-ci il tarixində daha bir şirkətlə tender müqaviləsi imzalayıb. “Deniz-093” MMC adlı şirkət sanatoriyaya 139 min 921 manat 31 qəpik dəyərində “Dəftərxana və təsərrüfat malları” satacaq. Maraqlıdır ki, "Dilək-1" MMC kimi “Deniz-093” MMC-də tender elanından qısa müddət əvvəl yaradılıb. Belə ki, “Deniz-093” MMC Respublika Uşaq Sanatoriyasının “Dəftərxana və təsərrüfat mallarının” satın alınması ilə bağlı elan etdiyi tenderdən cəmi 17 gün əvvəl – bu ilin yanvar ayının 13-də dövlət qeydiyyatına alınıb.
Məlumat üçün bildirək ki, "Dövlət satınalmaları haqqında" Qanunun 6-cı maddəsində malgöndərənlərin (podratçıların) ixtisasına dair tələblər yer alıb. Həmin maddənin 6.2.1-ci bəndində açıq şəkildə yazılır ki, satınalma müqaviləsinin icrasını təmin etmək üçün müvafiq sahədə peşəkarlığının, təcrübəsinin, texniki və maliyyə imkanlarının, işçi qüvvəsinin, idarəetmə səriştəsinin, etibarlığının olması lazımdır. Cəmi 20 gün əvvəl yaranan, nəinki rəsmi veb-səhifəyə, hətta sosial şəbəkə hesabına sahib olmayan bir şirkətin hansı peşəkarlığa və təcrübəyə sahib olacağı aydın deyil.
“Anar Servis”i bu dəfə “Dostluq Servis” əvəz edir…
Tender müsabiqəsində diqqət çəkən məqamlardan biri də odur ki, bu gün - 11.03.2020-ci il tarixində daha bir təhsil müəssisəsi - Bakı şəhəri, Bilgəh qəsəbəsi, Azərbaycan Qadını küçəsi 35 ünvanında yerləşən 11 nömrəli İnteqarsiya Təlimli İnternat Məktəbi “İçməli suyun alınması” məqsədilkə “Dostluq Servis” MMC ilə müavilə imzalayıb. İnternat Məktəbi 20 min ton içməli su üçün MMC-yə 80 min manat vəsait ödəyəcək. Rəqəmlərdən də göründyü kimi 1 ton suyun qiyməti 4 manat təşkil edir. Halbuki, Buzovna qəsəbəsində yerləşən uşaq sanatoriyası suyun 1 tonunu bu qiymətdən 14% baha - 5 manat 5 qəpiyə satın alır.
Xatırladaq ki, "Dövlət Satınalmaları Haqqında" Qanunun 27-ci maddəsində açqı şəkildə qeyd olunur ki, satınalan təşkilat satınalma prosedurlarının başlanılmasından əvvəl satın alacağı malların (işlərin və xidmətlərin) ehtimal olunan qiymətini (orta bazar qiyməti) hesablayır və təsdiq edir. Bir mənbədən satınalma üsulunun tətbiq edildiyi hallar istisna olmaqla, satınalan təşkilat tərəfindən satınalmaların ehtimal olunan qiyməti təsdiq olunmadan satınalma prosedurlarına başlanıla bilməz.
11 nömrəli İnteqarsiya Təlimli İnternat Məktəbinə su satan “Dostluq Servis” MMC ilə bağlı diqqət çəkən başqa bir məqam isə odur ki, təxminən bir həftə əvvəl İnternat Məktəbi “Anar Servis” MMC adlı şirkət ilə “Çirkab suyun daşınması” barədə müqavilə imzalayıb.
“Dostluq Servis” MMC və “Anar Servis” MMC-ni bir-birinə nə bağlayır?
Adları qeyd olunan hər iki şirkətin hüquqi unvanı eynidir – Bakı şəhəri, Binəqədi rayonu, Azadlıq prospekti ev 187, mənzil 79.
Hər iki şirkət təxminən eyni tarixlərdə dövlət qeydiyyatına alınıb: “Dostluq Servis” MMC 09.02.2016-cı il, “Anar Servis” MMC isə 02.02.2026-cı il tarixində.
Hər iki şirkətin nizamnamə kapitalı eynidir – 200 manat.
Hər iki şirkətin qanuni təmsilçilərinin soyadı eynidir - “Dostluq Servis” MMC -nin qanuni təmsilçisi Miriyev Famil, “Anar Servis” MMC-nin qanuni təmsilçisi isə Miriyeva Nailə.
Onu da bildirək ki, “Anar Servis” MMC təkcə “Çirkab suyun daşınması” xidmətini həyata keçirmir.
28.02.2020-ci il tarixli məlumata görə “Anar Servis” MMC Diasporla İş üzrə Dövlət Komitəsinə 29 min 326 manat 30 qəpik dəyərində dəftərxana və təsərrüfat malları satacaq.
28.02.2020-ci il tarixli məlumata görə “Anar Servis” MMC Diasporla İş üzrə Dövlət Komitəsinə 40 min 400 manat dəyərində hədiyyə xarakterli mallar satacaq.
17.02.2020-ci il tarixli məlumata görə “Anar Servis” MMC 6 nömrəli Respublika xüsusi internat məktəbinə 4 min 999 manat 88 qəpik dəyərində “Çirkab suların daşınması” xidmətini göstərəcək.
17.02.2020-ci il tarixli məlumata görə “Anar Servis” MMC 6 nömrəli Respublika xüsusi internat məktəbinə 25 min manat dəyərində içməli və texniki su satacaq.
23.01.2020-ci il tarixli məlumata görə “Anar Servis” MMC 4 nömrəli Respublika xüsusi internat məktəbinə 20 min 580 manat dəyərində içməli və texniki su satacaq.
14.01.2020-ci il tarixli məlumata görə “Anar Servis” MMC Təhsil Nazirliyi Sağlamlıq İmkanları Məhdud Uşaqlar üçün Reabilitasiya Mərkəzinə 19 min manat dəyərində içməli su satacaq.
Nə “Dostluq Servis” MMC, nə də “Anar Servis” MMC barəsində açıq internet resurslarda heç bir məlumat mövcud deyil.
Yüksək səviyyədə təmir olunan müəssisələrdə niyə su xətti yoxdur?
Yazıda adları qeyd olunan, həmçinin adları bu yazıda qeyd olunamayan və ayrı-ayrı MMC-lərdən olduqca baha qiymətə içməli su satın alan müəssisələr yaxın tarixlərdə yüksək səviyyədə təmir olunublar.
Türkan qəsəbəsində yerləşən 6 nömrəli Respublika xüsusi internat məktəbi Heydər Əliyev Fondunun "Uşaq evləri və internat məktəblərinin inkişafı" proqramı çərçivəsində 2014-cu ildə yenidən qurulub.
Şüvəlan qəsəbəsində yerləşən 4 nömrəli respublika xüsusi internat məktəbi Heydər Əliyev Fondunun “Uşaq evləri və internat məktəblərinin inkişafı” proqramı çərçivəsində 2015-ci ildə yenidən qurulub
Buzovna qəsəbəsində yerləşən Respublika Uşaq Sanatoriyası 2014-cü ildə yenidən qurulub.
Bilgəh qəsəbəsində yerləşən Təhsil Nazirliyi Sağlamlıq İmkanları Məhdud Uşaqlar üçün Reabilitasiya Mərkəzi isə 2011-ci ildən etibarən fəaliyyət göstərir.
Buzovna qəsəbəsində yerləşən 8 nömrəli Sanatoriya tipli İnternat Məktəbi Heydər Əliyev Fondunun “Uşaq evləri və internat məktəblərinin inkişafı” proqramı çərçivəsində 2012-ci ildə əsaslı təmir edilib.
Maraqlıdır ki, son illərdə yüksək səviyyədə yenidən qurulan bu müəssisələrin yaxınlığnda yerləşən digər tikililərdə və ərazlərdə içməli su mövcud olsa da, adları qeyd olunan müəssisələrdə içməli su və kanalizasiya xətti mövcud deyil.
Hər il dövlət büdcəsindən yüzminlərlə manat vəsaiti içməli su satın almağa sərf edən bu müəssisələrə su xəttinin bugünə kimi hansı səbəblərdən çəkilmədiyini öyrənmək üçün “Azərsu” ASC-nin mətbuat xidmətinin rəhbəri Anar Cəbrayıllı ilə əlaqə saxlamağa cəhd etsək də, telefon zənglərimizə cavab verən olmadı.
Geri qayıt