Cəlilabadda PANDEMİYA "qaranlığı":
25-04-2020, 11:24
Pandemiya ilə bağlı ölkə rəhbərliyinin atdığı addımlar ilk gündən xalq tərəfindən böyük rəğbətlə qarşılandı. Buna görə də ölkə rəhbərliyinin təyin etdiyi qrafik üzrə həyatlarını qurmağa başladılar. Onlar əmin idilər ki, ölkə rəhbərliyi heç vaxt bu ağır günlərdə onlara laqeyd yanaşmaz. Belə də oldu... Amma onların ümidlərini sındıran məmur özbaşınalıqları oldu. Məmurlar bu məsələdən də öz maraqları naminə istifadə etməyə başladılar. Pandemiyanın ilk günündən Azərbaycanda məmurların fəaliyyətini izləyənlərdən biri də bəndənizdir. Təsəvvür edin ki, Bakı şəhərindən tutmuş ən ucqar rayonlara qədər bu məmurlar sanki eyni çubuğun qalxıb-oturması ilə fəaliyyət göstərirlər. Onlar öz hərəkətlərində yol verdikləri özbaşınalıqlara görə isə ölkə rəhbərliyinin imicinə zərbələr vururlar. Xüsusilə, pandemiya ilə bağlı yardımların və 190 manatın verilməsi məsələsində...
Düşünürəm ki, bunlar niyə bu addımları atırlar? Hesab etmirəm ki, kortəbii edirlər. Buna oxşamır. Onlar bilirlər ki, bu addımları atmaqla ölkədə ölkə rəhbərliyinə qarşı xalqın məhrəm münasibəti mənfiyə doğru gedəcək və bütün bunların ölkə rəhbərliyi tərəfindən həyata keçirildiyi qənaətinə gələcəklər. Amma xalq düşünə bilmir ki, ölkə rəhbərliyinin onlara çatacaq 190 manatdan nəsə götürmək nəyinə lazımdır. Bir də düşünürəm ki, bu məmurlar nə qədər Allahı unudub ki, xalqa verilən bu yetim payına da əl uzadırlar. Adam dəhşətə gəlir. Nə qədər haramzadə olasan ki, xalqın bu ağır günündə bu cür şərəfsiz addımlara gedəsən... Burada iki əsas məqam özünü göstərir: Birincisi, xalqı ölkə rəhbərliyinə qarşı aqressivləşdirirlər; ikincisi isə xalqın bu ağır günündə də ona ayrılan yardımdan pul götürüb öz haram yolla yığdıqları sərvətləri artırırlar.
Bunları elə-belə yazmıram. Anadan olduğum Cəlilabadda bu sahədə daha irəli gediblər. Rayonda baş verənlər sanki Rayon İcra hakimiyyətinin vecinə deyildir. Halbuki bu məsələyə onlar nəzarət etməli və yardım, 190 manat məsələsində baş verən eybəcərlikləri aradan qaldırmalıdırlar. Onlara dəfələrlə şikayət etsək də, xeyir yoxdur. Bu da sübut edir ki, onlar vahid bir mərkəzdən idarə olunurlar. Kimdir bunlar?
Bunlar bu ağır gündə ölkəmizə qarşı xalqda aqressivlik yaratmaqla nə istəyirlər? Bax, sual da budur!!! Məsələn, bizim Cəlilabad rayonu Ağdaş ərazi nümayəndəliyi üzrə maksimum 40-nəfərin bu yardımı və 190 manatı almaq hüququ olduğu halda, 400 yüzdən artıq adamın adı yazılaraq rayon icra hakimiyyətinə və məşğulluq idarəsinə verilmişdir. Bu adamların böyük hissəsi tanışlıq yolu ilə yazılıbdır. Onların əksəriyyətti təminat baxımından çox yaxşı yaşayırlar. Bəzi ailələr var ki, Rusiyada yaşayırlar, amma adları siyahıya salınıbdır. Sadəcə bura vətəndaşları olduqları üçün adlarını yazıb onların adına olan pulları, yardımları özləri mənimsəyirlər.
Eyni zamanda, o şəxslər ki, yardım və 190 manat düşür, onlardan rüşvət istəyirlər. 190 manatdan ya 30 manat, ya da ki, 40 manat tuturlar. Məsələn, kəndlər üzrə elə adamlara yardım edirlər ki, əslində onlar imkanlı şəxslərdir və onlar camaata yardım etməlidirlər. Sadəcə, onlar bu yardımı verən adamlara yaxın insanlardır, onların qohum-əqrəbalarıdırlar. İmkansızlar da buna uzaqdan tamaşa edirlər, səslərini çıxara bilmirlər. Onları hədələyirlər və bildirirlər ki, bizə bunu yuxarıdan tapşırıblar. Kimə istəyirsiniz, şikayət edin, kimsədən qorxmuruq. Məsələn, yetim-yesirdən Soyuqbulaq kəndində cəmi iki nəfərə, Vənlik kəndində üç nəfərə, Fətullahqışlaq kəndində bir nəfərə, Hacıcavad kəndində bir nəfərə, Çünzəli kəndində iki nəfərə yardım vermişlər. Ağdaş və başqa kəndlərdə də eyni vəziyyətdir. Onların hər birindən də 30-40 manat pul tuturlar. Onu da qeyd edək ki, bu kəndlərdə tək qadın və kişilər, imkansız ailələr sıyahı üzrə onlara təqdim olunubdur. Bu siyahı kənarda qalıbdır. Özlərinin isə böyük siyahısı vardır. 190 manatı isə adətən gecə qaranlıq düşəndə paylayırlar ki, başaqları xəbər tutub birdən Azərbaycan Respublikasının Prezidentinin saytına yaza bilərlər. Öz adamlarına da bərk-bərk tapşırırlar ki, kimsəyə deməsinlər...
Bütün bu cür hərəkətlər isə onların adına deyil, ölkə başçısının adına yazılır. Çünki pandemiyaya qarşı bu tədbirlər məhz onun göstərişi əsasında həyata keçirdirilir. Amma rüşvətə bulanan, millətin ağır günündə də nəfsini boğa bilməyən məmurlar və onların yerlərdə nökərləri millət verilən bu paydan da oğurluqlar edir, dövlətin imicinə zərbələr vururlar. Millətdə dövlətə inamsızlıq yaradan bu məmur təbəqəsi ifşa olunmalıdır. Hesab edirik ki, biz bu yolda aktiv olmalı və Cənab Prezidentə dəstək nümayiş etdirməliyik. Əminik ki, yazdığımız bu yazı öz nəticəsini verəcəkdir!!!
"20 yanvar" Əlilləri Cəmiyyətininin
Cəlilabad Rayon Şöbəsi üzvlərinin adından
Təyyar Cavadov //miq.az//
Geri qayıt