“Kapitalbank” dollar qıtlığı ilə süni ajiotaj yaradır
13-03-2020, 09:09
DİA.AZ: - "Neftin kəskin ucuzlaşması ilə dollara olan tələbatın artması insanları təşviş içində banklara üz tutmağa vadar edib. Növbəti devalvasiya qorxusu vətəndaşları olan-qalan milli valyutanı dollara dəyişməyə yönəldib. Düzdür, həm baş nazir, həm də Mərkəzi Bankın sədri əhalini təşvişə düşməməyə çağırıb, amma, necə deyərlər, göz gördüyündən qorxar. Elə 5 il qabaq da prezident səviyyəsində devalvasiya olmayacağı bildirilmişdi və hətta manatın dəyərdən düşürülməsindən bir gün öncə Mərkəzi Bankın sədri qəti şəkildə manatın dəyərdən düşməyəcəyini açıqlamışdı. Odur ki, insanlar artıq belə sözlərə inanmır və banklarda uzun növbələrdə əsəblərini tarıma çəkdiriblər". Bu barədə DİA.AZ-a göndərilən məqalədə deyilir.
Məqalədə daha sonra bildirilir: "Ən çox müştəri sıxlığı satışın ən aşağı kursla (1 dollar = 1,7020 manat) olduğu “Kapitalbank” filiallarındadır. Bank dollar qıtlığı ilə müştəri sıxlığından süni ajiotaj yaradır. Bankın Bəhruz Nuriyev küçəsində yerləşən filialında tez-tez dollar “yoxa çıxır” , bir neçə saatdan sonra cüzi miqdarda sifariş olunub gətirilir və bütün günü növbədə duran müştərilərin çox hissəsi evlərinə “dollarsız” yola düşürlər. Növbəti gün yenə də bu ssenari ilə davam edir :səhərin gözü açılmamış növbə tutan müştərilərin 30-40 nəfəri dolların “gəlişini” günorta 12-dək gözləyib, axşamadək dəyişməyə güclə nail olurlar. Çünki dollar bilərəkdən az gətirilir ki, əhali təşvişdə olsun. Onu da vurğulayaq ki, adambaşına bir aya 11750 dollar dəyişmək limiti qoyulub və şəxsiyyət vəsiqəsi olmadan valyuta mübadiləsi qadağandır.
“Kapitalbank”ın Nizami filialının müdiri 12.03.2020 tarixində saat 15-ə online növbə tutan 1-ci dərəcəli Qarabağ əlilinin hüququnu da kobud pozub. Öncə dollar gələn kimi əlillə xidmət ediləcəyini bildirən müdir, saat 17-də dollar gələndən sonra online növbənin hüquqi şəxslərə aid olduğunu bildirib və ortalıq iki min dollara ehtiyacı olan Qarabağ əlilinin valyuta dəyişməsinə imkan verməyib. Maraqlıdır, online növbə tanınmırsa, niyə “Kapitalbank” bu xidmət növünü saytında yerləşdirib ? Eyni zamanda, bəyəm “Kapitalbank”ın Nizami filialının müdiri bilmir ki, əlillərə, özəlliklə 1-ci dərəcəli Qarabağ əlillərinə növbədənkənar xidmət göstərilir? Əksinə, müdir Qarabağ əlilinin online növbə hüququna “xəstə” müştərilərin hüquqlarını pozmaq adı ilə qadağa qoyub. Qarabağ əlili 13.03.2020 tarixinə də rezervasiya kodu 0313-6790 olan online növbə tutub. Görəsən, “Kapitalbank”ın Nizami filialının müdiri bu növbəni də tanımayacaq? Belə olarsa, yəqin ki, məhkəmə təminatı hüququndan yararlanılacaq. Di gəl, təcrübə göstərir ki, sözügedən bank heç məhkəməni də saymır, tanımır! (?) 4 il qabaq Qarabağ əlilinin Prezident təqaüdü kartına blok qoyub 7 ay verməkdən imtina edən bu banka qarşı Nizami rayon məhkəməsində qaldırılan iddia 3 ay Fikrət Mirzəyevin icraatında “yatandan” sonra necə it-bata salındısa, hələ də nə Ədliyyə Nazirliyi , nə Məhkəmə Hüquq Şurası, nə də digər bağlantılı qurumlar tapa bilir. ..
Nazirlər Kabineti, Mərkəzi Bank ,digər bağlantılı qurumlar , çox güman, əlillərin, istehlakçıların - müştərilərin belə kobud ələ salınmasına son qoymaqda aciz olmaz. Ən azı, indi 4-5 il qabaq deyil, dövlət başçısı deyib ki, heç bir məmurun, heç bir bankın (ın) xüsusi imtiyazı yoxdur!"
dia-az.life olaraq qarşı tərəfi də dinləməyə hazırıq...
Geri qayıt