Rafael Cəbrayılovun növbəti fırıldağı:
20-04-2020, 08:56
Yəqin ki, Rafael Cəbrayılov adlı adamı tanıyırsınız. Deputat mandatını girov qoymaqla şöhrət qazanmış bu adamın yeni fırıldağı ortaya çıxıb.
Ovqat.com-un məlumatına görə, bu dəfə də o, bir başqa adamdan 100 min dollar alıb əvəzində yenə deputat mandatını girov qoyub.
2012-ci ildən 2019-cu ilə qədər Azərbaycan Milli Məclisinin dəyişilməyən siması olan, hətta parlamentin Hüquq siyasəti və dövlət quruculuğu komitəsinin üzvlüyünə qədər yüksələn Rafael Cəbrayılovun bu dəfəki qurbanı Kazımova A. (Şikayətçi adının yazılmamasını xahiş etdi) adlı xanımdır.
Kazımovanın bildirdiyinə görə, köhnə deputat ona 2018-ci ilin aprel ayında Binəqədi rayonuna icra başçısı gedəcəyi və onu da yanına şöbə müdiri göndərəcəyi barədə söz verərək pul istəyib. Xanım da Rafael Cəbrayılovun şirin dilinə və etibarlı vəzifəsinə inanıb tələb olunan pulu yaxın ətrafından toplayaraq ona verib. Qısa zamandan sonra isə Binəqədi rayon icra başçısı vəzifəsinə başqasının təyin olunması Kazımovanı şübhəyə salıb. Aldadılmış vətəndaş Rafael Cəbrayılova zəng edib və pulunu geri istəyib.
Azərbaycanın ən yüksək hakimiyyət qollarından birində hüquq məsələlərinə baxan və dövlət quruculuğuyla məşğul olan deputat borcunu qaytarmaq əvəzinə yenə şirin dilini işə salıb. Kazımovaya donuz ferması açdığını bir neçə aya yaxşı pul əldə edəcəyini və bundan sonra borcunu qaytara biləcəyini deyən deputat bu dəfə də onu aldada bilib. Hətta onu inandırmaq üçün deputat mandatını belə girov qoyub.
Xanımın “mən sənin mandatını neynirəm” sualına deputatın cavabı isə xüsusi maraqlılığı ilə seçilir: “Siz nə danışırsınız? Bu mandatın qiyməti milyon yarımdır. Cəmi 100 min pul veribsiniz, milyon yarımlıq girova razı olmursunuz? Mən dilim (doğrusu, bu deyimə ilk dəfə rast gəlirik – Ovqat.com) kimi əziz tutduğum bu mandatı heç dədəmə də həvalə etmərəm.”
Deputatın dilinin şirinliyini əks etdirən video
Yüz min dollarını alıb aldatdığı vətəndaşa bir də mandatını verərək, özünə 1 milyon 400 dollar borclu salan deputat bir müddət də belə baş girələyə bilir. Onun yenidən verdiyi vədə tamamlanda bu səfər başqa bəhanələr araya girir. Gah deputatın atası ağır xəstə olub yorğan-döşəyə düşür və onun yanında bu barədə danışmaq istəmir, gah satılığa qoyduğu evin müştərisindən pul almağa gedir, gah da qardaşı onu aldadır, deputat isə onu öldürməyə hazırlaşır. Beləcə, günlər həftələrə, həftələr aya, aylar illərə çevrilir.
Bizə ən maraqlı gələn isə budur ki, Rafael Cəbrayılov evindəki mebel əşyalarının fotosunu çəkib Kazımovaya göndərərək onu aldada bilirmiş. Lap məşhur lətifədə deyildiyi kimi, qulağına qızıl kisəsini cingildədib yola verirmiş. Onun Kazımovaya çəkib vatçapla göndərdiyi ev əşyaları ilə tanış ola bilərsiniz.
Kazımovanın dediyinə görə, sabiq deputatın özü nizam-intizam tanımasa da, vədləri həftənin günlərinə uyğun olaraq nizamlanırmış. Yəni həftənin ilk günü mütləq atası xəstələnirmiş, ikinci gün rayona gedirmiş, üçüncü gün ev satırmış və s. Növbəti həftə də eyni sözlər, eyni vədlər.
Sabiq deputatın yalanlarından bezən şikayətçi sonunda anasını da götürüb deputatın milyonçular məhəlləsində yerləşən evlərinə qədər gedib. Böyük qəsrin divarlarını xatırladan hasar qapısını nə qədər döymələrinə baxmayaraq açan olmayıb (Ovqat.com bu anları əks etdirən video-görüntü də əldə edib, lakin “əməliyyatın” iştirakçılarından birinin razılığını almadığımızdan həmin videonu hələlik ictimailəşdirmirik). Deputat isə ailəsiylə birlikdə həmin qəsrin içində imiş.
Deputatın ilk girovu
Özünü aldatdığı adamlardan qəsr divarları ilə qoruya bilən deputatı bu əməllərinə görə nədənsə cəzalandıran dövlət qurumu yoxdur. Ötən il bənzər problem yaşananda Rafael Cəbrayılov deputat mandatından imtina edərək canını qurtarmışdı. Halbuki o zaman da bu əməllərdə açıq aşkar dələduzluq motivləri vardı və çox sayda insana vurulan külli miqdarda zərərdən söhbət gedirdi. Bu cür ağır cinayətlərin cəzası isə onsuz da layiq olmadığı mandatdan imtina etməklə yekunlaşmalıdır. Üstəlik, indi məlum olur ki, imtina edilən həmin mandat belə girovluqdaymış.
Yeri gəlmişkən, Azərbaycan oxucusu Rafael Cəbrayılovun adını ilk dəfə 2010-ci ildə eşitmişdi. Bu o zaman idi ki, III çağırış Azərbaycan Milli Məclisinə seçkiləri keçirilmiş və deputat mandatıyla alver biznesinin banisi Rafael Cəbrailov Binəqədi rayonundan deputat seçilmişdi.
Həmin vaxt deputat hərracına baxan sabiq deputat Gülər Əhmədova Azərbaycan Beynəlxalq Universitetinin rektoru Elşad Abdullayevlə sövdələşməyə getmiş və söhbət zamanı rektora bəzi məsləhətlər verərək bir çox sirlərin üstünü açmışdı. Gülər Əhmədovanın etiraflarına görə, Rafael Cəbrayılova mandat verib deputat edən odur və bu, xanım deputatın gücünü göstərir: “Rafael qalmışdı kənarda, bilmirdi nə etsin... Mən onun işini həll elədim. Rafael Cəbrayılov gətirib pulunu verdi, işi də həll olundu...”
Xanım Əhmədova Elşən Abdullayevlə sövdələşərkən Rafael Cəbrayılova deputat mandatını neçəyə aldığını deməsə də, elə həmin illərdə pia.az saytı “Rafael Cəbrayılovun milyonluq mandatı” sərlövhəli məqaləsində bu suala aydınlıq gətirmişdi. Yazıda 9 saylı Binəqədi seçki dairəsindən deputat seçilmək üçün R.Cəbrayılovun 3 milyondan çox pul xərclədiyi bildirilirdi. Lakin həmin informasiyada R.Cəbrayılovun deputat seçilməsinə köməkliyi G.Əhmədovanın deyil, spiker Oqtay Əsədovun etdiyi qeyd olunurdu: “Rəfael Cəbrayılov deputat seçilmək üçün ”yuxarılara" 3 milyon manata yaxın pul ödəyib. Məlumatlı mənbə deyir ki, ilk əvvəl 1 milyon ödəyən iş adamı daha sonra mandatını tam qarantiyaya almaq üçün daha 2 milyon “tərləməli” olub. Bütün bu işlərdə isə ona Oqtay Əsədov himayədarlıq edib".
Belə görünür ki, Rafael Cəbrayılov “tərlədiyi” milyonları başqalarını aldadaraq əldə edirmiş, sonra da özünün dediyinə görə milyonyarımlıq, mətbuatın iddiasına görə isə 3 milyonluq mandatını 100 minə, 200 minə girov qoyurmuş. Lap Molla Nəsrəddinin “aldım qoz, satdım fındıq” ticarətinə oxşayan bu alış-verişdən əsas qazanan isə ya Gülər Əhmədova və himayədarı, ya da sabiq spiker Oqtay Əsədov olub. Rafael Cəbrayılovun deputatlıq sahəsindəki “bismillahı” belə qalmaqalla başlayıb.
Araşdırmamız davam edəcək.
Ovqat.com
Geri qayıt