DTX Göygöl rayonuna da dəvət olundu...
7-05-2020, 08:20
DİA.AZ: - Göygöl rayon Üçtəpə kənd sakini Məmmədov Şahin Şakir oğlu Prezident İlham Əliyevə müraciət ünvanlayıb. Bir nüsxəsi də DİA.AZ-a daxil olan müraciətdə deyilir:
"Hörmətli cənab Prezident! Mən mən Məmmədov Şahin Şakir oğlu, Göygöl rayon Üçtəpə kəndində yaşayıram və müəllim işləyirəm. 2016-cı il aprel döyüşlərində iştirakıma görə Fəxri Fərmanla təltif edilmişəm. Ehtiyyatda olan baş leytenantam. AVMVİB-in üzvüyəm. 2003-cü ildən YAP üzvüyəm.
Ölkəmizdə son 5 ayda 5-ci icra başçısını qanunsuz əməlinə görə həbs etdilər. Günahları sübut edildi. Hər birinin etdiyi qanunsuz əməllər mətbuatda da işıqlandırıldı. Bu baş verənləri alqışlayırıq.
Həmin həbs edilən icra başçılarının rəhbərlik etdikləri rayonlarda olan qanunsuzluqlar, hətta dəfələrlə artığı Arif Seyidovun rəhbərlik etdiyi Göygöl rayonunda da baş verir.
Təsəvvür edin Göygöl rayonunda gerçəkdən də ehtiyacı olan ailələrə sosial yardım verilmir. Yaşayışı normal olan ailələrə isə sosial yardım təyin edilir. Bunu kənd icra nümayəndələri vasitəsilə edirlər. İcra nümayəndələri isə icra başçısına tabedir.
Təsəvvür edin illər öncə sözlər gəzirdi ki, bəs adam var sosial düzəldir və 6 ayını əvvəlcədən özünə götürür. İnanın ki, həmin hal hazırda Göygöl rayonunda davam edir. Və bu işi kənd icra nümayəndələri vasitəsilə həyata keçirirlər.
Siz göstəriş verirsiniz ki, iş yerləri açılsın insanlar evlərinə çörək aparsınlar, Göygöldə isə yalnız tanışı olan, "hörmət etməyi" bacaranlar həmin işlərə təyin edilirlər.
Siz göstəriş verirsiniz ki, imkansız ailələrə, ahıl qocalara yardımlar edilsin, Göygöl rayonunda isə həmin yardımlar xüsusi adamlara və ya öz qohum-əqrəbalarına verilir.
Siz göstəriş verirsiniz ki, insanların təsərrüfatını genişləndirməsi üçün məşğulluqdan onlara heyvan verilsin, ancaq bunu etmirlər. Edəndə də yalnız öz yaxınlarına edirlər.
Siz göstəriş verirsiniz ki, aztəminatlı şəxslərə 190 manat verilsin, Göygöl rayonunda isə həmin 190 manat əhaliyə verilərkən, 2-5 manatı tutulur.
Sizin Prezidentliyiniz dövründə Göygöldə təzə, müasir standartlara uyğun xəstəxana inşa edilib. İnanın həmin xəstəxananı rüşvət mənbəyi ediblər. Adicə rentgen kağızı yoxdur deyir həkimlər. İnsanları veclərinə almırlar. Sanki, Kimin pulu yoxdursa ölməlidir. Xəstəxananın aptekindən heç kəs pulsuz dərman götürə bilməz. Hər kəs məcburən xəstəxananın qarşısında olan və Arif Seyidova məxsusluğu heç kimdə şübhə doğurmayan aptekdın dərman alır.
Göygöl rayon MKİTB-də özü işə gəlməyən, adamlar var. Həmin insanların maaş kartları özlərində deyil. İşsiz birisi gedib iş istəsə deyəcəklər iş yoxdur. Halbuki, ölü canlara maaş yazırlar. Çünki həmin maaş özlərinə çatır.
Göygöl rayon Məşğulluq Mərkəzində işsizliyə görə müavinətin təyin edilməsi zamanı 2 ayın pulu əvvəlcədən alınırdı. Zamanında mən bunu ifşa etmişdim. Həmin şəxslər işlərindən azad edilmişdilər. Lakin təəssüf ki, yenə də insanları incidirlər.
Hörmətli cənab Prezident!
Bütün bu hadisələr və daha da artığı Arif Seyidovun rəhbərlik etdiyi Göygöl rayonunda baş verməkdədir. Onlar qanunlardan qorxmurlar, öz bildikləri kimi edirlər.
Arif Seyidov artıq Göygöl rayonunun idarə edə bilmir. Bacarmır. Tabeliyində olan şəxslərə sözü keçmir. Və ya özü bu işlərin başında durur".
İddia olunanlarla bağlı DİA.AZ olaraq bütün maraqlı tərəfləri dinləməyə hazırıq...
Geri qayıt